Dyondzo 93

Yesu A Phamela Mintshungu

KU HUMELELE nchumu wun’wana lowu vavaka swinene. Yohane Mukhuvuri wa ha ku dlayiwa. Herodiya lowa nsati wa hosi, a a n’wi venga. Naswona u swi kotile ku endla leswaku hosi yi lerisa leswaku ku tsemiwa nhloko ya Yohane.

Loko Yesu a twa mhaka leyi, u ve ni gome lerikulu. U ye enhoveni a ri yexe. Kambe vanhu a va n’wi sele ndzhaku. Loko Yesu a vona mintshungu, u yi twele vusiwana. Kutani a yi byela hi ta mfumo wa Xikwembu a tlhela a horisa vavabyi exikarhi ka yona.

Madyambu wolawo vadyondzisiwa vakwe va te eka yena kutani va ku: ‘Se ri perile naswona laha hi le nhoveni. Tlherisa vanhu lava leswaku va ta tixavela swakudya eswimitanini swa le kusuhi.’

Yesu u hlamule a ku: ‘A va fanelanga va famba. N’wina va nyikeni swakudya.’ Hiloko Yesu a hundzulukela eka Filipi, a n’wi vutisa a ku: ‘Xana hi nga swi xava kwihi swakudya swo phamela vanhu lava hinkwavo?’

Filipi u hlamule a ku: ‘Swi ta hi dya mali yo tala swinene ku xava swakudya leswi un’wana ni un’wana a nga kumaka leswitsongonyana.’ Andriya u te: ‘Mufana loyi a khomaka swakudya swa hina, u ni swinkwa swa ntlhanu ni tinhlampfi timbirhi. Kambe a swi nge va eneli vanhu lava hinkwavo.’

Hiloko Yesu a ku: ‘Byelani vanhu va tshama ebyanyini.’ Hiloko a nkhensa swakudya eka Xikwembu kutani a sungula ku swi phemelela. Endzhaku ka sweswo, vadyondzisiwa va nyike vanhu hinkwavo xinkwa ni nhlampfi. A ku ri ni vavanuna va 5 000 ni magidi-gidi ya vavasati ni vana. Hinkwavo va dye va xurha. Kutani loko vadyondzisiwa va hlengeleta leswi saleke, va tate swirhundzu swa 12!

Endzhaku ka sweswo Yesu u byele vadyondzisiwa vakwe leswaku va khandziya xikepe va tsemakanya Lwandle ra Galeliya. Exikarhi ka vusiku ku pfuke xidzedze lexikulu kutani magandlati ma ba xikepe xi ya hala ni hala. Vadyondzisiwa va chuhe ngopfu. Hiloko exikarhi ka vusiku va vona munhu un’wana a ri karhi a famba ehenhla ka mati a ta laha va nga kona. Va huwelerile hi ku chava, hikuva a va nga xi tivi lexi a va xi vona.

Yesu u te: ‘Mi nga chavi. Hi mina!’ Hambiswiritano, a va nga kholwi. Kutani Petro u te: ‘Loko hakunene ku ri wena Hosi, ndzi lerise leswaku ndzi famba ehenhla ka mati ndzi ta eka wena.’ Yesu u hlamule a ku: ‘Tana!’ Hiloko Petro a huma exikepeni a famba ehenhla ka mati! Hiloko a sungula ku chuha kutani a sungula ku nwela kambe Yesu a n’wi ponisa.

Hi ku famba ka nkarhi, Yesu u tlhele a phamela vanhu va magidi. Hi nkarhi wolowo a a ri ni swinkwa swa nkombo ni tinhlampfi ti nga ri tingani letitsongo. Nakambe vanhu va enele hinkwavo. Xana a yi tsakisi ndlela leyi Yesu a khathalelaka vanhu ha yona? Loko se a fuma, a ri hosi leyi vekiweke hi Xikwembu, a hi nge he vileli ha nchumu!

Matewu 14:1-32; 15:29-38; Yohane 6:1-21.