Ku Tshemba Mpfuno Wa Xikwembu
Dyondzo 81
Ku Tshemba Mpfuno Wa Xikwembu
VANHU va magidi va teke riendzo va suka eBabilona va ya eYerusalema. Kambe loko va fika eYerusalema, va lo kuma marhumbi ntsena. A ku nga ri na vanhu. Vaisrayele a va fanele va pfuxelela swilo hinkwaswo.
Nchumu wo sungula lowu va wu akeke a ku ri alitari. Leyi i ndhawu leyi a va endlela Yehovha eka yona magandzelo kumbe tinyiko. Endzhaku ka tin’hweti ti nga ri tingani, Vaisrayele va sungule ku aka tempele. Kambe valala va vona lava a va tshama ekusuhi ni kwalaho a va nga swi lavi leswaku Vaisrayele va aka tempele. Kutani va ringete ku va chavisa leswaku va nga yi aki. Eku heteleleni, valala lava va endle leswaku hosi leyintshwa ya Peresiya yi veka nawu wo va tshikisa ntirho wo aka.
Ku hundze malembe yo tala. Ku hundze malembe ya 17 Vaisrayele va vuyile eBabilona. Yehovha u rhume vaprofeta vakwe, ku nga Hagayi na Zakariya leswaku va byela vanhu leswaku va sungula ku aka. Vanhu a va tshemba leswaku Xikwembu xi ta va pfuna, kutani va va yingisile vaprofeta volavo. Va sungule ku aka nakambe, hambileswi nawu a wu vula leswaku a va fanelanga va aka.
Kutani Tatenayi ndhuna-nkulu ya le Peresiya u tile a ta vutisa Vaisrayele leswaku va wu kuma kwihi mpfumelelo wo aka tempele. Vaisrayele va n’wi byele leswaku loko va ha ri eBabilona, Hosi Korexe u va byele a ku: ‘Sweswi, yanani eYerusalema mi ya aka tempele ya Yehovha, Xikwembu xa n’wina.’
Tatenayi u rhumele papila eBabilona, a vutisa loko Korexe, loyi se a a file, a swi vurile sweswo hakunene. Ku nga ri kungani hosi leyintshwa ya Peresiya yi hlamurile. Yi vule leswaku Korexe u swi vurile hakunene. Hiloko hosi yi ku: ‘Tshikani Vaisrayele va aka tempele ya Xikwembu xa vona. Naswona ndzi mi lerisa leswaku mi va pfuna.’ Endzhaku ka malembe ya kwalomu ka mune tempele a yi herile, naswona Vaisrayele a va tsakile swinene.
Se a ku hundze malembe ya kwalomu ka 48 tempele yi akiwile. Vanhu va le Yerusalema na vona se a va ri swisiwana, naswona muti ni tempele ya Xikwembu a swi nga ha sasekanga ngopfu. Muisrayele la vuriwaka Ezra loyi a ha ri eBabilona u twe leswaku tempele ya Xikwembu yi lava ku lunghisiwa. Xana wa swi tiva leswaku u endle yini?
Ezra u fambile a ya eka Atazekiseki, hosi ya Peresiya, kutani hosi leyi leyinene yi nyike Ezra tinyiko to tala leswaku a tlhelela na tona eYerusalema. Ezra u kombele Vaisrayele lava a va ri eBabilona leswaku va n’wi pfuna ku rhwala tinyiko leti va ya na tona eYerusalema. Vanhu va kwalomu ka 6 000 va vule leswaku va ta famba na yena. A va ri na silivhere ni nsuku wo tala ni swilo swin’wana swa risima leswi a va fanele va famba na swona.
Ezra a a karhatekile hikuva a ku ri ni vanhu vo homboloka endleleni. Kumbexana vanhu va kona a va ta va tekela silivhere ni nsuku wa vona, kutani va va dlaya. Kutani Ezra u hlengelete vanhu, hilaha u swi vonaka hakona laha xifanisweni. Kutani va khongela eka Yehovha leswaku a va sirhelela eriendzweni ra vona ro leha ro tlhelela eYerusalema.
Yehovha u va sirhelerile. Naswona va fike va hlayisekile eYerusalema endzhaku ko famba tin’hweti ta mune. Xana leswi a swi kombisi swona leswaku Yehovha a nga va sirhelela lava vekaka ntshembo wa vona eka yena leswaku a va pfuna?
