Mahungu ya muti wa Yeriko ma fike ni le matikweni man’wana ya le Kanana. Tihosi ta wona ti endle xiboho xo hlengeletana leswaku ti lwa ni Vaisrayele. Kambe Vagibiyoni va te ni kungu rin’wana. Va ye eka Yoxuwa va ambale swiambalo swo hlakala kutani va ku: ‘Hi huma etikweni ra le kule. Hi twe hi Yehovha ni swilo hinkwaswo leswi a mi endleleke swona le Egipta ni le Mowabu. Hi tshembiseni leswaku a mi nge hi hlaseli naswona hi ta va malandza ya n’wina.’

Yoxuwa u va tshembile kutani a pfumela leswaku a nge va hlaseli. Endzhaku ka masiku manharhu, u kume leswaku a va nga humi etikweni ra le kule. A va huma etikweni ra Kanana. Yoxuwa u vutise Vagibiyoni a ku: ‘Ha yini mi hi hemberile?’ Va te: ‘A hi chava! Ha swi tiva leswaku Yehovha Xikwembu xa n’wina wa mi lwela. Ha mi kombela, mi nga hi dlayi.’ Yoxuwa u hlayise xitshembiso xakwe kutani a nga va dlayanga.

Swi nga si ya kule, tihosi ta ntlhanu ta Vakanana ni masocha ya tona ti xungete Vagibiyoni. Yoxuwa ni masocha yakwe va fambe  vusiku hinkwabyo leswaku va ya va ponisa. Nyimpi yi sungule nimixo hi siku leri landzelaka. Vakanana va sungule ku balekela ematlhelo hinkwawo. Kun’wana ni kun’wana laha a va tsutsumela kona Yehovha a a endla leswaku va weriwa hi maribye lamakulu ya xihangu. Kutani Yoxuwa u kombele Yehovha leswaku a endla dyambu ri yima. Ha yini a kombele Yehovha ku endla tano hikuva dyambu a ri nga si tshama ri yima? Hikuva Yoxuwa a a tshemba Yehovha. Dyambu a ri pelanga siku hinkwaro kukondza Vaisrayele va hlula tihosi ta Vakanana ni masocha ya tona.