Yosefa A Vengiwa Hi Vamakwavo
Dyondzo 21
Yosefa A Vengiwa Hi Vamakwavo
VONA ndlela leyi jaha leri ri nga ni gome ni ku heleriwa hi matimba ha yona. Jaha leri i Yosefa. Vamakwavo va ha ku n’wi xavisela vavanuna lava, lava yaka aEgipta. Yosefa u ta fika a va hlonga kwalaho. Ha yini vamakwavo va endle nchumu wo biha swonghasi? Hikuva va vondzoka Yosefa.
Tata wa vona Yakobe, a a rhandza Yosefa swinene. U kombise leswaku wa n’wi rhandza hi ku n’wi rhungela nguvu yo leha ya ku saseka. Loko vamakwavo va khume va vone ndlela leyi Yakobe a a rhandza Yosefa ha yona, va sungule ku vondzoka Yosefa ni ku n’wi venga. Kambe ku ni xivangelo xin’wana lexi endleke leswaku va n’wi venga.
Yosefa u lorhe milorho yimbirhi. Eka milorho ya Yosefa ha yimbirhi, vamakwavo a va nkhinsamile emahlweni ka yena. Loko Yosefa a byela vamakwavo hi milorho leyi, va ye va n’wi venga ngopfu.
Siku rin’wana loko vabuti wa Yosefa va ri karhi va risa tinyimpfu ta tata wa vona, Yakobe u kombele Yosefa leswaku a ya va pfuxela. Loko vamakwavo wa Yosefa va n’wi vona a ri karhi a ta, van’wana va vona va te: ‘A hi n’wi dlayeni!’ Kambe Ruveni, lonkulu eka hinkwavo u te: ‘Mi nga endli sweswo!’ Ematshan’weni ya sweswo, va khome Yosefa va n’wi hoxa ekheleni leri omeke. Kutani va tshama ehansi va ehleketa leswaku va ta n’wi endla yini.
Hi nkarhi wolowo ku te vavanuna van’wana va Vaiximayele. Yuda u byele vamakwavo hi tatana a ku: ‘A hi n’wi xaviseleni Vaiximayele.’ Hiloko va n’wi xavisa. Va xavise Yosefa hi swiphemu swa 20 swa silivhere. Wolowo a wu ri nsele lowukulu!
Xana vamakwavo a va ta n’wi byela yini tata wa vona? Va dlaye mbuti kutani va peta nguvu ya Yosefa leyo saseka engatini ya yona hi ku phindha-phindha. Hiloko va teka nguvu yoleyo va famba na yona ekaya va ya nyika tata wa vona Yakobe, kutani va ku: ‘Hi kume leswi. Hi kombela u yi languta ku vona loko ku nga ri yona nguvu ya Yosefa.’
Hiloko Yakobe a swi vona leswaku a ku ri yona. Hiloko a rila a ku: ‘Yosefa u fanele a dlayiwe hi xivandzana.’ Hi swona leswi vamakwavo wa Yosefa a va lava leswaku tata wa vona a swi ehleketa. Yakobe u twe ku vava ngopfu. U rile masiku yo tala. Kambe Yosefa a a nga fanga. A hi voneni leswi n’wi humeleleke laha a yisiweke kona.
U Nga Ha Tsakela
TIDYONDZO TA SWIFANISO
Yosefa U Xaviseriwa eVuhlongeni
Kopa tluka leri ro pendela eka rona u tlhela u ri printa kutani u languta swilo swimbirhi leswi nga fambisaniki ni mhaka leyi ya Bibele.
TIMHAKA TA BIBELE LETI NGA NI SWIFANISO
Yosefa A Ri eTikweni Ra Egipta
U nga xi tsakisa njhani Xikwembu hambiloko u nga voniwi hi munhu? Hlaya hi swifaniso swa mhaka leyi ya le Bibeleni kutani u dyondza eka xikombiso xa Yosefa.
