LOKO Sawulo a endla swilo swo biha, i mani loyi a a tsaka?— A ku tsaka Sathana Diyavulosi. Kambe ni varhangeri va vukhongeri va Vayuda na vona a va tsaka. Loko Sawulo a va mudyondzisiwa wa Mudyondzisi Lonkulu kutani a vitaniwa Pawulo, varhangeri volavo va vukhongeri va sungule ku n’wi venga. Xana se wa swi vona leswaku hikwalaho ka yini swi tika leswaku mudyondzisiwa wa Yesu a endla leswinene?—

Siku rin’wana muprista lonkulu loyi a a vitaniwa Ananiya u lerise vavanuna van’wana leswaku va makala Pawulo. Ananiya u tlhele a ringeta ku endla leswaku Pawulo a hoxiwa ekhotsweni. Pawulo u xaniseke swinene loko a va mudyondzisiwa wa Yesu. Hi xikombiso, vanhu vo biha va himetele Pawulo va tlhela va ringeta ku n’wi dlaya hi ku n’wi khandla hi maribye.—Mintirho 23:1, 2; 2 Vakorinto 11:24, 25.

Vanhu vo tala va ta ringeta ku hi endlisa swilo leswi nga xi tsakisiki Xikwembu. Kambe xivutiso xa tlakuka, Xana u swi rhandza ku fikela kwihi swilo leswinene? Xana u swi  rhandza swinene lerova u ta endla swilo leswinene hambiloko van’wana va ku venga hikwalaho ka swona? Sweswo swi lava xivindzi, a swi tano ke?—

U nga ha tivutisa, ‘Ha yini vanhu va hi venga loko hi endla swilo leswinene? Ha yini va nga tsaki?’ Wena u nga ha anakanya leswaku va fanele va tsaka. Hakanyingi vanhu a va tsakela Yesu hikwalaho ka swilo leswinene leswi a a swi endla. Siku rin’wana vanhu hinkwavo va muti va hlengeletane enyangweni wa yindlu leyi a a tshama eka yona. Va tile hikuva Yesu a a hanyisa vanhu lava vabyaka.—Marka 1:33.

Kambe minkarhi yin’wana vanhu a va nga swi tsakeli leswi Yesu a swi dyondzisaka. Hambileswi minkarhi hinkwayo a a dyondzisa swilo leswinene,  van’wana a va n’wi venga hikwalaho ka leswi a a vulavula ntiyiso. Leswi swi humelerile siku rin’wana, emutini wa Nazareta, lowu Yesu a kuleleke eka wona. U ye esinagogeni laha Vayuda a va hlangana kona loko va gandzela Xikwembu.

Loko a ri kwalaho Yesu u nyikele nkulumo leyinene leyi sekeriweke eMatsalweni. Loko ya ha sungula vanhu a va yi tsakela. A va hlamarisiwa hi marito lamanene lama humaka enon’wini wa yena. A va nga kholwi leswaku hi rona jaha leri kuleleke emutini wa ka vona.

Kambe hi ku famba ka nkarhi Yesu u vulavule marito man’wana. U va byele hi minkarhi leyi Xikwembu xi nga tshama xi kombisa tintswalo eka vanhu lava nga riki Vayuda. Loko Yesu a vula sweswo, lava a va ri esinagogeni va sungule ku hlundzuka. Xana wa swi tiva leswaku ha yini?— A va anakanya leswaku Xikwembu xi rhandza vona ntsena. A va anakanya leswaku vona va antswa ku tlula vanhu van’wana. Xisweswo a va n’wi venga Yesu hikwalaho ka leswi a swi vuleke. Xana wa swi tiva leswi va ringeteke ku n’wi endla swona?—

Bibele yi ri: ‘Va khome Yesu kutani va tsutsuma na yena va ya ehandle ka muti. Va n’wi yise enhlohlorhini ya ntshava naswona va lave ku n’wi cukumetela eriweni leswaku a ta fa! Kambe Yesu u va chupukerile a famba.’—Luka 4:16-30.

Loko sweswo a swi endlekele wena, xana a wu ta tlhelela eka vanhu lava u ya vulavula na vona hi ta Xikwembu?— Sweswo a swi ta lava xivindzi, a swi tano ke?— Hambiswiritano, endzhaku ka lembe, Yesu u tlhelerile eNazareta. Bibele yi ri: ‘U sungule ku va dyondzisa esinagogeni ya vona.’ Yesu a nga pfumelanga leswaku ku chava vanhu lava nga xi rhandziki Xikwembu ku n’wi tshikisa ku vulavula ntiyiso.—Matewu 13:54.

