Dyondzo 22

Yosefa A Hoxiwa eKhotsweni

YOSEFA a a ri ni malembe ya 17 loko a yisiwa le Egipta. Kwalaho u xaviseriwe wanuna la vuriwaka Potifaro. Potifaro a a tirha eka hosi ya le Egipta leyi vuriwaka Faro.

Yosefa a a n’wi tirhela hi matimba n’wini wakwe Potifaro. Loko Yosefa a ri karhi a kula, Potifaro u n’wi veke ku va mulanguteri wa yindlu yakwe hinkwayo. Kutani, ha yini Yosefa a ri laha khotsweni? U le khotsweni hikwalaho ka nsati wa Potifaro.

Yosefa a a ri mbhurhi, naswona nsati wa Potifaro a a lava ku etlela na yena. Kambe Yosefa a a swi tiva leswaku swi bihile sweswo naswona a a nga ta swi endla. Nsati wa Potifaro u hlundzuke ngopfu. Kutani loko nuna wa yena a vuya, nsati loyi u hembile a ku: ‘Yosefa u ringete ku etlela na mina!’ Potifaro u swi khorwile leswi a swi vuriwa hi nsati wakwe kutani a karihela Yosefa swinene. Hiloko a endla leswaku a pfaleriwa ekhotsweni.

Wanuna loyi a a langutela khotso hi ku hatlisa u swi vonile leswaku Yosefa a a ri munhu lonene. Hiloko a n’wi veka ku langutela vabohiwa lavan’wana hinkwavo. Endzhakunyana Faro u hlundzukele mucheri wa vhinyo ni mubaki kutani a va hoxa ekhotsweni. Siku rin’wana havambirhi va lorhe norho wo hlawuleka kambe a va nga swi tivi leswaku milorho ya vona yi vula yini. Hi siku leri tlhandlamaka Yosefa u te: ‘Ndzi byeleni milorho ya n’wina.’ Loko va n’wi byerile, Yosefa u va hlavutele milorho ya vona hi ku pfuniwa hi Xikwembu.

Yosefa u byele loyi a a chela vhinyo a ku: ‘Endzhaku ka masiku manharhu u ta ntshunxiwa ekhotsweni kutani u ta tlhela u ya tirha ku chelela Faro vhinyo.’ Kutani Yosefa u engetele a ku: ‘Loko u huma, u ndzi tivisa eka Faro naswona u ndzi pfuna leswaku ndzi huma endhawini leyi.’ Kambe Yosefa u byele mubaki a ku: ‘Endzhaku ka masiku manharhu Faro u ta ku tsema nhloko.’

Endzhaku ka masiku manharhu swi humelele hilaha Yosefa a vuleke hakona. Faro u lerise leswaku mubaki a tsemiwa nhloko. Kambe mucheri wa vhinyo u ntshunxiwile ekhotsweni kutani a sungula ku tirhela hosi nakambe. Kambe mucheri wa vhinyo a nga n’wi tsundzukanga Yosefa! A nga n’wi tivisanga Faro hi ta Yosefa, xisweswo u boheke ku tshama ekhotsweni.

Genesa 39:1-23; 40:1-23.