Dyondzo 77

Va Arile Ku Nkhinsama

XANA wa ti tsundzuka timhaka ta majaha lawa manharhu? I vanghana va Daniyele lava aleke ku dya swakudya leswi nga riki swinene eka vona. Vababilona a va va vitana Xadraka, Mixaka na Abedinigo. Kambe va langute sweswi. Ha yini va ale ku nkhinsamela xifaniso lexi lexikulu ku fana ni vanhu lavan’wana hinkwavo? A hi voneni.

Xana wa ha yi tsundzuka milawu leyi Yehovha a yi tsaleke hi yexe leyi vuriwaka Swileriso swa Khume? Xo sungula xa swileriso leswi xi ri: ‘U nga tshuki u gandzela swikwembu swin’wana handle ka mina.’ Majaha lawa ma wu yingisile nawu lowu, hambileswi a swi nga olovi ku endla tano.

Nebukadnetsara, hosi ya le Babilona u vitane vanhu vo tala lava xiximekaka leswaku va ta nkhinsamela xifaniso lexi a xi endleke. Wa ha ku heta ku byela vanhu hinkwavo a ku: ‘Loko mi twa mpfumawulo wa tinanga, tiharipa ni mixaka hinkwayo ya swichayachayana swa vuyimbeleri, mi fanele mi wela ehansi, mi gandzela xifaniso lexi xa nsuku. Kutani loyi a nga ta ka a nga weli ehansi a xi gandzela, hi nkarhi wolowo u ta hoxiwa ekheleni ra ndzilo lowu pfurhaka.’

Loko Nebukadnetsara a kuma leswaku Xadraka, Mixaka na Abedinigo a va xi gandzelanga, u hlundzuke ngopfu. U lerise leswaku va tisiwa eka yena. U tlhele a va nyika nkarhi wun’wana leswaku va xi gandzela. Kambe majaha lawa a ma tshemba Yehovha. Ma byele Nebukadnetsara ma ku: ‘Xikwembu xa hina lexi hi xi tirhelaka xa swi kota ku hi ponisa. Kambe, hambiloko xi nga hi ponisi, a hi nge xi nkhinsameli xifaniso xa wena xa nsuku.’

Loko Nebukadnetsara a twa sweswo, u lo nyanya ku hlundzuka. A ku ri ni khele ra ndzilo ekusuhi, hiloko a lerisa a ku: ‘Hlanganyetani khele ra ndzilo leswaku ri hisa hilaha ku phindhiweke ka nkombo eka ku hisa ka rona loku tolovelekeke!’ Kutani u byele vavanuna va matimba swinene evuthwini rakwe leswaku va boha Xadraka, Mixaka na Abedinigo, kutani va va hoxa ekheleni ra ndzilo. Khele rero a ri hisa ngopfu lerova vavanuna volavo va matimba va dlayiwe hi malangavi ya ndzilo. Kambe ku humelele yini hi majaha manharhu lawa va ma hoxeke kwalaho?

Loko hosi yi languta ekheleni, yi chave ngopfu. Yi vutise yi ku: ‘Xana a hi bohanga vavanuna vanharhu hi va hoxa ekheleni ra ndzilo lowu pfurhaka?’

Malandza yakwe ma hlamule ma ku: ‘Ina, a va ri vanharhu.’

Hiloko yi ku: ‘Kambe ndzi vona vavanuna va mune va famba-famba exikarhi ka ndzilo. A va bohiwanga naswona ndzilo a wu va hisi. Naswona lowa vumune u languteka ku fana ni xikwembu.’ Kutani hosi yi tshinela enyangweni wa khele ra ndzilo kutani yi huwelela yi ku: ‘Xadraka! Mixaka! Abedinigo! Humani mi ta laha, n’wina malandza ya Xikwembu Lexi nge Henhla-henhla!’

Kutani loko va huma, un’wana ni un’wana u swi vonile leswaku a va tshwanga. Hiloko hosi yi ku: ‘A ku dzunisiwe Xikwembu xa Xadraka, Mixaka na Abedinigo! Xi rhumele ntsumi ya xona kutani xi va ponisa hikuva va arile ku tirhela ni ku gandzela xikwembu xin’wana handle ka Xikwembu xa vona.’

Hakunene lexi i xikombiso lexinene xa ku tshembeka eka Yehovha lexi hi faneleke hi xi tekelela!

Eksoda 20:3; Daniyele 3:1-30.