Hi October 20, 2012, Timbhoni ta Yehovha ta le Korea a ti tsakile loko ku nyiketeriwa miako ya tona ya rhavi leyi pfuxetiweke ni leyi ya ha ku akiwaka eka Yehovha. Xiendlakalo lexi a xi ri xa nkoka eka vamakwerhu hikuva a va kota ku tsundzuka ntirho wa vona lowu va wu endleke hi ku tshembeka eka malembe ya 100 lama hundzeke. Ku tlula kwalaho hi 2012, a ku ri ro sungula nhlayo ya vahuweleri yi hundza 100 000. Vatirhi va ku tirhandzela va kwalaho va kwalomu ka 1 200 ni malandza ya le matikweni yo hambana-hambana ya 239 ni vatirhi va ku tirhandzela vo huma ematikweni ya kaye va tirhe ku aka muako lowuntshwa wo tshama eka wona, wo gandlisela eka wona, wo rhekhodela eka wona ni garaji yo lunghisela timovha. Ku engetela kwalaho, yo tala ya miako leyi nga kona yi lo pfuxetiwa.

Anthony Morris, loyi a nga xirho xa Huvo leyi Fumaka, u nyikele nkulumo leyi khutazaka ya ku nyiketela miako eka vamakwerhu va 3 037 lava a va ri kona. Hi siku leri landzelaka, ku khomiwe nhlengeletano yo hlawuleka eholweni leyikulu naswona mavandlha yo tlula 1 300 ya le Korea a ma yi hlalele eka  Internet. Timbhoni ta Yehovha ta 115 782 swin’we ni vanhu lava tsakelaka va tiphine hi nongonoko wo tsakisa wa swakudya swa moya.

Siku ra March 9, 2013, ri ta tekiwa tanihi leri nga rivalekiki ematin’wini ya vagandzeri va Yehovha ku ringana nkarhi wo leha le Liberia. Vaendzi vo huma ematikweni ya 11 a va hlengeletanile loko ku nyiketeriwa rhavi leri pfuxetiweke ni leri ndlandlamuxiweke. Hinkwavo a va tsakile loko va twa nkulumo yo nyiketela miako leyi nyikeriweke hi Guy Pierce, loyi a nga xirho xa Huvo leyi Fumaka. Endzhaku ka loko ku hundze malembe yo tlula khume nyimpi ya xin’wana-manana yi kavanyete ku hleriwa ni ku akiwa, rhavi ri ndlandlamuxiwile laha ku katsiweke ndhawu leyi eku sunguleni a yi tirhisiwa hi vaxandzuki tanihi ndhawu yo tumbela eka yona ni kampa ya vahlapfa. Swirho swa 51 swa ndyangu wa Bethele swi tiphina hi ku tirhisa makamara ya 35 yo tshama eka wona, muako wa tihofisi lowu pfuxetiweke, muako lowuntshwa lowu eka wona ku hlayisiwaka minkandziyiso leyi lavaka ku rhumeriwa, muako lowuntshwa wo lunghisela swilo leswi onhakeke, muako lowuntshwa wo swekela eka wona ni kamara ro dyela eka rona.

 Riphabliki ra Georgia i ndhawu leyi nga ni vanhu lava nga ni rirhandzu, lava rhandzaka swilo swa moya. Endzhaku ka loko ri nga ha fumiwi hi Soviet Union, nkarhi lowu nga tolovelekangiki wa ku ndlandlamuka ka swilo swa Yehovha, wu landzeriwe hi nkarhi wa nxaniso lowukulu. Nkaneto wu herile kutani ku va ni xiendlakalo lexikulu lexi nga rivalekiki ematin’wini ya Timbhoni ta Yehovha eGeorgia hi Mugqivela, April 6, 2013, loko David Splane wa Huvo leyi Fumaka a nyikela nkulumo ya ku nyiketela rhavi leri pfuxetiweke ni leri ndlandlamuxiweke, Holo ya Tinhlengeletano ni muako lowuntshwa wa Xikolo Xa Vachumayeri Va Mfumo swin’we ni Xikolo Xa Valanguteri Va Swifundzha Ni Va Miganga Swin’we Ni Vasati Va Vona. Vaendzi va 338 vo huma ematikweni ya 24 va hlangane ni Timbhoni to tlula 800 ta le Georgia eka nongonoko wo nyikela miako.

Hi siku leri landzelaka, vamakwerhu va 15 200 va tiphine hi nkulumo yo hlawuleka ya Makwerhu Splane leyi a va yi yingisela ni ku yi hlalela eka Internet emavandlheni hinkwawo ya le Georgia. Xiendlakalo lexi, lexi eka xona a ku ri ni vamakwerhu vo huma ematikweni yo hambana-hambana a xi ri lexi khutazaka swinene eka vo tala. Makwerhu un’wana loyi a ha riki muntshwa u te: “Sweswi se ndza swi tiva leswaku ku ta va ku ri njhani emisaveni leyintshwa.”

