Wanuna loyi a a nga koti ku famba a a tshama egedeni ya tempele naswona a a kombela eka vanhu siku ni siku. Siku rin’wana ninhlikanhi u vone Petro na Yohane va ya etempeleni. U te: ‘Ndzi kombela mi ndzi nyika mali.’ Petro u te: ‘Ndzi ta ku nyika nchumu wun’wana wo antswa ku tlula mali. Hi vito ra Yesu, yima u famba!’ Petro u khome wanuna yoloye hi voko kutani a sungula ku famba! Vanhu lava va tsakisiwe hi singita rolero naswona vo tala va vona va ve vapfumeri.

Kambe vaprista ni Vasaduki a va hlundzukile. Va khome vaapostola va va yisa ehubyeni, kutani va ku: ‘I mani loyi a mi nyikeke matimba yo hanyisa wanuna loyi?’ Petro u te: ‘Hi kume matimba eka Yesu Kreste, loyi mi n’wi dlayeke.’ Varhangeri volavo va vukhongeri va huwelerile va ku: ‘Tshikani ku vulavula hi Yesu!’ Kambe vaapostola va te: ‘Hi fanele hi vulavula ha yena. A hi nge tshiki.’

Endzhaku ka loko Petro na Yohane va tshunxiwile, va ye eka vadyondzisiwa lavan’wana leswaku va ya va byela leswi endlekeke. Va khongele swin’we va kombela Yehovha va ku: ‘Hi kombela u hi pfuna hi va ni xivindzi leswaku hi kota ku ya emahlweni hi endla ntirho wa wena.’ Yehovha u va nyike moya wakwe lowo kwetsima naswona va ye emahlweni va chumayela ni ku hanyisa vanhu. Vanhu vo tala va ve vapfumeri. Vasaduki a va ri ni mavondzo lerova va pfalele vaapostola ekhotsweni. Kambe nivusiku Yehovha u rhumele ntsumi leyi pfuleke minyangwa ya khotso kutani yi byela vaapostola yi ku: ‘Tlhelelani etempeleni kutani mi fika mi dyondzisa.’

Hi mixo lowu landzelaka, huvo ya Sanedri leyi vumbiwaka hi varhangeri va vukhongeri, yi kume xiviko lexi nge: ‘Khotso ra ha lotleriwile, kambe vavanuna lava a mi va pfalerile a va kona! Va le tempeleni naswona va le ku dyondziseni ka vanhu!’ Vaapostola va tlhele va khomiwa naswona va yisiwe eka huvo ya  Sanedri. Muprista lonkulu u te: ‘Hi mi byerile leswaku mi nga ha vulavuli hi Yesu!’ Kambe Petro u te: “Hi fanele hi yingisa Xikwembu ku tlula vanhu.”

Varhangeri va vukhongeri a va hlundzuke ngopfu lerova a va lava ku dlaya vaapostola volavo. Kambe Mufarisi loyi a vuriwaka Gamaliyele u te: ‘Tivoneleni! Swi nga endleka Xikwembu xi ri ni vavanuna lava. Xana mi lava ku lwisana ni Xikwembu?’ Va yingise xitsundzuxo xakwe. Endzhaku ka loko va be vaapostola va tlhela va va byela leswaku va tshika ku chumayela va va tshunxile. Kambe sweswo a swi va tshikisanga vaapostola. Va ye emahlweni va chumayela mahungu lamanene hi xivindzi etempeleni ni hi yindlu ni yindlu.