LOKO ndza ha ri muntshwa, a ndzi hela matimba loko ndzi ehleketa hi rivengo leri vukhongeri byi ri kombiseke eka malembe lama hundzeke. Nakambe a ndzi nga swi twisisi leswaku ha yini Xikwembu xi nga byi herisi vusweti ni vuhomboloki ni leswaku ha yini vanhu vo tala lava nghenaka kereke va nga endli leswi Bibele yi swi vulaka. Kutani ndzi sungule ku ka ndzi nga ha pfumeli leswaku Xikwembu xi kona, ndzi tshemba leswaku i vanhu va tipolitiki lava pfukelaka mfumo ntsena lava nga lulamisaka misava.

Hi 1962, ndzi sungule ku hlaya magazini wa Xalamuka! Kutani hi 1963, ndzi pfumele ku dyondza Bibele ni Timbhoni ta Yehovha. Leswi ndzi swi dyondzeke swi ndzi khumbe swinene. Ndzi sungule ku twisisa leswaku Xikwembu a xi nga fanelanga xi soriwa hikwalaho ka nsele lowu a wu endliwa hi mintlawa yo hambana-hambana ya vukhongeri ni leswaku xi ni xikongomelo lexinene hi vanhu. Endzhaku ka tin’hweti timbirhi loko ndzi  ta va ndzi dyondzeriwe ro sungula, ndzi sungule ku byela van’wana leswaku Mfumo wa Xikwembu wu ta herisa mafambiselo lawa ya swilo yo homboloka. Ndzi khuvuriwe hi 1964 naswona ndzi hlawuriwe ku va phayona ro hlawuleka hi 1966. Ndza pfumela leswaku ntiyiso wu ponise vutomi bya mina, hikuva vantshwa vo tala lava rhandzaka tinyimpi lava a ndzi ri munghana wa vona va file, van’wana va khomiwile kasi van’wana va boheke ku baleka etikweni. Ndzi nkhensa Yehovha leswi a ndzi hundzuleke ndzi nga ha vi munhu loyi a nga pfumeriki leswaku Xikwembu xi kona naswona a nga riki na ntshembo kambe ndzi va nandza wa Xikwembu lexi tshembisaka misava leyintshwa yo lulama.