Dyondzo 112

Xikepe Xi Tshoveka eXihlaleni

VONA, xikepe xi le khombyeni! Xi tshovekile xi va swiphemu-phemu! Xana wa va vona vanhu lava tluleleke ematini? Van’wana se va le kusuhi ni ribuwa. Xana i Pawulo luya? A hi voneni leswaku ku humelele yini ha yena.

Tsundzuka, ku hele malembe mambirhi Pawulo a khotsiwile eKhezariya. Kutani yena ni vabohiwa van’wana va hoxiwe exikepeni, ivi va nghena endleleni va kongoma eRhoma. Loko va hundza ekusuhi ni xihlala xa Kreta, ku ve ni xidzedze lexikulu. Moya a wu hunga swinene lerova vavanuna a va tsandzeka ku kongomisa xikepe. Kutani a va nga swi koti ku vona dyambu ninhlikanhi kumbe tinyeleti nivusiku. Eku heteleleni, endzhaku ka masiku yo tala, hinkwavo lava a va ri exikepeni a va heleriwe hi ntshembo wa leswaku va ta pona.

Kutani Pawulo u suke a yima, a ku: ‘Ku hava ni un’we wa n’wina la nga ta lahlekeriwa hi vutomi; ku ta lahleka xikepe ntsena. Hikuva evusikwini bya tolo ntsumi ya Xikwembu yi tile eka mina yi ku, “U nga chavi, Pawulo! U fanele u yima emahlweni ka Khezari, hosi ya le Rhoma. Naswona Xikwembu xi ta va ponisa hinkwavo lava u nga ta va u ri na vona exikepeni.”’

Exikarhi ka vusiku hi siku ra vu-14 endzhaku ka loko xidzedze xi sungurile, vatluti va xiye leswaku mati a ma ha entanga ngopfu! Hikwalaho ko chava ku hima maribye emunyameni, va pete tinsoma ta vona. Hi siku leri landzelaka va vone nsonga. Va kunguhate ku tluta va ya eribuweni.

Phela, loko va ri ekusuhi ni ribuwa, xikepe xi hime ndhundhuma ya sava kutani xi yima. Kutani magandlati ma sungule ku fayetela xikepe xi va swiphemu-phemu. Ndhuna ya vuthu yi te: ‘Hinkwenu lava mi kotaka ku hlambela tlulelani endzeni ka lwandle mi hlambela ku ya fika eribuweni. Na n’wina van’wana tlulelani endzeni ka mati mi va landzela, mi titekela swiphemu swa mapulanga ya xikepe mi khomelela swona.’ Kutani va endle tano. Hi ndlela yoleyo vanhu hinkwavo va 276 lava a va ri exikepeni va fike eribuweni va hlayisekile, hilaha ntsumi yi tshembiseke hakona.

Xihlala xa kona a xi vuriwa Melita. Vanhu va kona a va ri ni musa swinene, naswona va khathalele vanhu lava a va huma exikepeni. Loko maxelo se ma ri manene, Pawulo u nghenisiwe exikepeni lexin’wana a yisiwa eRhoma.

Mintirho 27:1-44; 28:1-14.