HI May 7 na 8, 2016, vanhu lava a va ri endhawini leyi vaendzi va fikelaka eka yona entsindza wa misava hinkwayo e25 Columbia Heights, Brooklyn, le New York, a va nga ha tikoti hi ku tsaka. Hambileswi hi mahelovhiki vaendzi a va nga pfumeleriwi ku valanga, eka xiendlakalo lexi, vaakelani lava tshamaka ekusuhi ni le Bethele va rhambiwile leswaku va ta valanga ndhawu leyi nga ni nkombiso wa matimu ya Bibele.

Tsima leri ro rhamba vanhu ri nyikele vumbhoni endhawini yoleyo naswona lava katsekeke eka rona va vuyeriwile. A swi khutaza swinene ku vona ndlela leyinene leyi lava ku nga khale va ri vaakelani va hina va anguleke ha yona.

Wanuna un’wana u te: “Ndzi tshame etindhawini to hambanahambana  [leti nga ekusuhi na le Bethele] ku sukela hi va-1960, naswona a mi ri vaakelani lavanene. Hi ta mi kumbuka swinene, hi navela leswaku mi nga ka nga mi nga fambi.”

Wansati un’wana u te: “Xiphemu lexi xa doroba leri a xi ta va xi nga hluvukanga hi ndlela leyi loko a mi nga akanga eka xona. Ha nkhensa swinene leswi mi veke vaakelani va hina ku ringani malembe lawa hinkwawo.”

Maphayona yo tala lama hlanganiseke nsimu ya le ndhawini yoleyo a ma tsakisiwa hi ndlela leyi vanhu va kwalaho a va angula ha yona. Wanuna loyi a welaka eka ntlawa lowu langutelaka miako, u kombise ndlela leyi a yi tlangelaka ha yona nhlengeletano ya hina kutani a vula leswaku u kombela ku khomeriwa hi leswi a nga ta va a nga ri kona hi nkarhi wolowo wo valanga.

Vuyelo bya ku valanga loku byi ve lebyi khutazaka swinene. Eka masiku mambirhi, ku te vaendzi va 48 lava nga riki Timbhoni leswaku va ta vona nkombiso wa Bibele. Hi nkarhi wo valanga, a ku ri ni swirho swa ndyangu wa Bethele swo hlayanyana endhawini leyi ku fikelaka vaendzi eka yona leswaku swi ta amukela vanhu ni ku tlhela swi bula ni vaakelani lava endzeke.

Sally, muntshwa loyi a nga emalembeni ya va-20, u hete hafu ya awara eka nkombiso wolowo. Loko a fika, maphayona lama n’wi nyikeke xirhambo a ma ri endhawini leyi vaendzi va fikelaka eka yona. Sally u vule leswaku a nga swi tivi leswaku ku ni nkombiso wa Bibele. Maphayona ma n’wi byele leswaku swa tsakisa ku hlangana ni muntshwa loyi a dyondzekeke loyi a rhandzaka Bibele. Sally u te: “Bibele i ya nkoka. Hi yona ndlela yin’we ntsena leyi hi nga tivaka rungula ra Xikwembu. I ya nkoka swinene evuton’wini bya hina.”

 Sally u vule leswaku ndlela leyi a a rhandza Bibele ha yona yi endle leswaku a dyondza Xilatini na Xigriki tanihi leswi a byi rhandza swinene vuhundzuluxeri. U vule leswaku vuhundzuluxeri lebyi pakanisaka i bya nkoka lerova a byi fanelanga byi fambisana ni makungu ya munhu. Loko maphayona ma byele Sally leswaku website ya hina ya jw.org yi ni minkandziyiso leyi sekeriweke eBibeleni leyi hundzuluxeriweke hi tindzimi to tlula 800, swi n’wi hlamarisile swinene ni ku tlhela swi n’wi tsakisa. Loko vamakwerhu volavo va n’wi hlamusela leswi vahundzuluxeri va swi endleke hi vito ra Yehovha, swi n’wi hlamarisile kutani a ku: “Ha yini vito ra Yehovha ri susiwile eBibeleni?” Loko se a famba u te: “Vanhu lava i vaakelani lavanene eka tindhawu hinkwato leti ndzi tshameke eka tona.”

Hi Musumbhunuku endzhaku ka loko ku valanga ku hundzile, mufundhisi un’wana u ye eka John loyi a nga eBethele loyi a ri karhi a chumayela hi ku tirhisa xigolonyana xa minkandziyiso ekusuhi ni le Bethele. U byele John ndlela leyi swi n’wi tsakiseke ha yona ku ta valanga ni ndlela leyi swi tsakisaka ha yona leswaku hi landzela Bibele. Endzhaku ka loko va bule ku ringana nkarhinyana, hi xitshuketa u te: “Ndzi ti hlundzukerile Timbhoni!” Leswi John a nga n’wi twisisi u n’wi vutise leswaku ha yini. Kutani u te: “Hi ku va ma rhurha! MI NGA FAMBI! Xavani miako leyikulu kumbe mi aka miako leyi mi yi lavaka, kambe mi nga fambi. Mi endle leswaku ndhawu leyi yi hluvuka. Swa ndzi hlundzukisa swinene leswi mi rhurhaka laha!”

Hi ku angarhela, tsima ro rhamba vanhu leswaku va ta valanga ni nkombiso wa Bibele swi nyikele vumbhoni lebyinene eka vanhu va le ndhawini yoleyo naswona vaakelani va hina va tive vito ra Xikwembu ku tlula eku sunguleni.