Dyondzo 97

Yesu A Ta Tanihi Hosi

ENDZHAKU ko horisa vavanuna vambirhi lava feke mahlo lava a va tshamela ku kombela, Yesu u ye eximutanini xin’wana xa le kusuhi na Yerusalema. U byele vadyondzisiwa vakwe vambirhi, a ku: ‘Fambani mi ya eximutanini lexiya kutani mi ta kuma ximbhongolwana. Xi ntshunxeni kutani mi xi tisa eka mina.’

Loko ximbhongolwana xi tisiwile eka yena, Yesu u xi gadile. Hiloko a ya eYerusalema leyi a yi ri ekusuhi. Loko a tshinela ekusuhi ni muti, ntshungu lowukulu wu n’wi hlanganisile. Hiloko vanhu vo tala va hluvula tinguvu ta vona kutani va ti andlala endleleni. Van’wana va tseme marhavi ya mirhi ya micindzu. Na vona va ma andlale endleleni kutani va huwelela va ku: ‘Xikwembu a xi katekise hosi leyi taka hi vito ra Yehovha!’

Le Israyele, khale tihosi letintshwa a ti nghena eYerusalema hi ximbhongolwana ti tikombisa eka vanhu. Hi leswi Yesu a swi endleke. Kutani vanhu lava va kombise leswaku va lava Yesu a va hosi ya vona. Kambe a hi vanhu hinkwavo a va n’wi lava. Swi ve tano loko Yesu a ya etempeleni.

Loko a ri etempeleni, Yesu u hanyise vanhu lava feke mahlo ni swilema. Loko vana lavatsongo va vona leswi, va dzunise Yesu. Kambe sweswo swi hlundzukise vaprista naswona va byele Yesu va ku: ‘Xana wa swi twa leswi vana lava va swi vulaka?’

Yesu u va hlamule a ku: ‘Ina, ndza swi twa. Xana a mi si tshama mi hlaya eBibeleni laha yi nge: “Xikwembu xi ta humesa swidzuniso emilon’wini ya vana?”’ Kutani vana lava va hambeta va dzunisa hosi leyi vekiweke hi Xikwembu.

Hi lava ku fana ni vana volavo, a swi tano ke? Vanhu van’wana va nga ringeta ku hi tshikisa ku vulavula hi mfumo wa Xikwembu. Kambe hi ta hambeta hi byela van’wana hi swilo swo hlamarisa leswi Yesu a nga ta swi endlela vanhu.

A wu nga si fika nkarhi wa leswaku Yesu a sungula ku va hosi loko a ha ri emisaveni. Xana nkarhi wo tano wu ta fika rini? Vadyondzisiwa va Yesu a va lava ku tiva. Hi ta hlaya hi mhaka leyi exihlokweni lexi landzelaka.

Matewu 21:1-17; Yohane 12:12-16.