SIERRA LEONE NA GUINEA
A Va Tirhisa Beji Tanihi “Pasi Ro Endza”
“HI 1987, vapfhumba vo tlula 1 000 va ye eka Ntsombano wa Muganga lowu a wu ri ni nhloko-mhaka leyi nge ‘Tshemba Yehovha’ leyi a yi khomeriwe eGuékédou, le Guinea. Tanihi leswi ndhawu leyi ntsombano a wu khomeriwa eka yona a yi ri ekusuhi na ndzilakano wa Sierra Leone na Liberia, vapfhumba vo tala va le matikweni lawa va teke xiboho xo sukela emakaya ya vona siku na siku. Hambiswiritano, a va nga ri na maphepha lama fanelekaka yo hundza endzilakaneni. Kutani vamakwerhu lava nga ni vutihlamuleri va vulavurisane ni valawuri va le mindzilakaneni laha va fikeleleke ntwanano wo karhi. Vapfhumba a va fanele va tirhisa tibeji ta vona ta ntsombano! Loko maphorisa ya le ndzilakaneni ma vona tibeji ta muhlovo wa xilamula, hi ku hatlisa a ma va tshika va hundza.”—Everett Berry, khale ka murhumiwa.