Yehovha u katekise ntirho wa malandza yakwe eDominican Republic. Hi xiringaniso, hi 1994 a ku ri ni vahuweleri va Mfumo va 16 354 emavandlheni ya 259. Hikwalaho ka ku andza  loku, loku tsakisaka, a ku ri ni xilaveko lexi engetelekeke xa vakulu lava nga ni vuswikoti ni malandza ya vutirheli. Hi lembe rero, Huvo leyi Fumaka yi nyike mpfumelelo wa leswaku ku va ni Xikolo xa Ndzetelo wa Vutirheli eDominican Republic, lexi sweswi xi siviweke hi Xikolo xa Vachumayeri va Mfumo.

Hi October 2011, swichudeni swa kwalomu ka 600 swi thwase eka titlilasi ta 25 leti khomiweke etikweni rero. Sweswinyana, mathwasana yo tlula hafu ma le ka ntirho wa nkarhi hinkwawo, yo ringana 71 ma averiwe ku va maphayona yo hlawuleka kasi ya ntlhanu ma endzela mavandlha. Titlilasi to sungula ta khume ta xikolo lexi ti khomeriwe erhavini, kambe ku sukela eka tlilasi ya vu-11 yi khomeriwe endhawini ya xona ya le Villa González.

Hi September 22, 1998, Xidzedze lexi vuriwaka Georges xi hlasele eDominican Republic hi moya lowu a wu hunga hi rivilo ra tikhilomitara ta 190 hi awara, laha xi onheke swinene.  Vanhu va magidi va sale va nga ri na makaya naswona ku fe vanhu vo tlula 300. Komiti ya Mphalalo yi hundzule Holo ya Mfumo ya le La Romana yi va ndhawu yo phalala eka yona hi ku pfuniwa hi Komiti yo Aka ya Xifundzha. Vatirhi va ku tirhandzela va kwalomu ka 300 va pfunete eka ntirho wo phalala ku katsa ni Timbhoni to huma ematikweni man’wana ya 16.

A ku fanele ku lunghisiwa kumbe ku pfuxetiwa Tiholo ta Mfumo ta 23 ni makaya ya vamakwerhu yo tlula 800. Hi xikombiso, Carmen, loyi a nga phayona ra nkarhi hinkwawo leri dyuhaleke, a pfilunganyekile loko xidzedze xi onha yindlu yakwe leyi a ri ni malembe ya 38 a tshama eka yona. Hambiswiritano, u khapakhape hi ntsako loko ku fika ntlawa wa vamakwerhu va 15 wu endla masungulo ya yindlu yakwe leyintshwa. Carmen u ri: “Minkarhi hinkwayo Yehovha u ni mhaka na hina naswona wa hi khathalela. Vonani yindlu leyi yo saseka leyi vamakwerhu va ndzi akelaka yona. Vaakelani va mina va te: ‘Timbhoni ta Yehovha ti khathalela vamakwavo va tona; ta rhandzana hakunene.’” Marito yo tano ma twakarile etikweni hinkwaro loko vatirhi vo phalala va pfuna vamakwavo va vona lava weriweke hi mhangu.

Hambileswi Xidzedze lexi vuriwaka Georges xi onheke swinene, matshalatshala ya rirhandzu ya vanhu va Yehovha ma chavelele vamakwerhu va hina hi tlhelo ra nyama ni ra moya lava hlaseriweke hi xidzedze xexo. Xa nkoka swinene, matshalatshala ya vatirhi va ku tirhandzela lava titsoneke swo karhi ma tise ku dzuneka eka Yehovha, loyi a nga xihlovo xa nchavelelo wa xiviri.

Hikwalaho ka ku engeteleka lokukulu ka vadyondzisiwa lavantshwa, a ku ri ni xilaveko lexikulu xa Tiholo ta Mfumo leti engetelekeke. Xisweswo, hi November 2000, vamakwerhu va le Dominican Republic va sungule ku aka Tiholo ta Mfumo hi ku pfuniwa hi nongonoko wo pfuna matiko lama nga riki na switirhisiwa. Hikwalaho ka sweswo, vandlha ri nga swi kota ku aka Holo ya Mfumo leyi sasekeke hi mavhiki ya kwalomu  ka nhungu. Hi September 2011, mintlawa yimbirhi yo aka yi ake kumbe ku pfuxeta Tiholo ta Mfumo ta kwalomu ka 145.

Miako leyi swin’we ni vatirhi vo aka va ku tirhandzela swi nyikele vumbhoni lebyikulu. Hi xikombiso, exidorobanini lexi nga en’walungu-vupela-dyambu bya tiko, vamakwerhu va kume ndhawu leyi fanelekaka leyi ku nga akiwaka Holo ya Mfumo leyintshwa eka yona. Phayona ro hlawuleka ri kombele n’wini wa ndhawu leswaku a ri xavisela ndhawu yoleyo. Wanuna yoloye u te: “U nga tidyeli nkarhi, a ndzi nge ku xaviseli ndhawu leyi, ngopfu-ngopfu loko u lava ku aka kereke eka yona.”

Endzhakunyana ka bulo rero, n’wini wa ndhawu yoleyo u ye ePuerto Plata leswaku a endzela buti wakwe loyi a kuleke loyi a a ri Mbhoni ya Yehovha. Loko a fika, u kume leswaku ndyangu wa Timbhoni wu teke buti wakwe loyi a vabyaka wu tshama na yena leswaku wu n’wi khathalela. Ndyangu wolowo a wu n’wi yisa eka dokodela, eminhlanganweni ni le ntirhweni wo chumayela. Wanuna yoloye u vutise buti wakwe leswaku u va hakele mali muni leswi va n’wi khathalelaka hi ndlela yo tano. U te: “I mahala. Phela lava i vamakwerhu va mina.”

N’wini wa ndhawu u khumbiwe hi musa lowukulu wa Timbhoni lerova a vitana phayona ro hlawuleka leri teke eka yena eku sunguleni kutani a ri byela leswaku se u cince miehleketo yakwe naswona a a tiyimisele ku ri xavisela ndhawu. Vamakwerhu va xave ndhawu kutani va sungula ku aka holo. Eku sunguleni, nsati wa n’wini wa ndhawu a nga tirhandzi Timbhoni ta Yehovha. Kambe loko a vona ndlela leyi vamakwerhu a va tirha swin’we ha yona endhawini yo aka, u te, “Lowu i ntlawa wa vanhu lava nga ni vun’we ni musa lowu ndzi nga si tshamaka ndzi wu vona nikan’we.”