Dyondzo 83

Marhangu Ya Yerusalema

LANGUTA ntirho lowu endliwaka laha. Vaisrayele a va gingiriteka, va aka marhangu ya Yerusalema. Loko Hosi Nebukadnetsara a lovise Yerusalema emalembeni ya 152 lama hundzeke, u wise marhangu a tlhela a hisa tigede ta muti. Vaisrayele a va ma pfuxanga marhangu wolawo loko va vuyela eBabilona.

Xana u anakanya leswaku vanhu a va titwa njhani ku tshama malembe yo tani emutini lowu nga riki na marhangu? A va nga titwi va hlayisekile. Valala va vona a va ta nghena hi ku olova va va hlasela. Kambe sweswi wanuna la vuriwaka Nehemiya u pfune vanhu leswaku va pfuxelela marhangu. Xana wa swi tiva leswaku Nehemiya i mani?

Nehemiya a a ri Muisrayele la humaka emutini wa Xuxani, laha Mordekayi na Estere a va tshama kona. Nehemiya a a tirha endlwini ya hosi, hikwalaho swi nga ha endleka a a ri munghana lonkulu wa Mordekayi na Nkosikazi Estere. Kambe Bibele a yi vuli leswaku Nehemiya a a tirhela nuna wa Estere, Hosi Ahasuwerusi. U tirhele hosi leyi tlhandlameke, ku nga Hosi Atazekiseki.

Tsundzuka, Atazekiseki a a ri hosi leyinene leyi nyikeke Ezra mali leswaku a tlhelela eYerusalema a ya pfuxeta tempele ya Yehovha. Kambe Ezra a nga ri akanga rirhangu ra muti leri weke. A hi voneni leswaku swi tise ku yini leswaku ri akiwa hi Nehemiya.

Ku hundze malembe ya 13 Atazekiseki a nyike Ezra mali yo pfuxeta tempele. Nehemiya a a ri mucheri wa vhinyo wa Hosi Atazekiseki. Leswi swi vula leswaku a a chelela hosi vhinyo, ni ku vona leswaku ku hava munhu la ringetaka ku chelela hosi chefu. A ku ri ntirho wa nkoka swinene.

Siku rin’wana Hanane makwavo wa Nehemiya swin’we ni vavanuna van’wana lava humaka etikweni ra Israyele va endzele Nehemiya. Va n’wi byele hi swiphiqo leswi Vaisrayele va langutaneke na swona, nileswaku marhangu ya Yerusalema a ma si pfuxiwa. Mhaka leyi yi n’wi hlundzukise ngopfu Nehemiya, kutani u khongele eka Yehovha ha yona.

Siku rin’wana hosi yi xiye leswaku Nehemiya a a nga tsakanga, kutani yi n’wi vutise yi ku: ‘Ha yini u languteka u nga tsakanga?’ Nehemiya u vule leswaku hileswi muti wa Yerusalema wu nga le ka xiyimo xo biha naswona marhangu ya wona a ma si lunghisiwa. Hiloko hosi yi vutisa yi ku: ‘Xana u lava yini?’

Nehemiya u te: ‘Ndzi pfumelele ndzi ya eYerusalema, leswaku ndzi ta ya pfuxelela marhangu ya wona.’ Hosi Atazekiseki u n’wi kombise tintswalo. U vule leswaku Nehemiya a nga famba, naswona u n’wi tshembise ku n’wi pfuna ku kuma timhandzi ta ku aka. Loko Nehemiya a fika eYerusalema, u byele vanhu hi ta makungu yakwe. Va ma amukerile makungu wolawo, kutani va ku: ‘A hi sunguleni ku aka.’

Loko valala va Vaisrayele va vona rirhangu ri tlakuka, va te: ‘Hi ta tlhandluka hi ya va dlaya, hi va tshikisa ntirho wo aka.’ Kambe Nehemiya a a swi twa, kutani u nyike vatirhi matlhari ni masavula. Kutani a ku: ‘Mi nga va chavi valala va hina. Lwelani vamakwenu, vana va n’wina, vasati va n’wina ni mindyangu ya n’wina.’

Vanhu va ve ni xivindzi. Va tshame va lunghise matlhari ya vona nhlikanhi ni vusiku, va ya emahlweni va aka. Xisweswo va hete ntirho lowu hi masiku ya 52 ntsena. Kutani vanhu a va titwa va sirhelelekile endzeni ka muti. Nehemiya na Ezra va dyondzise vanhu nawu wa Xikwembu, naswona vanhu a va tsakile.

Kambe swilo a swi nga ha fani ni le ku sunguleni loko Vaisrayele va nga si yisiwa evuhlongeni eBabilona. Vanhu a va fumiwa hi hosi ya Peresiya naswona a va fanele va yi tirhela. Kambe Yehovha u tshembise leswaku u ta rhumela hosi leyintshwa, nileswaku hosi leyi yi ta tisa ku rhula evanhwini. Xana a ku ri mani hosi ya kona? Xana a yi ta ku tisa njhani ku rhula emisaveni? Ku hundze malembe ya kwalomu ka 450 ku nga si tiviwa nchumu hi hosi leyi. Endzhaku ka sweswo yi velekiwile hosi leyi ya nkoka. Kambe leyi i mhaka yin’wana yo leha.

Nehemiya tindzima 1 ku ya eka 6.