Endzhaku ka loko Vaisrayele va kutsuriwe eka Faro ni mavuthu yakwe eLwandle ro Tshwuka, va ve ni xivangelo xo nkhensa Yehovha. Na hina hi nga nkhensa Yehovha hi ntsako. I ntiyiso leswaku loko hi langutana ni miringo, hi nga hela matimba hi ku olova. Eminkarhini yo tano, hi nga chaveleleka ni ku tiyisiwa hi ku va hi anakanyisisa hi mikateko ya hina.

Yin’wana ya mikateko leyi hi yi tlangelaka swinene i ntshembo lowu hi nga na wona wa leswaku hi ta  kutsuriwa eka nchumu wun’wana ni wun’wana lowu hi twisaka ku vava ni gome. Ku nga khathariseki maxangu lawa hi nga langutanaka na wona, ha swi tiva leswaku Yehovha a nge hi fularheli. Murisi wa hina wa rirhandzu u hi nyika xin’wana ni xin’wana lexi hi xi lavaka leswaku hi n’wi tirhela hi ku tshembeka. A nge pfuki a tsandzeke ku va “vutumbelo ni ntamu wa hina, mpfuno lowu kumekaka hi ku hatlisa hi nkarhi wa maxangu.” (Ps. 46:1) Loko hi tshama hi ri karhi hi dzikisa mianakanyo ya hina eka mikateko yo tano swi ta hi pfuna ku langutana ni maxangu lamakulu swinene. Eka lembe leri taka, onge hi nga anakanyisisa hi ntsako hi mikateko ya hina kutani hi susumeteleka ku “[nkhensa] Yehovha, hikuva hi lonene; hikuva musa wakwe wa rirhandzu i wa hilaha ku nga riki na makumu.”—Ps. 106:1.