Dyondzo 15

Nsati Wa Lota U Langute eNdzhaku

LOTA ni ndyangu wakwe a va tshama na Abrahama etikweni ra Kanana. Siku rin’wana Abrahama u byele Lota a ku: ‘A ku na ndhawu leyi ringaneke ya swifuwo swa hina hinkwaswo. Ndzi kombela hi hambana. Loko u ya etlhelo leri, mina ndzi ta ya eka leriya.’

Lota u langute tiko. U vone xiphemu xo saseka swinene xa tiko lexi nga ni mati ni madyelo yo tala lamanene ya swifuwo swakwe. Xiphemu xexo a ku ri Muganga wa Yordani. Kutani Lota u rhurhisele ndyangu ni swifuwo swakwe kwalaho. Va hetelele va ake emutini wa Sodoma.

Vanhu va le Sodoma a va bihe ngopfu. Sweswo a swi karhata Lota, hikuva a a ri munhu wo lulama. Hambi ku ri Xikwembu a xi karhatekile. Eku heteleleni, Xikwembu xi rhumele tintsumi timbirhi ku tsundzuxa Lota leswaku xi ta lovisa Sodoma ni muti wa le kusuhi wa Gomora hikwalaho ka vubihi bya yona.

Tintsumi ti byele Lota ti ku: ‘Hatlisa! Teka nsati ni vana va wena vambirhi va vanhwanyana mi huma laha!’ Lota ni ndyangu wakwe a va nonoka, hiloko tintsumi ti va khoma hi voko ti va humesa emutini. Hiloko ntsumi yin’wana yi ku: ‘Balekani! Mi nga languti endzhaku. Balekelani etintshaveni leswaku mi nga fi.’

Lota ni vana vakwe va vanhwanyana va yingisile kutani va tsutsuma va huma eSodoma. A va yimanga naswona a va langutanga endzhaku. Kambe nsati wa Lota a nga yingisanga. Endzhaku ka loko va fambe mpfhukanyana ku suka eSodoma, u yimile kutani a languta endzhaku. Hiloko nsati wa Lota a hundzuka tshuka ra munyu. Xana wa n’wi vona laha xifanisweni?

Hi nga kuma dyondzo leyinene emhakeni leyi. Yi hi kombisa leswaku Xikwembu xi ponisa lava xi yingisaka kambe lava nga xi yingisiki va ta lahlekeriwa hi vutomi bya vona.

Genesa 13:5-13; 18:20-33; 19:1-29; Luka 17:28-32; 2 Petro 2:6-8.