Kambe hikwalaho ka yini Sathana ni madimona yakwe va tirha hi matimba swinene leswaku va kanganyisa vanhu? Hikuva va lava leswaku hi va joyina. Va lava leswaku hi va gandzela. Va lava leswaku hi pfumela mavunwa ya vona ni ku endla swilo leswi Yehovha a nga swi laviki. Swo tala swa swilo leswi swi katsa mikhuva leyi yelanaka ni vafi.

Rifu ra munhu loyi a a rhandziwa ra vava swinene, naswona swi fanerile leswaku hi va ni gome. Endzhaku ka rifu ra munghana wa yena Lazaro, Yesu ‘u ririle.’​—⁠Yohane 11:⁠35.

Ku ni swilo swo tala leswi fambisanaka ni nkosi ni rifu naswona swilo leswi swi hambana swinene hi ku ya hi matiko ni mindhavuko. Swo tala a swi lwisani ni misinya ya milawu ya Bibele. Hambiswiritano, swin’wana swi sekeriwe emhakeni ya leswaku vafi va swi kota ku vona lava hanyaka. Swo tanihi ku rila loku nga lawulekiki ni swilo swin’wana leswi endliwaka eminkosini leswi fambisanaka ni ku chava vafi. Kambe tanihi leswi vafi va nga ‘tiviki nchumu,’ lava va endlaka swilo swo tano va seketela vunwa bya Sathana.​—⁠Eklesiasta 9:⁠5.

Mikhuva kumbe swinkhubyana  swin’wana swa mihivahivana swi sukela eka loko vanhu va tshemba leswaku vafi va lava mpfuno wa lava hanyaka naswona loko ku nga endliwi leswi va swi lavaka va ta karhata lava hanyaka. Ematikweni man’wana swinkhubyana ni magandzelo swi endliwa endzhaku ka masiku ya 40 kumbe lembe munhu a file. Leswi ku khorwiwa leswaku swi pfuna vafi ku ‘tsemakanyela’ exivandleni xa moya. Swin’wana leswi tolovelekeke i ku nyika vafi swakudya ni swakunwa.

Swilo leswi swi hoxile hikuva swi seketela mavunwa ya Sathana mayelana ni vafi. Xana Yehovha wa tsaka loko hi endla swilo leswi seketelaka tidyondzo ta madimona? Doo!​—⁠2 Vakorinto 6:​14-⁠18.

Malandza ya Xikwembu xa ntiyiso a ma endli swilo leswi seketelaka mavunwa ya Sathana. Ku ri na sweswo, ma tinyiketela hi rirhandzu leswaku ma pfuna lava hanyaka ni ku va chavelela. Ma swi tiva leswaku loko munhu o lova, i Yehovha ntsena la nga kotaka ku pfuna munhu yoloye.​—⁠Yobo 14:​14, 15.

Vanhu van’wana va tihlanganisa ni madimona hi ku kongoma kumbe hi ku tirhisa mungoma. Leswi swi vuriwa vungoma. Migilo, vuloyi, masalamusi, ku vhumba ni ku vutisa hi ta vafi, hinkwaswo i mixaka ya vungoma.

Bibele yi ri: “Ku nga tshuki ku kumiwa munhu ni un’we ka wena . . . la hlahluvaka, ni mungoma, ni mulorhi, ni noyi, ni la vutisaka mimoya, ni la vhumbaka, ni la vutisaka vafi. Hikuva un’wana ni un’wana la endlaka swilo leswi, wa yila eka Yehovha.”​—⁠ Deteronoma 18:​10-⁠12.

Ha yini Yehovha a hi tsundzuxa swinene leswaku hi lwisana ni swilo leswi?

Leswaku hi hlayiseka, Yehovha u hi tsundzuxa ku fularhela mixaka hinkwayo ya vungoma. U rhandza vanhu a tlhela a va khathalela, naswona wa swi tiva leswaku lava va tirhisanaka ni madimona va ta xaniseka.

 Munhu un’wana wo tano a a ri Nilda, loyi a a ri mungoma le Brazil. Madimona ma nghenise vutomi bya yena enhlomulweni. Wa hlamusela: “Mimoya . . . yi ndzi lawurile, yi ndzi yingayingisa. Mikarhi yin’wana a ndzi nga etleli, mikarhi yin’wana a ndzi titivala, naswona a ndzi karhatiwa hi swiphiqo swa mianakanyo. Madimona ma ndzi karhate ngopfu lerova misiha ya mina yi kala yi khumbeka. Ndzi tirhise swidzidzirisi ivi ndzi sungula ku tshamela ku nwa ni ku dzaha. Leswi swi endleke ku ringana malembe yo tala.”

Hi ku famba ka nkarhi, hi ku pfuniwa hi Yehovha ni hi Timbhoni takwe leti kumekaka emisaveni hinkwayo, Nilda u ntshunxekile eka nkucetelo wa madimona naswona sweswi u hanya vutomi lebyinene. U ri: “Ndzi khutaza hinkwavo leswaku va nga tshuki ni kan’we, va tirhisana ni mimoya [leyo biha].”