Borbonio Aybar u khuvuriwe hi January 19, 1955, loko ntirho wo chumayela wa ha yirisiwile. Endzhaku ka loko a khuvuriwile u fambise tidyondzo to tala ta Bibele eMonte Adentro ni le Santiago. Loko ku yirisiwa ku herisiwile hi 1956, swin’wana swa swichudeni swakwe swi khuvuriwile, ku katsa ni nsati wakwe.

Exikarhi ka July 1957, vatirhela-mfumo va hlangane eSalcedo leswaku va ya vulavula ku biha hi Timbhoni. Makwerhu Aybar u te: “Francisco Prats-Ramírez a ku ri yena xivulavuri lexikulu. Prats-Ramírez u te, ‘Hi masiku ma nga ri mangani ntsena ti ta dlayiwa.’” Endzhakunyana ka masiku ma nga ri mangani hi July 19, 1957, maphorisa ma hlengelete Timbhoni ta Yehovha hinkwato le Blanco Arriba, El Jobo, Los Cacaos ni le Monte Adentro.

Makwerhu Aybar u ri: “A ndzi ri un’wana wa lava khomiweke. Hi yisiwe entsindza wa masocha le Salcedo. Xikan’we-kan’we loko hi fika kwale, ndhuna ya masocha leyi vitaniwaka Saladín yi ndzi bile. Mahlo ya yona a ma tele hi vukarhi loko yi ri karhi yi hi xungeta. Kutani hi forisiwe tilayeni timbirhi, yin’wana ya vavanuna kasi leyin’wana ya vavasati. Varindzi va sungule ku rahetela ni ku ba vavanuna kutani va himetela vavasati hi tinhonga ta vona, hinkwavo va ri karhi va ku, ‘Ndzi Mukhatoliki naswona ndza dlaya.’”

Makwerhu Aybar u rihisiwile a tlhela a gweviwa ku tshama ekhotsweni ku ringana tin’hweti tinharhu. U ye emahlweni a ku: “Hi nkarhi lowu a hi khomiwile, ndhuna ya nyimpi leyi vuriwaka Santos Mélido Marte, yi hi endzerile. Yi hi byele leswi: ‘Ndzi hlaye Bibele naswona ndza swi tiva leswaku Yehovha i Xikwembu. A mi endlanga nchumu lexi endlaka mi faneriwa hi ku gweviwa ku tshama ekhotsweni,  kambe ku hava lexi ndzi nga mi pfunaka ha xona hikuva vabixopo va Khatoliki hi vona lava hlohlotelaka leswaku mi khomiwa. Vanhu lava nga hungutaka xigwevo xa n’wina i vabixopo volavo kumbe jefe (“boso,” Trujillo).’”

Exikarhi ka lava khomiweke a ku ri ni n’wana wa nhwanyana ni ntukulu wa Fidelia Jiménez, lava hinkwavo ka vona va hlayeke na yena. Hambileswi eku sunguleni Fidelia a nga khomiwanga, u tiyise eka valawuri leswaku va n’wi pfalela ku endlela leswaku a ta khutaza lava ana se a va ri ekhotsweni. Hi nkarhi wolowo, ndhuna ya nyimpi leyi vuriwaka, Ludovino Fernández, loyi a tiviwa hi ku va a tikurisa ni ku va ni tihanyi, u endze ximfumo ekhotsweni. U lerise leswaku Fidelia a tisiwa eka yena kutani a n’wi vutisa a ku, “Xana hi wena boso ya kona?”

Fidelia u hlamule a ku: “Doo! N’wina hinkwenu mi tiboso.”

Fernández u te: “Kahle-kahle u mufundhisi.”

Fidelia u hlamule a ku: “Doo! Yesu hi yena mufundhisi.”

Fernández u vutise a ku: “Xana a hi wena u endleke leswaku vanhu lava hinkwavo va khomiwa? Hi wena u va dyondziseke a hi swona ke?”

Fidelia u te: “Doo! Bibele hi yona yi endleke leswaku vanhu lava va khomiwa. Va endla leswi va swi dyondzeke eBibeleni.”

Kutani, vamakwerhu vambirhi lava na vona a va khomiwile, ku nga Pedro Germán na Negro Jiménez, loyi a a ri muzala wa Fidelia, va hundze hi le phasejini. A va susiwa exitokisini lexitsongo lexi a va pfaleriwe va ri voxe kutani va yisiwa exitokisini lexi tolovelekeke. Hembe ya Negro a yi ri ni ngati leyi se a yi omile naswona tihlo ra Pedro a ri pfimbe swinene. Hi ku vona leswaku a va biwe hi ndlela ya tihanyi, Fidelia u vutise ndhuna ya nyimpi a ku, “Xana leyi hi yona ndlela leyi mi va khomaka ha yona vanhu lavanene, lava  tshembekeke ni lava chavaka Xikwembu?” Hi ku xiya leswaku a nge swi koti ku n’wi chavisa, Fernández u lerise leswaku Fidelia a tlheriseriwa exitokisini.

Malandza yo tshembeka ya Yehovha a ma fanele ma va ni xivindzi loko ma langutana ni nkaneto wo tano wa tihanyi—kutani ma xi kombisile! Hambi ku ri vatirhela-mfumo va swi xiyile sweswo. Hi xikombiso, hi July 31, 1957, Luis Arzeno Colón, mukamberi wa presidente, u tsalele matsalana wa tiko, a ku: “Hambileswi nawu lowu vuriweke sweswinyana hi Vandla ra Tiko wu yiriseke ntirho wa vukhongeri wa mpambukwa lowu tivekaka tanihi Timbhoni ta Yehovha, swirho swo tala swa wona swa ha ya emahlweni handle ko chava.”