Timotiya a ku ri makwerhu loyi a ha riki muntshwa evandlheni ra le Listra. Tata wakwe a a ri Mugriki naswona mana wakwe a a ri Muyuda. Mana wakwe Yunisi ni kokwa wakwe Luwisa, va dyondzise Timotiya hi Yehovha ku sukela loko a ha ri ntsongo.

Loko Pawulo a endzele eListra, eka riendzo rakwe ra vumbirhi ro chumayela, u xiye leswaku Timotiya a a rhandza vamakwerhu swinene naswona a a tiyimisele ku va pfuna. Pawulo u rhambe Timotiya leswaku a famba na yena eka riendzo rakwe. Hi ku famba ka nkarhi, Pawulo u letele Timotiya ku va muchumayeri lonene ni ku va mudyondzisi wa mahungu lamanene.

Moya lowo kwetsima wu kongomise Pawulo na Timotiya eka maendzo ya vona hinkwawo. Siku rin’wana nivusiku, wanuna un’wana u byele Pawulo exivonweni leswaku a ya eMakedoniya a ya va pfuna. Kutani Pawulo, Timotiya, Silasi na Luka va kongome kona leswaku va ya chumayela va tlhela va sungula mavandlha.

Vavanuna ni vavasati vo tala va ve Vakreste emutini wa Tesalonika lowu nga le Makedoniya. Kambe Vayuda van’wana va ve ni mavondzo eka Pawulo ni vanghana vakwe. Va hlengelete ntshungu kutani va kokakoka vamakwerhu lava va va yisa eka vafumi va muti, va ri karhi va huwelela va ku: ‘Vavanuna lava va lwisana ni mfumo wa Rhoma!’ Leswi vutomi bya Pawulo na Timotiya a byi ri ekhombyeni, va balekele eBeriya nivusiku.

Vanhu va le Beriya a va tiyimisele ku dyondza mahungu lamanene naswona Magriki ni Vayuda va kwalaho va ve vapfumeri. Kambe loko Vayuda van’wana lava humaka eTesalonika va tile naswona va vanga hasahasa, Pawulo u ye eAtena. Timotiya na Silasi va sale eBeriya leswaku va tiyisa vamakwerhu. Hi ku famba ka nkarhi, Pawulo u rhumele Timotiya eTesalonika leswaku a ya pfuna vamakwerhu ku tiyisela nxaniso lowukulu lowu a wu ri kona kwalaho. Endzhakunyana,  Pawulo u rhume Timotiya ku endzela mavandlha man’wana yo tala ni ku ma khutaza.

Pawulo u byele Timotiya a ku: ‘Lava lavaka ku tirhela Yehovha va ta xanisiwa.’ Timotiya u xanisiwile a tlhela a pfaleriwa ekhotsweni hikwalaho ka ripfumelo rakwe. A a tsakile ku kuma nkarhi wo kombisa leswaku u tshembekile eka Yehovha.

Pawulo u byele Vafilipiya a ku: ‘Ndzi rhumela Timotiya eka n’wina. U ta mi dyondzisa leswi swi vulaka swona ku famba entiyisweni naswona u ta mi letela ensin’wini.’ Pawulo a a n’wi tshemba Timotiya. Va tirhe swin’we tanihi vanghana tlhelo malandzakulobye malembe yo tala.