Dyondzo 108

Endleleni Leyi Yaka eDamaska

XANA wa swi tiva leswaku i mani loyi a etleleke laha hansi? I Sawulo. Tsundzuka, hi yena loyi a a rindze tinguvu ta vavanuna lava a va khandla Stefano hi maribye. Languta ku vonakala lokuya lokukulu! Ku humelele yini?

Endzhaku ka loko Stefano a dlayiwile, Sawulo a a rhangela eku hlotiweni ka valandzeri va Yesu leswaku a ta va xanisa. A a famba hi yindlu ni yindlu a va kokela ehandle kutani a va nghenisa ekhotsweni. Vadyondzisiwa vo tala va balekele emitini yin’wana naswona va sungule ku vula “mahungu lamanene” kona. Kambe Sawulo u ye emitini yin’wana ku ya lava valandzeri va Yesu. Enkarhini wolowo a a ri endleleni yo ya eDamaska. Kambe loko a ri endleleni, ku humelele mhaka leyi yo hlamarisa:

Hi xitshuketa ku vonakala loku humaka etilweni ku tlhave Sawulo ku n’wi rhendzela. U wele ehansi hilaha u swi vonaka hakona laha. Kutani rito ri ku: ‘Sawulo, Sawulo! U ndzi xanisela yini?’ Vavanuna lava a va ri na Sawulo va vone ku vonakala kutani va twa ni mpfumawulo wa rito, kambe a va swi twisisanga leswi a swi vuriwa.

Sawulo u vutise a ku: ‘Xana u mani, Hosi?’

Hiloko rito ri ku: ‘Hi mina Yesu, loyi u n’wi xanisaka.’ Yesu u vule tano hikuva loko Sawulo a xanisa valandzeri vakwe, Yesu a a twa onge ku xanisiwa yena.

Kutani Sawulo u vutise a ku: ‘Xana ndzi fanele ku endla yini, Hosi?’

Yesu u te: ‘Pfuka u nghena eDamaska. Kwalaho u ta byeriwa leswi u faneleke u swi endla.’ Loko Sawulo a pfuka a pfula mahlo, a a nga voni nchumu. A a fe mahlo! Kutani vavanuna lava a a ri na vona va n’wi khome hi voko va n’wi yisa eDamaska.

Hiloko Yesu a vulavula ni un’wana wa vadyondzisiwa vakwe eDamaska, a ku: ‘Pfuka, Ananiya. Yana exitarateni lexi vuriwaka Ndzulamo. Endlwini ya Yudasi u vutisa munhu loyi a vuriwaka Sawulo. Ndzi n’wi hlawurile leswaku a va nandza wa mina wo hlawuleka.’

Ananiya u yingisile. Loko a hlangana na Sawulo, u n’wi tlhandleke mavoko kutani a ku: ‘Hosi yi ndzi rhumile leswaku u tlhela u vona ni ku tala moya lowo kwetsima.’ Xikan’we-kan’we swilo leswi fanaka ni mahakatimba swi we ematihlweni ya Sawulo, kutani a tlhela a vona.

Sawulo u tirhisiwe swinene ku chumayela eka vanhu va matiko yo tala. A a tiviwa tanihi muapostola Pawulo, loyi hi nga ta dyondza swo tala ha yena. Kambe a hi rhangeni hi vona leswaku Xikwembu xi rhume Petro leswaku a ya endla yini.

Mintirho 8:1-4; 9:1-20; 22:6-16; 26:8-20.