GERMAN GOMERA a a ri n’wana wa vumbirhi wo hetelela eka vana va 11. Endzhaku ka loko tata wakwe ni vasesi vakwe vambirhi va file, mana wakwe, Luisa, u rhurhe ni ndyangu wakwe va ya tshama edorobeni. Kwalaho, va sungule ku nghena Kereke ya Ma-mennonite, leyi vabuti wa Luisa ni mindyangu ya vona a va nghena yona.

German u ri: “Hi 1962, ku fike mpatswa lowu nga maphayona yo hlawuleka edorobeni ra hina.” A ku vuriwa leswaku mpatswa wolowo a wu onha vanhu va doroba rero hi ‘tidyondzo leti nga riki tinene.’ Nilokoswiritano, loko mpatswa wolowo wu fika endyangwini wa ka Piña, wu amukeriwile. Ndyangu wa ka Piña a wu ri wukulu. Wu hlamarisiwe hi musa ni xinghana lexi maphayona wolawo a ma ri na xona, kutani wu yingisele rungula ra wona hi vurhon’wana. Hikwalaho ka riendzo rero, ndyangu wa ka Piña swin’we ni vasesi va mina vanharhu va sungule ku dyondza.

German u ya emahlweni a ku: “Siku rin’wana loko maphayona ma endzela ndyangu wa ka Piña”, Manana na yena u vitaniwile. Ma hlaye tindzimana ta Bibele leti kandziyisaka ntshembo wo hanya hilaha ku nga heriki laha misaveni. Manana u ma vutise a ku, ‘Kutani ha yini ekerekeni ya mina va vula leswaku hi ya etilweni?’ Endzhaku ka loko makwerhu a n’wi hlamule hi ku tirhisa Bibele kutani a hlamusela leswi Matsalwa ma swi vulaka hi ku  pfuxiwa ka vanhu lava feke emisaveni, Manana u amukele rungula rero kutani a sungula ku byela van’wana hileswi a swi dyondzeke.

“Loko vafundhisi va Kereke ya Ma-mennonite va kuma leswaku swirho swa vona swi dyondza ni Timbhoni ta Yehovha, va ringete ku swi kucetela leswaku swi tshika ku dyondza na tona. Hambiswiritano, va endle tano hi ku tirhisa vukarhi ni ku swi xungeta. Maximina, loyi a nga manana wa ka Piña, u te, ‘Vonani laha! A ndzi n’wana ndza swi kota ku tiendlela swiboho!’

German u ri: “Eku heteleleni, vanhu va 22 va tshike Kereke ya Ma-mennonite kutani va sungula ku ya eminhlanganweni ya vandlha ekaya leri hirhiweke. Manana u khuvuriwe hi 1965 kutani mina ndzi khuvuriwe endzhakunyana ka malembe ya mune hi 1969 loko ndzi ri ni malembe ya 13.”