EPhilippines, Jonathan a a rindzele ku hlangana na dokodela. Wansati la tirhaka laha vaendzi va fikelaka kona, u xiye ndlela leyi a ambale ha yona kutani a n’wi vutisa loko a tirha eka khampani ya ndzindzakhombo. Jonathan u vule leswaku hi yena Mbhoni ya Yehovha naswona u tele ku ta pfuna Mbhonikulobye leyi vabyaka leyi lavaka ku pfuniwa hi swa vutshunguri. Hi ku tsakisiwa hi sweswo, Laila u byele Jonathan leswaku tata wakwe loyi a ha  ku lova a a hlaya Xihondzo xo Rindza nkarhi na nkarhi. Jonathan u bule na yena hi tsalwa ra Yohane 5:28, 29 kutani a n’wi nyika xiphephana lexi nge, Hi Wihi Ntshembo Wa Varhandziwa Lava Feke?

Loko a ya exibedlhele nkarhi na nkarhi, a a khomela Laila minkandziyiso naswona u n’wi lavele makwerhu wa xisati loyi a ta dyondza na yena Bibele. Hi ku hatlisa, nuna wa Laila, makwavo wa xisati ni mana wakwe, lava hinkwavo ka vona a va tshama na yena, a va va kona loko ku dyondziwa.

Rose, loyi ku nga muakelani, u ye eka Laila kutani a n’wi vutisa leswaku ha yini a endzela hi vanhu vo tala ekaya kakwe. Laila u  n’wi hlamusele leswaku a a dyondza Bibele ni Timbhoni ta Yehovha. Hikwalaho ka sweswo, Rose u sungule ku dyondza naswona loko a endzela ndzisana yakwe ya xisati exifundzheni lexi a humaka eka xona, u yi byele leswi a a swi dyondza. Leswi ndzisana yakwe ya xisati ku nga Abigail, a yi lava ku tiva swo tala hi leswi yi swi tweke, yi kombele ku dyondzeriwa Bibele. Mana wa Rose na yena u sungule ku dyondza Bibele.

Laila u khuvuriwe eka nhlengeletano ya xifundzha ya sweswinyana. Mana wakwe na yena se u khuvuriwile. Muakelani wakwe Rose swin’we ni ndzisana yakwe Abigail, va khuvuriwe lembe leri nga hundza. Mana wa Rose u va kona eminhlanganweni nkarhi na nkarhi. Swirho swin’wana swa ndyangu wa ka va Laila swi ya emahlweni ni ku dyondza Bibele. Timhaka leti hinkwato ti sunguriwe hi munhu un’we loyi a ye exibedlhele!

Sweswi nsimu ya ririmi ra mavoko ya le Sri Lanka yi ya yi kula. Hi 2015, Timbhoni a ti ri ni tiadirese leti nga ehansi ka 80 ta vanhu lava feke tindleve naswona a ti tsariwe ephepheni. Ku sukela kwalaho, ku simekiwe vandlha ro sungula ra Ririmi ra Mavoko ra le Sri Lanka naswona ku sunguriwe nxaxamelo wa le ka khompyuta lowu nga ni mavito ya vanhu va kwalomu ka 420 ni tiadirese ta laha va tshamaka kona. Vamakwerhu va tihlanganise ni vanhu volavo lava endlaka kwalomu ka tiphesente ta 80 hi ku kongoma, kumbe hi ku vulavula eka Internet va ri karhi va vonana kumbe ku rhumelana marungula. Vatekani lava nga varhumiwa va te: “Sweswi hi nga swi kota ku avela vamakwerhu lava feke tindleve nsimu leyi va nga ta yi tirha. Enkarhini lowu nga hundza, a va endzela ntsena munhu loyi a feke tindleve loyi a va n’wi tiva.”

Vamakwerhu va le Mongolia va hlanganyela hi ku hiseka eka tsima ro hlawuleka ro chumayela emadorobeni lamakulu  hambiloko maxelo ya kona ma titimela ku fika eka -30°C. Mutirhelamfumo un’wana u teke minkandziyiso eka xigolonyana xa minkandziyiso kutani a tsala papila ro nkhensa. U tsale a ku: “Ndzi Mubudha. Kambe ndzi rhandza ku tiva hi vukhongeri byo hambanahambana, hikuva ndzi tshemba leswaku a hi fanelanga hi famba hi ndlela yin’we ntsena kambe hi fanele hi famba ni letin’wana. Endzhaku ka loko ndzi hlaye yin’wana ya minkandziyiso leyi mi hi endlelaka yona, ndzi teke xiboho xo mi tsalela papila leswaku ndzi mi byela ndlela leyi ndzi titwaka ha yona. Ndza swi vona leswaku mi tirhise nkarhi ni matimba yo tala leswaku mi tsala rungula leri, leri twisisekaka ri tlhela ri pfuna. Nchumu wun’we lowu ndzi wu dyondzeke eka minkandziyiso ya n’wina hileswaku Bibele i buku ya nkoka leyi munhu a faneleke a yi hlaya. Buku leyi yi ni ntiyiso. Bibele yi hi nyika nkongomiso wa ndlela leyi hi faneleke hi hanya ha yona. Ndzi rhandza ku nkhensa hinkwavo lava endleke matshalatshala leswaku va hundzuluxela hi Ximongolia. Ndzi tlhela ndzi nkhensa hinkwavo lava va hi nyikaka minkandziyiso leswaku yi hi pfuna ku nga khathariseki leswaku ka hisa swinene kumbe ka titimela.”

EHong Kong, makwerhu la nga phayona la vuriwaka Brett u ye eka jaha rin’wana leri nga emalembeni ya va-20 ivi a ri nyika xiphephana lexi nge I Yini Lexi Nga Endlaka Leswaku Hi Va Ni Ntsako eNdyangwini? Loko ri vone xiphephana lexi, ri sungule ku rila. Ri hlamusele leswaku ri kulele entiyisweni kambe loko ri ri ni malembe ya 16 ri baleke ekaya. Emalembeni ya ntlhanu lama landzeleke, a ri tshama eswitarateni naswona a ri godzomberiwe hi swidzidziharisi ku fikela loko ri tekiwa ni ku tlhela ri pfuniwa hi nhlangano lowu pfunaka swisiwana.

Ri ye emahlweni ri hlamusela leswaku hi mixo lowu ri hlanganeke ni makwerhu loyi, a ri khongerile ri ku: “Loko vukhongeri lebyi ndzi kuriseriweke eka byona byi ri bya ntiyiso, ndzi kombela  u ndzi komba namuntlha.” Ri vone xikhongelo xa rona xi hlamulekile. Va ye eka xitolo lexi xavisaka kofi ivi va bula hi rungula leri nga eka broxara leyi nge Tlhelela Eka Yehovha. Hikwalaho ka leswi jaha leri a ri fanele ri tlhelela eFrance madyambu wolawo, va nyikane tinomboro ta tinqingho. Endzhakunyana, jaha leri ri tsalele Brett ri ku: “Makwerhu wa mina la rhandzekaka, Yehovha u hlamule swikhongelo swa mina. Hi Sonto ndzi ta ya eholweni ya laha ndzi tshamaka kona.” Ri tihlanganise ni Timbhoni ta le France ivi ri sungula ku dyondza Bibele ni ku tlhela ri va kona eminhlanganweni nkarhi na nkarhi.