Hi June 29, 2013, ku nyiketeriwe muako lowuntshwa wa tihofisi lowu nga ni swithezi swinharhu eBethele ya le Yangon, le Myanmar. Guy Pierce loyi a nga xirho xa Huvo leyi Fumaka u nyikele nkulumo ya ku nyiketela miako eka vayingiseri va 1 013 lava katsaka vaendzi va 11 vo huma ematikweni man’wana. Ntlawa wa vamakwerhu va le Myanmar lava averiweke ku amukela vaendzi eRivaleni ra Swihaha-mpfhuka ra le Yangon wu tshineleriwe hi wanuna wo huma etikweni leri ntirho wa Timbhoni ta Yehovha wu yirisiweke. U kombetele eka mimfungho leyi nge “Timbhoni Ta Yehovha Ta Amukeriwa” leyi a wu yi khomile kutani a vutisa a ku, “Xana mi amukela timbhoni leswaku ti ya eku tengisiweni ehubyeni?” Wu hlamule wu ku:  “Doo, hi amukela vanghana va hina.” Wanuna yoloye u vutise a ku: “Yehovha loyi i mani?” Handle ko kanakana, vamakwerhu va n’wi chumayerile. Hi siku leri landzelaka endzhaku ka nongonoko wa ku nyiketela miako, ku khomiwe nhlengeletano yo hlawuleka eHolweni ya Mintsombano ya le Myanmar, laha Makwerhu Pierce a vulavuleke hi nhloko-mhaka leyi nge “Tirhela Yehovha Hi Mbilu Leyi Twisisaka.” Ku endliwe leswaku vamakwerhu va le tindhawini tin’wana ta tsevu ta le Myanmar, va kota ku wu yingisela hi riqingho leswi endleke leswaku vamakwerhu va 2 963 va twa rungula ra nongonoko leri fikeke hi nkarhi. Un’wana wa vachayeri va tibazi loyi a yiseke ntlawa wa vamakwerhu va kwalaho enhlengeletanweni yo hlawuleka ya le Yangon u te: “Ndza swi xiya leswaku n’wina mi hambane hi ku helela ni vanhu va vukhongeri lebyin’wana. Mi ni mahanyelo lamanene, mi ambala kahle naswona mi ni musa swinene. Se ndzi ni malembe yo tala ndzi ri karhi ndzi chayela tibazi kambe a ndzi si tshama ndzi vona vanhu lava nga ni mahanyelo yo fana ni ya n’wina!”

Malandza yo tshembeka ya Yehovha ya le Moldova ma ve ni xivangelo lexinene xa ku tsaka hi Ravunharhu, July 3, 2013,  loko Stephen Lett loyi a nga xirho xa Huvo leyi Fumaka a nyikela nkulumo yo nyiketela miako leyintshwa leyi ndlandlamuxiweke ya rhavi. Miako leyi ndlandlamuxiweke yi katsa muako wa swithezi swinharhu lowu nga ni vuhlayiselo bya tibuku ni makamara ya khume yo tshama eka wona swin’we ni Holo ya Mfumo leyi nga ni swithezi swimbirhi leyi tirhisiwaka hi mavandlha ya nkombo. Swirho swa 33 swa ndyangu wa Bethele wa le Moldova a swi tsakile loko swi amukela vaendzi vo huma eJarimani, Ireland, Netherlands, Romania, Rhaxiya, Ukraine ni le United States. Nakambe van’wana lava veke kona i vamakwerhu vo hlayanyana lava tirheleke Yehovha hi ku tshembeka loko ntirho wa ha yirisiwile, lava van’wana va vona va pfuneteke ku kopa ni ku fambisa minkandziyiso hi nkarhi wolowo. Exikarhi ka lava veke kona a ku ri ni vo tala lava rhumeriweke ni vatswari va vona eSiberia hi nkarhi wa matsima yo hambana-hambana yo lwisana ni Timbhoni ta Yehovha ekhale ka mfumo wa Soviet Union. Hi Sonto, Makwerhu Lett u nyikele nkulumo leyi khutazaka leyi tolokiweke hi Xiromania ni Xirhaxiya eka vayingiseri va 14 705—ku nga nhlengeletano leyikulu ya Timbhoni ta Yehovha leyi nga si tshamaka yi va kona eMoldova.

Yesu u kandziyise leswaku hi fanele hi ‘khongela hi nga tshiki.’ (Luka 18:1) Loko mi tiphofula eswikhongelweni swa n’wina, mi tiyisa ntshembo wa n’wina. Hikokwalaho, “khongelani minkarhi hinkwayo,” ina “mi phikelela exikhongelweni.” (1 Tes. 5:17; Rhom. 12:12) Loko mi endla tano “onge Xikwembu xa ku rhula . . . xi nga mi hlomisa hi xilo xin’wana ni xin’wana lexinene leswaku mi endla ku rhandza ka xona, xi endla eka hina leswi tsakisaka swinene emahlweni ka xona ha Yesu Kreste.”—Hev. 13:20, 21.