DYONDZO 22
Singita Leri Endlekeke eLwandle Ro Tshwuka
Loko Faro a twa leswaku Vaisrayele va fambile Egipta, u tisorile hileswi a va tshikeke va famba. U byele masocha yakwe a ku: ‘Lunghiselelani makalichi ya mina hinkwawo ya nyimpi, hi va hlongorisa! A hi nga fanelanga hi va tshike va famba.’ Kutani yena ni vavanuna vakwe va sungule ku hlongorisa Vaisrayele.
Yehovha a a kongomisa vanhu vakwe hi ku tirhisa papa ninhlikanhi kasi nivusiku a a tirhisa ndzilo. U va kongomise eLwandle ro Tshwuka naswona u va byele leswaku va dzima mixaxa.
Kutani Vaisrayele va vone Faro ni masocha yakwe va ri karhi va va hlongorisa. Va tikume va ri exikarhi ka lwandle ni masocha ya Vaegipta, ku nga ha ri na lexi a va ta xi endla. Va rilele Muxe va ku: ‘Hi ta fa! A wu fanele u hi tshike Egipta.’ Kambe Muxe u te: ‘Mi nga chavi. Yimani mi vona ndlela leyi Yehovha a nga ta hi ponisa ha yona.’ Muxe a a tshemba Yehovha hi mbilu yakwe hinkwayo, a hi swona?
Yehovha u byele Vaisrayele leswaku va hahlula mixaxa. Hi vusiku byebyo, Yehovha u endle leswaku ku va ni papa exikarhi ka Vaegipta ni Vaisrayele. Etlhelo ra Vaegipta a ku ri ni munyama. Kambe etlhelo ra Vaisrayele a ku ri ni ku vonakala.
Yehovha u byele Muxe leswaku a tshambulutela voko rakwe elwandle. Kutani Yehovha u endle leswaku ku va ni moya wa matimba vusiku hinkwabyo. Lwandle ri avanile kutani ku va ni ndlela exikarhi ka rona. Vaisrayele va timiliyoni a va famba endhawini leyi omeke exikarhi ka lwandle.
Loko masocha ya Faro ma vona Vaisrayele va famba exikarhi ka lwandle, ma va sale endzhaku. Hiloko Yehovha a endla leswaku masocha wolawo ma pfilunganyeka. Makalichi ya wona ma sungule ku hlomuka mavhilwa. Masocha wolawo ma huwelerile ma ku: ‘A hi va tshikeni! Yehovha u le ku va lweleni.’
Yehovha u byele Muxe a ku: ‘Tshambulutela voko ra wena elwandle.’ Hi ku hatlisa mati ya lwandle ma funengete masocha ya Vaegipta. Faro swin’we ni masocha yakwe hinkwawo va file. A ku ponanga munhu.
Eribuweni ra lwandle, vanhu vo tala swinene a va ri karhi va dzunisa Xikwembu hi risimu va ku: “Yimbelelela Yehovha, hikuva u hlule hi ndlela yo hlamarisa. U hoxe hanci ni mugadi wa yona elwandle.” Loko vanhu va ri karhi va yimbelela, vavasati a va chaya swingomana va tlhela va cina. Hinkwavo a va tsakile hileswi a va tshunxiwile.
“Leswaku hi ta va ni xivindzi xo vula hi ku: ‘Yehovha i mupfuni wa mina; a ndzi nge chavi. Xana munhu a nga ndzi endla yini?’”—Vaheveru 13:6
U Nga Ha Tsakela
TIDYONDZO TA SWIFANISO
Ku Ponisiwa eLwandle Ro Tshwuka
Dirowa swilo leswi kayivelaka ivi u penda xifaniso.
TIDYONDZO TA VUGANDZERI BYA NDYANGU
Yehovha A Ponisa Vaisrayele
Hlawula tidyondzo ta ndyangu leti sekeriweke eka mhaka ya le Bibeleni leyi nga ni swifaniso.
BIBELE—YI TAMELE RUNGULA RIHI?
Xikwembu Xi Kutsule Vaisrayele
Xikwembu xi n’wi tirhise njhani Muxe ku ntshunxa Vaisrayele evuhlongeni aEgipta? Paseka a yi tlangeriwa hi xivangelo xihi?
