GULIZAR u ri: “Hakanyingi ndza khongela eka Yehovha ndzi n’wi byela ndlela leyi ndzi tlangelaka ha yona leswi ndzi dyondzeke hi yena hi ririmi ra manana.”

Gulizar u tihlanganise ni Timbhoni ta Yehovha malembe ya nhungu, kambe u khuvuriwe endzhaku ka loko a ye eminhlanganweni leyi a yi fambisiwa hi ririmi ra manana, ku nga Xikurd. Hi un’wana eka vanhu vo tala lava vulavulaka Xikurd lava amukeleke ntiyiso eGeorgia emalembeni ya sweswinyana. Kambe i vamani vanhu lava vulavulaka Xikurd?

 Vanhu lava vulavulaka Xikurd a va tshama eMiddle East ku ringana malembe yo hlayanyana. Swidyondzi swin’wana swi anakanya leswaku a ku ri vatukulu va Vameda va khale lava boxiweke eBibeleni. (2 Tih. 18:11; Mint. 2:9) Ririmi ra vona ri wela eka ntlawa wa tindzimi wa le Iran.

Namuntlha, timiliyoni ta vanhu lava vulavulaka Xikurd va tshama ematikweni yo hambanahambana, lama katsaka Armenia, Iran, Iraq, Siriya na Turkey. Ku ni vanhu va kwalomu ka 20 000 lava vulavulaka Xikurd eGeorgia. Hi ntolovelo, i vanhu lava chavaka Xikwembu naswona va swi rhandza swinene ku dyondza hi xona.

Sweswi ku ni vahuweleri va 500 lava vulavulaka Xikurd eGeorgia ni mavandlha manharhu ya Xikurd. Hi 2014, vanhu hinkwavo a va tsake ngopfu loko ku khomiwa nhlengeletano yo sungula ya xifundzha hi Xikurd eTbilisi, laha ku veke ni vapfhumba vo huma eArmenia, eJarimani, eTurkey ni le Ukraine.