Sathana ni madimona va ni tihanyi ni khombo. Eminkarhini ya khale Sathana u dlaye swifuwo ni malandza ya Yobo lowo tshembeka. Kutani a dlaya vana va khume va Yobo hi ku vanga “moya lowukulu” leswaku wu mbindzimuxa yindlu leyi a va ri eka yona. Endzhaku ka sweswo Sathana u be Yobo hi “marhumba layo vavisa, ku suka eminkondzweni ku fika enhlokweni.”​—⁠Yobo 1:​7-19; 2:⁠8.

Eminkarhini ya Yesu, madimona ma endle vanhu van’wana leswaku va va timbheveve ni mabofu. (Matewu 9:​32, 33; 12:​22) Ma xanise munhu un’wana naswona ma n’wi endla leswaku a tixekelela hi maribye. (Marka 5:⁠5) Nakambe ma endle mufana leswaku a huwelela, ma n’wi tlatlalata, naswona “ma n’wi rhurhumerisa hi matimba.”​—⁠Luka 9:​42, NW.

Namuntlha, Sathana ni madimona i vadlayi ku tlula rini na rini. Entiyisweni, ntirho wa vona lowo biha  wu andzile ku sukela loko va hlongoriwe etilweni va cukumeteriwa laha misaveni. Swiviko leswi humaka emisaveni hinkwayo swi kombisa tihanyi ta vona. Va xanisa vanhu van’wana hi mavabyi. Van’wana va va xanisa ni vusiku, va va tsona vurhongo kumbe va va vangela milorho leyi chavisaka. Van’wana va va karhata hi timhaka ta masangu. Naswona van’wana va va vangela ku hlangana nhloko, ku dlaya, kumbe ku tisunga.

Lintina, la tshamaka eSuriname, u hlamusela leswaku dimona, kumbe moya lowo biha, wu dlaye 16 wa swirho swa ndyangu wa ka vona ivi wu n’wi xanisa enyameni ni le miehleketweni ku ringana 18 wa malembe. Eka leswi a swi tokoteke u hlamusela leswaku madimona “ma tsakela ku xanisa vahlaseriwa va wona lava ma va vengaka ku fikela eku feni.”

Kambe Yehovha u kota ku sirhelela malandza yakwe eka minhlaselo ya Sathana.—Swivuriso 18:10.