Hi 2005, rhavi ri avele makwerhu Tin Wa Ng wa le Bethele loyi a vulavulaka Xichayina, leswaku a va phayona ro hlawuleka a ya chumayela Machayina yo tala lama tshamaka kwalaho tikweni. U velekiwe eDominican Republic a tlhela a kulela kona. Vatswari vakwe va suke eChayina va rhurhela eSanto Domingo.

Hi January 1, 2008, ku simekiwe vandlha ra Xichayina xa Mandarin eSanto Domingo, ivi hi 2011 ku sunguriwa ntlawa eSantiago. Vahuweleri va 70 ku katsa ni maphayona ya nkarhi hinkwawo ya 36 swin’we ni maphayona ya nkarhinyana, hi xiringaniso va fambisa tidyondzo ta Bibele ta 76 n’hweti ni n’hweti.

Hi 2007, a ku ri ni vahuweleri va 27 466 lava hlanganyeleke ensin’wini emavandlheni ya 376 naswona ku fambisiwe tidyondzo ta Bibele ta 49 795. Hambiswiritano, a ku nga ri na vandlha ro ringana vanhu lava vulavulaka Xinghezi. Kutani, hi April 2008, rhavi ri avele Donald na Jayne Elwell lava nga varhumiwa leswaku va ya eSanto Domingo va ya sungula ntlawa wa vanhu lava vulavulaka Xinghezi. Ntlawa lowutsongo kambe lowu hisekaka wa vahuweleri wu sungule ku lavisisa tindhawu leti vanhu lava vulavulaka Xinghezi a va tshama eka tona. Kutani va hlele nsimu leswaku va ta kota ku chumayela hi rixaladza.

Hikwalaho ka matshalatshala wolawo, ntlawa wa Xinghezi eSanto Domingo wu hambete wu andza naswona hi July 2009 ku simekiwe vandlha leri nga ni vahuweleri va 39. Ku endliwe leswi fanaka ni le tindhawini tin’wana ta tiko. Hi November 2011, a ku ri ni mavandlha ya nkombo ya Xinghezi ni ntlawa wun’we etikweni rero.

Lorys, loyi a nga ni vuvabyi bya Usher Syndrome lebyi endlaka leswaku munhu a nga twi ni ku tlhela a nga voni hi ku famba ka nkarhi, u kule a ri hava vatswari. U velekiwe a nga twi naswona u sungule ku ka a nga ha voni kahle loko a ri ni malembe ya 16. A vonanyana ninhlikanhi kambe nivusiku a nga voni hi ku helela. Ndlela yin’we ntsena leyi a yi tirhisa leswaku a kota ku vulavurisana ni van’wana loko ri perile a a vulavula hi ku tirhisa mavoko.

Mpatswa lowu nga maphayona yo hlawuleka wu hlangane na Lorys loko a ri ni malembe ya 23. Hi nkarhi wolowo, a tshama ni wanuna loyi a nga twiki swin’we ni n’wana wa vona wa nhwanyana loyi a nga ni lembe rin’we loyi yena a twaka. Lorys u pfumerile loko a rhambiwa ku ya eminhlanganweni ya vandlha naswona u tsakisiwe hileswi a swi dyondzeke.

Hi ku hatlisa Lorys u endle ku cinca evuton’wini byakwe. Hi  xikombiso, loko a dyondze leswaku swi hoxile ku tshama ni nuna wakwe va nga tekananga, u burisane na yena hi nkoka wa ku tsarisa vukati bya vona hi nawu naswona u vule leswaku a nge yi honisi milawu ya Bibele ya mahanyelo. Hikwalaho ko hlamarisiwa hi xivindzi lexi a veke na xona, u pfumerile ku n’wi teka.

Endzhaku ka loko va tekanile, Lorys u ve muhuweleri naswona endzhakunyana ka nkarhi u khuvuriwile. Hi nkarhi wolowo, hikwalaho ko dyondza ni Timbhoni, u dyondze  Ririmi ra Mavoko ra le Amerika. Ku sukela kwalaho, u sungule ku pfuna n’wana wakwe wa nhwanyana leswaku a dyondza Ririmi ra Mavoko ra le Amerika naswona u le ku n’wi dyondziseni ka ntiyiso.

Siku ra Ravumbirhi ra January 12, 2010, ri ta tshama ri ri karhi ri tsundzukiwa hi vanhu va le Dominican ni va le Haiti. Rolero i siku leri ku tsekatseka ka misava loku chavisaka ku hlaseleke eHaiti. Hi ku hatlisa, Huvo leyi Fumaka ya Timbhoni ta Yehovha yi nyike rhavi ra le Dominican Republic mpfumelelo wo yisa mali erhavini ra le Haiti leswaku ri phalala. Tanihi leswi mali leyi a yi fanele yi yisiwa a yi tele, Evan Batista loyi a nga dokodela ra le Bethele loyi a leheke timitara ta 1,90 a tlhela a tika tikhilogiramu ta 127 u averiwe ku yisa mali yoleyo.

