Xiphemu 1

Ku Suka Eku Tumbuluxiweni Ku Ya Eka Ndhambi

Xana matilo ni misava swi huma kwihi? Xana dyambu, n’weti ni tinyeleti, swin’we ni swilo swo tala leswi nga laha misaveni swi ve kona hi ndlela yihi? Bibele yi tiyisile loko yi vula leswaku swi tumbuluxiwe hi Xikwembu. Hikwalaho, buku ya hina yi sungula hi switori swa le Bibeleni leswi vulavulaka hi ntumbuluko.

Hi kuma leswaku eku sunguleni Xikwembu xi vumbe vanhu va moya lava hi ndlela yo karhi a va fana na xona. A va ri tintsumi. Kambe misava a yi endleriwe vanhu vo fana na hina. Hikwalaho Xikwembu xi endle wanuna ni wansati, ku nga Adamu na Evha kutani xi va veka entangeni wo saseka. Kambe a va xi yingisanga Xikwembu, xisweswo va lahlekeriwe hi lunghelo ro hanya hilaha ku nga heriki.

Ku sukela eku vumbiweni ka Adamu ku ya fika eka Ndhambi leyikulu, a ku ri malembe ya 1 656. Hi nkarhi wolowo, a ku ri ni vanhu vo tala vo homboloka. Etilweni, a ku ri ni vanhu va moya lava nga vonakiki, Sathana ni tintsumi takwe to homboloka. Emisaveni, a ku ri na Kayini ni vanhu van’wana vo tala vo homboloka, ku katsa ni vavanuna lava a va ri ni matimba hi ndlela leyi nga tolovelekangiki. Kambe a va ri kona ni vanhu lavanene emisaveni—a ku ri Avele, Enoko na Nowa. Eka Xiphemu xo SUNGULA, hi ta dyondza hi ta vanhu lava hinkwavo ni leswi va swi endleke.