KU ANDZA lokukulu enhlengeletanweni ya Yehovha ku endla leswaku ku va ni xilaveko lexi engetelekeke xa Tiholo ta Mfumo, Tiholo ta Tinhlengeletano, miako leyi nga ta tirhiseriwa ku fambisa swikolo swa nhlengeletano, tihofisi ta vuhundzuluxeri swin’we ni miako ya marhavi etindhawini to hambana-hambana. Xisweswo, hi October 2013, Huvo leyi Fumaka yi simeke ndzawulo leyintshwa leswaku ku endliwa ntirho wo endla tipulani, wo aka, wo pfuxeta miako ni ku khathalela miako hi ndlela leyi humelelaka ni leyi nga koxiki mali yo tala. Ndzawulo leyi, leyintshwa yi vitaniwa Ndzawulo yo Pulana ni ku Aka eMisaveni Hinkwayo (Worldwide Design/Construction Department [WDC]), leyi nga entsindza wa misava hinkwayo eBrooklyn, le New York naswona yi tirha hi ku landza  nkongomiso wa Komiti yo Kandziyisa ya Huvo leyi Fumaka.

Ndzawulo leyi ya WDC yi langutela Tindzawulo to Pulana ni ku Aka eka Matiko-nkulu (Regional Design/Construction Departments), leti nga le marhavini ya le Afrika Dzonga, Australia, Jarimani ni le United States. Tindzawulo leti ti langutela ku hleriwa ka tipulani, ku aka ni ku khathalela miako hi ku ya hi swifundzha swa kona. Xikongomelo xa tona i ku hatlisisa ntirho wo aka Tiholo ta Mfumo. Eku sunguleni, Tiholo ta Mfumo a ti akiwa hi ku landza nkongomiso wa Komiti yo Aka ya Xifundzha kumbe hi ku landza nongonoko wo pfuna matiko lama nga evuswetini. Malunghiselelo lawa hamambirhi ka wona ma hlanganisiwile ku endlela leswaku ku hatlisisiwa ntirho wo aka.

Leswaku ku hleriwa xilaveko lexi, lexi yaka xi kula xa Tiholo ta Mfumo ni Tiholo ta Tinhlengeletano, ku simekiwe Ndzawulo yo Pulana ni ku Aka ya le Tikweni (Local Design/Construction Department) erhavini rin’wana ni rin’wana. Ndzawulo leyi yi tirhisana hi ku kongoma ni Komiti ya Rhavi ya le tikweni ra kwalaho. Nchumu wo tsakisa hi ku cinca loku hileswaku marhavi hinkwawo ma nga avela vatirhi vo aka va nkarhi hinkwawo leswaku va pfuna vamakwerhu va kwalaho ku aka Tiholo ta Mfumo ni Tiholo ta Tinhlengeletano.

Hi April 2014, a ku ri ni matsima lamakulu yo aka yo tlula 270 lawa a ma fanele ma endliwa, ku katsa ni tihofisi ta vuhundzuluxeri ta 90, Tiholo ta Tinhlengeletano ta 35 ni matsima ya le rhavini ya 130. Ku engetela kwalaho, ku ni xilaveko lexi andzaka xo aka Tiholo ta Mfumo, laha to tlula 14 000 ti faneleke ti akiwa kumbe ti pfuxetiwa hi vuntshwa.

Mawaku ndlela leyi swi tiyisaka ripfumelo ha yona ku vona ndlela leyi vanhu va Yehovha lava nga ni vun’we va nga pfumeleliki matiko, mindhavuko ni tindzimi ta vona leswaku swi va endla va nga vi ni vun’we kutani va aka  miako leyi tisaka ku dzuneka evitweni rakwe ro kwetsima! Dan Molchan loyi a tirhaka eka Komiti yo Khathalela Vatirhi entsindza wa misava hinkwayo, u ri: “Ka ha ri ni ntirho lowukulu lowu wa ha faneleke wu endliwa naswona hikwalaho ka leswi hi nkhensa swikhongelo swa vamakwerhu swin’we ni minyikelo leyi va yi humesaka leswaku va seketela ntirho lowu. Kambe hi va nkhensa swinene vamakwerhu lava tinyiketelaka hi ku tirhandzela leswaku va pfuneta eka matsima lawa.”