Xiboho xo rhumela Makwerhu Batista xi tikombe xi ri lexi pfunaka hikuva loko a fika endzilakaneni, u byeriwe leswaku  ku ni xilaveko lexikulu xa madokodela lama nga ni ntokoto. Vanhu vo tala lava vavisekeke swinene hikwalaho ka ku tsekatseka ka misava a va yisiwe eHolweni ya Tinhlengeletano leyi nga etlhelo ka rhavi ra le Haiti leswaku va ta tshunguriwa. Loko vamakwerhu va le Haiti va xiya leswaku munhu loyi a rhumiweke a ku ri dokodela ra le rhavini, va bele rhavi ra le Dominican Republic riqingho kutani va kombela loko swi ta koteka leswaku Makwerhu Batista a hambeta a tshama eHaiti. Va nyikiwe mpfumelelo naswona ku sunguriwe mphalalo lowukulu leswaku ku pfuniwa vamakwerhu va hina va moya eHaiti—endzhakunyana ka tiawara ti nga ri tingani ku ve ni ku tsekatseka ka misava.

Hi ku hatlisa Ndzawulo yo Xava ya le Dominican Republic yi vulavurisane ni vanhu lava a yi xava eka vona swakudya nkarhi na nkarhi. Hikwalaho, ku rhumeriwe rhayisi yo tlula tikhilogiramu ta 6 800 ni tinyawa swin’we ni swakudya swin’wana swa xisekelo eHaiti hi 2:30 nimixo hi Ravumune, January 14—kahle-kahle lowu i mphalalo wo sungula lowu rhumeriweke lowu nga rhanga wu fika endzilakaneni lowu humaka etikweni rin’wana. Endzhakunyana hi siku rero, madokodela manharhu lama engetelekeke lama humaka eDominican Republic ma teke riendzo ro leha leri tekeke tiawara ta nkombo leswaku ma ya erhavini ra le Haiti. Loko ma fika a ku ri nimadyambu, kambe ematshan’weni ya leswaku ma ya laha ma etlelaka kona, ma kongome eka vanhu lava vavisekeke kutani ma tirha kukondza ku va vusiku swinene. Hi siku leri landzelaka, ku fike madokodela man’wana ya mune swin’we ni vaongori va mune lava humaka eDominican Republic. Vuhandzuri a byi endliwa ehansi ka swiyimo swo tika, laha a va cincana ku endla vuhandzuri ekamareni leri endleriweke ku endla vuhandzuri eHolweni ya Tinhlengeletano. Eka vhiki leri landzeleke, vanhu lava va 12 va tshungule vanhu vo tlula 300 lava a va vavisekile.

Siku ni siku a ku yisiwa vanhu lava vavisekeke swinene eDominican Republic leswaku va ya tshunguriwa. Minkarhi  yin’wana, timovha leti a ti yisa mphalalo eHaiti a ti tsutsumisela vanhu lava vavisekeke eswibedlhele swo hambana-hambana leswi nga etikweni hinkwaro ra le Dominican Republic. Rhavi ri hlele Mintlawa yo Endzela Vavabyi leswaku yi khutaza vanhu lava vavisekeke ni ku tiyisekisa leswaku va kuma mirhi swin’we ni mphakelo. Mavandlha ya kwalaho a ma nyika swirho swa ndyangu leswi heleketeke varhandziwa va swona lava vavisekeke swakudya swin’we ni byetlelo.

Matshalatshala lamakulu ni yo pfumala vutianakanyi ya vanhu va Yehovha hi nkarhi wa mhangu leyi ma fambisana kahle ni marito lama khutazaka lama nga eka Swivuriso 17:17, lama nge: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” Mintokoto leyi yi kombisa leswaku Yehovha hi ku tirhisa moya wakwe ni vun’we bya Vukreste, u khathalele malandza yakwe yo tshembeka hambi loko ma langutane ni rifu. Ntirho lowukulu wo phalala wu hambete wu endliwa ku ringana tin’hweti to hlaya. Timbhoni ta Yehovha ti rhumele tikhilogiramu to tlula 450 000 ta swilo leswi nyikeriweke, ku katsa ni swakudya leswi nga dyiwaka hi vanhu va 400 000. Ku te vamakwerhu va kwalomu ka 78 lava nga madokodela lava humaka etindhawini to hambana-hambana ta misava kutani va nyikela hi nkarhi ni vuswikoti bya vona mahala ku katsa ni vatirhi van’wana va ku tirhandzela va ntsandza-vahlayi. *