LOKO vana va endla swilo leswinene, va tsakisa lava va va khathalelaka. Loko n’wana wa nhwanyana a endla nchumu wo karhi kahle, tata wakwe a nga chavi ku byela van’wana a ku: “Leyi i ntombhi ya mina.” Kumbe loko jaha ri endle swilo leswinene, tatana a nga chavi ku vula a ku: “Leri i jaha ra mina.”

Yesu minkarhi hinkwayo u endla swilo leswi tsakisaka Tata wakwe. Hi yona mhaka leyi Tata wakwe a tinyungubyisaka ha yena. Xana wa swi tsundzuka leswi Tata wa Yesu a swi endleke siku rin’wana loko Yesu a ri ni valandzeri vakwe vanharhu?— Ina, Xikwembu xi vulavurile xi ri le kule etilweni xi ku: “Loyi i N’wananga, la rhandzekaka, loyi ndzi n’wi amukeleke.”—Matewu 17:5.

Minkarhi hinkwayo Yesu u rhandza ku endla swilo leswi tsakisaka Tata wakwe. Xana wa swi tiva leswaku hikwalaho ka yini? Hikuva u rhandza Tata wakwe hi mbilu ya yena hinkwayo. Loko munhu a endla swilo ntsena hi leswi a bohekaka ku swi endla, swa n’wi tikela. Kambe loko a swi endla hi ku swi rhandza, swa n’wi olovela. Xana wa swi tiva leswaku ku endla swilo hi ku swi rhandza swi vula yini?— Swi vula ku swi endla swi huma embilwini.

Niloko Yesu a nga si ta emisaveni, a a tiyimiserile ku endla xin’wana ni xin’wana lexi Tata wakwe a n’wi kombelaka leswaku a xi endla. Leswi u swi endle hikwalaho ka leswi a rhandzaka Tata wakwe, Yehovha Xikwembu. Yesu a a tshame kahle etilweni ni Tata wakwe. Kambe Xikwembu a xi ri ni ntirho wo hlawuleka lowu a xi lava leswaku Yesu a wu endla. Leswaku a kota ku endla ntirho wolowo, Yesu a a fanele a suka etilweni. A a fanele a velekiwa a ri n’wana laha misaveni. Yesu a a swi rhandza ku endla leswi hikuva Yehovha a a lava leswaku a swi endla.

Leswaku Yesu a ta velekiwa emisaveni, a a fanele a va ni manana. Xana wa n’wi tiva mana wa yena?— Vito ra yena i Mariya. Yehovha u rhume  ntsumi ya yena Gabriyele yi suka etilweni leswaku yi ta vulavula na Mariya. Gabriyele u n’wi byele leswaku u ta kuma n’wana wa mufana. N’wana yoloye a a ta thyiwa vito ra Yesu. Kutani, tata wa n’wana a a ta va mani?— Ntsumi yi vule leswaku Tata wa n’wana ku ta va Yehovha Xikwembu. Hi yona mhaka leyi Yesu a vitaniweke N’wana wa Xikwembu.

Xana u ehleketa leswaku Mariya u titwe njhani hi mhaka leyi?— Xana u te, “A ndzi swi lavi ku va mana wa Yesu”? Doo, Mariya a a tiyimiserile ku endla leswi Xikwembu xi swi lavaka. Kambe a swi ta tisa ku yini leswaku N’wana wa Xikwembu la nga etilweni a velekiwa a ri n’wana emisaveni? Xana ndlela leyi Yesu a velekiweke ha yona yi hambana njhani ni ndlela leyi vana van’wana va velekiwaka ha yona? Xana wa swi tiva?—

Phela, Xikwembu xi endle vatswari va hina vo sungula, ku nga Adamu na Evha, leswaku va kota ku hlangana hi ndlela yo hlamarisa. Endzhaku ka sweswo, n’wana a a ta sungula ku kula endzeni ka khwiri ra mana wakwe. Vanhu va vula leswaku leswi i singita! Ndza tshemba na wena wa pfumela.

Kambe, Xikwembu xi tlhele xi endla singita rin’wana ro hlamarisa ku tlula leri. Xi teke vutomi bya N’wana wa xona wa le tilweni kutani xi byi nghenisa ekhwirini ra Mariya. Xikwembu a xi nga si tshama xi endla nchumu wo fana ni lowu naswona a xa ha tlhelanga xi wu endla. Endzhaku ka singita leri, Yesu u sungule ku kula ekhwirini ra Mariya tanihi laha vana van’wana va kulaka ha kona endzeni ka vamana wa vona. Endzhaku ka sweswo, Mariya u tekane na Yosefa.