Siku rin’wana, hi savata, Yesu a a ri endhawini leyi a ku ri ni wanuna loyi a khwanyaneke voko. Yesu a a ri na wona matimba yo huma eka Xikwembu yo hanyisa wanuna yoloye. Kambe vavanuna van’wana kwalaho a va ringeta ku karhata Yesu. Xana Mudyondzisi Lonkulu a a ta endla yini?— Xo sungula u vutisile a ku: ‘Loko u ri ni nyimpfu leyi weleke emugodini lowu enteke hi Savata, xana u ta yi humesa?’

 Ina, a va ta yi humesa nyimpfu hambi ku ri hi Savata, ku nga siku leri va faneleke va wisa ha rona. Kutani Yesu u te: ‘Swa antswa swinene ku pfuna munhu hi Savata, tanihi leswi a nga wa nkoka swinene ku tlula nyimpfu!’ Hakunene a swi fanela leswaku Yesu a pfuna wanuna loyi hi ku n’wi hanyisa!

Yesu u byele wanuna yoloye leswaku a tshambuluta voko ra yena. Hiloko voko ri hanyisiwa hi nkarhi wolowo. Wanuna loyi a a tsakile swinene! Kambe ku vuriwa yini hi vanhu lavan’wana? Xana a va tsakile?— Doo! Leswi swi endle leswaku va venga Yesu swinene. Va humele ehandle kutani va endla makungu ya ku n’wi dlaya!—Matewu 12:9-14.

Ninamuntlha swa ha ri tano. Ku nga khathariseki leswaku hi endla yini, a hi nge swi koti ku tsakisa vanhu hinkwavo. Kutani, hi fanele hi endla xiboho xa leswaku i mani loyi kahle-kahle hi lavaka ku n’wi tsakisa. Loko hi lava ku tsakisa Yehovha Xikwembu ni N’wana wa yena, Yesu Kreste, minkarhi hinkwayo hi fanele hi endla leswi va swi dyondzisaka. Kambe, loko hi endla tano, i mani la nga ta hi venga? I mani la nga ta endla leswaku swi hi tikela ku endla swilo leswinene?—

I Sathana Diyavulosi. Kambe, i vamani van’wana lava nga ta hi tikisela?— Hi lava Diyavulosi a va xiseke leswaku va rhandza swilo swo biha. Yesu u byele varhangeri va vukhongeri va le sikwini ra yena a ku: “N’wina mi huma eka tata wa n’wina Diyavulosi, naswona mi navela ku endla ku navela ka tata wa n’wina.”—Yohane 8:44.

Va tele vanhu lava Diyavulosi a va tsakelaka. Yesu u va vitana “misava.” Xana u anakanya leswaku hi yihi “misava” leyi Yesu a vulavulaka ha yona?— A hi pfule Yohane ndzima 15, ndzimana 19 kutani hi vona leswaku hi yihi. Eka yona hi hlaya marito ya Yesu lama nge: “Loko a mi ri xiphemu xa misava, misava a yi ta rhandza leswi nga swa yona. Kutani leswi mi nga riki xiphemu xa misava, kambe ndzi mi hlawuleke emisaveni, hikwalaho ka sweswo misava ya mi venga.”

Xisweswo, misava leyi vengaka vadyondzisiwa va Yesu yi hlanganisa vanhu lava nga riki valandzeri va yena. Ha yini misava yi venga vadyondzisiwa va Yesu?— Tivutise. Xana i mani mufumi wa misava leyi?—  Bibele yi ri: “Misava hinkwayo yi le hansi ka matimba ya lowo homboloka.” Munhu yoloye wo homboloka i Sathana Diyavulosi.—1 Yohane 5:19.

Xana se wa swi vona leswaku ha yini swi tika ku endla leswinene?— Sathana ni misava yakwe yo biha va endla leswaku swi tika ku endla leswinene. Kambe ku ni xivangelo xin’wana. Xana wa xi tsundzuka?— Eka Ndzima 23 ya buku leyi, hi dyondze leswaku hi velekiwe hi ri ni xidyoho. Xana a swi nge tsakisi loko xidyoho, Diyavulosi ni misava yakwe se swi nga ha ri kona?—

Bibele ya hi tshembisa: “Misava ya hundza.” Leswi swi vula leswaku vanhu hinkwavo lava nga riki valandzeri va Mudyondzisi Lonkulu va ta va va nga ha ri kona. A va nge pfumeleriwi ku hanya hilaha ku nga heriki. Xana wa swi tiva leswaku i vamani lava va nga ta hanya hilaha ku nga heriki?— Bibele yi ya emahlweni yi ku: “Loyi a endlaka ku rhandza ka Xikwembu u tshama hi masiku.” (1 Yohane 2:17) Ina, lava nga ta hanya hilaha ku nga heriki emisaveni leyintshwa ya Xikwembu, hi lava va endlaka leswinene ntsena, lava “endlaka ku rhandza ka Xikwembu.” Kutani, hambiloko swi tika, hi fanele hi endla leswinene, a hi swona ke?—