 Loko nkarhi wa leswaku Yesu a velekiwa wu fika, Mariya na Yosefa a va endzele emutini wa Betlehema. Kambe a wu tele hi vanhu. A yi nga ri kona ni yindlu ya leswaku Mariya na Yosefa va nga tshama eka yona, kutani a va boheka ku ya tshama laha ku tshamaka swifuwo. Loko va ri kwalaho Mariya u veleke Yesu kutani a vekiwa exidyelweni, hilaha u swi vonaka hakona laha. Xidyelo i ndhawu leyi ku vekiwaka swakudya swa tihomu ni swa swifuwo swin’wana leswaku swi dyela kona.

Hi vusiku lebyi Yesu a velekiweke ha byona ku humelele swilo leswi tsakisaka. Ntsumi yi humelele eka varisi van’wana ekusuhi ni le Betlehema. Yi va byele leswaku Yesu a a ri munhu wa nkoka. Ntsumi yi te: ‘Maswivo, ndzi mi byela mahungu lamanene lama nga ta tsakisa vanhu. Namuntlha ku velekiwe munhu loyi a nga ta ponisa vanhu.’—Luka 2:10, 11.

Ntsumi yi byele varisi leswaku va ta kuma Yesu eBetlehema, a latiwe  exidyelweni. Hiloko tintsumi tin’wana etilweni swin’we ni ntsumi leyi, ti dzunisa Xikwembu. Tintsumi ti yimbelerile ti ku: ‘Ku vangama a ku ve eka Xikwembu ni le henhla ka misava ku va ni ku rhula exikarhi ka vanhu lava amukelekaka.’—Luka 2:12-14.

Loko tintsumi se ti fambile, varisi va ye eBetlehema kutani va kuma Yesu. Va fike va byela Yosefa na Mariya mahungu lamanene hinkwawo lawa va ma tweke. Xana wa yi ehleketa ndlela leyi Mariya a a tsake ha yona hikwalaho ka leswi a pfumeleke ku va mana wa Yesu?

Hi ku famba ka nkarhi, Yosefa na Mariya va teke Yesu va ya na yena emutini wa Nazareta. Laha hi laha Yesu a kuleleke kona. Loko se a kurile, u sungule ntirho wakwe lowukulu wo dyondzisa. Lowu hi wun’wana wa mintirho leyi Yehovha  Xikwembu a a lava leswaku N’wana wa yena a wu endla emisaveni. Yesu a a tiyimiserile ku endla ntirho wolowo hikuva Yesu a a n’wi rhandza swinene Tata wakwe wa le tilweni.

Loko Yesu a nga si sungula ntirho wakwe wa ku va Mudyondzisi Lonkulu, u khuvuriwe hi Yohane Mukhuvuri eNambyeni wa Yordani. Hiloko ku humelela nchumu wun’wana wo hlamarisa! Loko Yesu a ri karhi a huma ematini, Yehovha u vulavule a ri etilweni a ku: “Loyi i N’wananga, la rhandzekaka, loyi ndzi n’wi amukeleke.” (Matewu 3:17) Xana a wu tsaki loko vatswari va wena va ku byela leswaku va ku rhandza?— Hi nga tiyiseka leswaku Yesu na yena a a tsakile.

Minkarhi hinkwayo Yesu a a endla swilo leswinene. A a nga hanyi hi vukanganyisi. A a nga fambi a byela vanhu leswaku yena hi yena Xikwembu. Ntsumi Gabriyele yi byele Mariya leswaku Yesu u ta vuriwa N’wana wa Xikwembu. Yesu hi yexe u vurile leswaku hi yena N’wana wa Xikwembu. Naswona a nga byelanga vanhu leswaku yena u tlharihe ku tlula Tata wakwe. U te: “Tatana u nkulu eka mina.”—Yohane 14:28.

Hambiloko Yesu a ri etilweni, loko Tata wa yena a n’wi nyika ntirho wo wu endla, Yesu a a wu endla. A a nga vuli leswaku u ta wu endla kambe a nga ha wu endli. A a rhandza Tata wakwe. Xisweswo, a a yingisela leswi Tata wakwe a swi vulaka. Kutani loko Yesu a fika laha misaveni, u endle leswi Tata wa yena wa le tilweni a n’wi leriseke swona. Nkarhi wa yena a nga wu tirhiselanga ku endla swilo swin’wana. A swi hlamarisi leswi Yehovha a tinyungubyisaka hi N’wana wakwe!

Na hina hi lava ku tsakisa Yehovha, a hi swona ke?— Kutani hi fanele hi kombisa leswaku ha xi yingisela Xikwembu, hilaha Yesu a endleke hakona. Xikwembu xi vulavula na hina hi ku tirhisa Bibele. Swi ta va swi hoxile ku tiendla onge ha xi yingisela Xikwembu kasi hi hala tlhelo hi endla swilo leswi Bibele yi nge swi bihile, a swi tano ke?— Nakambe tsundzuka, hi ta swi tsakela ku tsakisa Yehovha loko hi n’wi rhandza hakunene.