NDZI byele, hi yihi buku leyi u yi rhandzaka ku tlula tibuku hinkwato?— Vana van’wana va nga hlawula leyi vulavulaka hi swiharhi. Van’wana va nga hlawula buku leyi nga ni swifaniso swo tala. Ina, swi nga ha tsakisa ku hlaya tibuku teto.

Kambe tibuku ta nkoka swinene emisaveni hinkwayo, hi leti ti hi byelaka ntiyiso hi Xikwembu. Yin’wana ya tibuku leti i ya nkoka swinene ku tlula letin’wana hinkwato. Xana wa yi tiva?— I Bibele.

Ha yini Bibele yi ri ya nkoka swinene?— Hikuva yi huma eka Xikwembu. Yi hi hlamusela vumunhu bya xona ni swilo leswinene leswi xi nga ta hi endlela swona. Yi tlhela yi hi kombisa leswi hi faneleke hi swi endla leswaku hi xi tsakisa. Yi fana ni papila leri humaka eka Xikwembu.

Phela, Xikwembu a xi ta va xi yi tsarile Bibele hinkwayo xi ri etilweni kutani xi yi nyika vanhu va nyama. Kambe a xi endlanga tano. Hambileswi rungula leri ri humaka eka Xikwembu, xi tirhise malandza ya xona ya laha misaveni leswaku ma tsala Bibele.

Xana Xikwembu xi swi endlise ku yini sweswo?— Leswaku u twisisa ndlela leyi swi endliweke ha yona, xiya leswi. Loko hi twa rito ra munhu un’wana eka xiya-ni-moya, rito rero ri nga ha va ri huma eka munhu la nga ekule. Loko hi hlalela thelevhixini, hi nga ha vona swifaniso swa vanhu lava nga ematikweni man’wana, naswona hi nga ha kota ku twa leswi va swi vulaka.

Vanhu va swi kota ku famba mpfhuka wo leha va ya en’wetini hi xibamubamu, naswona va nga rhumela rungula emisaveni va ri en’wetini. Xana a wu swi tiva sweswo?— Loko vanhu va swi kota ku endla sweswo, xana Xikwembu xi nga swi kota ku rhumela rungula xi ri etilweni?—  Ina, xi nga swi kota! Xi swi endlile leswi khale, vanhu va nga si va na xona xiya-ni-moya kumbe thelevhixini.

Muxe u tshame a twa Xikwembu xi vulavula hi xiviri. Muxe a a nga xi voni Xikwembu, kambe u swi kotile ku twa rito ra Xikwembu. Loko leswi swi humelela a ku ri ni vanhu va timiliyoni. Kahle-kahle, hi siku rero, Xikwembu xi endle leswaku ntshava yi tsekatseka, naswona a ku ri ni ku dzindza ka tilo swin’we ni rihati. Vanhu a va swi tiva leswaku i Xikwembu lexi vulavuleke, kambe va ngheniwe hi ku chava lokukulu. Kutani va byele Muxe, va ku: “Xikwembu xi nga vulavuli na hina hikuva hi nga tshuka hi fa.” Hi ku famba ka nkarhi, Muxe u tsale swilo leswi Xikwembu xi swi vuleke. Naswona leswi Muxe a swi tsaleke, swi kona eBibeleni.—Eksoda 20:18-21.

 Muxe u tsale tibuku ta ntlhanu to sungula ta Bibele. Kambe a hi yena ntsena loyi a tsaleke. Xikwembu xi tirhise vavanuna va kwalomu ka 40 leswaku va tsala swiyenge swo karhi swa Bibele. Vavanuna lava va hanye khale swinene, naswona swi teke malembe yo tala leswaku Bibele yi hela. Ina, swi teke nkarhi wa kwalomu ka malembe ya 1 600! Lexi hlamarisaka hileswaku hambileswi van’wana va vavanuna lava a va nga tivani, hinkwaswo leswi va swi tsaleke swa twanana hi ku helela.

Vavanuna van’wana lava Xikwembu xi va tirhiseke ku tsala Bibele a va dumile. Hambileswi Muxe a a ri murisi, u ve murhangeri wa tiko ra Israyele. Solomoni a a ri hosi leyi tlhariheke ni leyi fuweke ku tlula vanhu hinkwavo emisaveni. Kambe vatsari van’wana a va nga dumanga ngopfu. Amosi a a khathalela minkuwa.

Ku engetela kwalaho, mutsari un’wana wa Bibele a a ri dokodela. Xana wa ri tiva vito rakwe?— I Luka. Mutsari un’wana a a ri muluvisi. Vito ra yena i Matewu. Nakambe, un’wana a a ri gqweta, a a wu tiva swinene nawu wa vukhongeri bya Xiyuda. U tsale tibuku to tala ta Bibele ku tlula lavan’wana hinkwavo. Xana wa ri tiva vito rakwe?— I Pawulo. Naswona Petro na Yohane, vadyondzisiwa va Yesu, lava na vona va hlanganyeleke eku tsaleni ka Bibele, a va ri vaphasi va tinhlampfi.

Vo tala va vatsari lava va Bibele va tsale hi swilo leswi Xikwembu a xi ta swi endla enkarhini lowu taka. Xana va swi kotise ku yini ku tiva swilo leswi swi nga si humelela?— Xikwembu hi xona xi nyikeke vavanuna volavo rungula. Xi va byele swilo leswi nga ta humelela.

Loko Yesu, Mudyondzisi Lonkulu, a fika emisaveni, xiyenge lexikulu xa Bibele se a xi tsariwile. Nakambe, tsundzuka leswaku Mudyondzisi Lonkulu a a ri etilweni hi nkarhi wolowo. A a swi tiva leswi Xikwembu xi swi endleke. Xana a a tiyiseka leswaku Bibele yi huma eka Xikwembu?— Ina.

Loko Yesu a byela vanhu hi mintirho ya Xikwembu, u tirhise Bibele. Minkarhi yin’wana a a va byela leswi yi swi vulaka, a nga yi pfulanga. Nakambe, Yesu u hi tisele rungula leri engetelekeke ro huma eka Xikwembu. Yesu u te: “Swilo leswi ndzi swi tweke eka yena ndza swi vula emisaveni.”  (Yohane 8:26) Yesu u twe swilo swo tala eka Xikwembu hikuva u tshame a tshama ni Xikwembu. Kambe hi nga swi kuma kwihi swilo leswi Yesu a swi vuleke?— EBibeleni. Hinkwaswo swi tsaleriwe hina leswaku hi ta swi hlaya.

Nakambe, loko Xikwembu xi tirhisa vanhu leswaku va tsala, va tsale hi ririmi leri va ri vulavulaka siku ni siku. Xisweswo, xiyenge lexikulu xa Bibele xi tsariwe hi Xiheveru, xin’wana hi Xiaramu kasi xin’wana xi tsariwe hi Xigriki. Tanihi leswi vanhu vo tala namuntlha va nga swi kotiki ku hlaya tindzimi leti, Bibele yi hundzuluxeriwe yi ya eka tindzimi tin’wana. Namuntlha swiyenge swa Bibele swi nga hlayiwa hi tindzimi leti tlulaka 2 260. Leyi i nhlayo leyikulu hakunene! Bibele i papila ra Xikwembu leri xi ri tsaleleke vanhu hinkwavo. Hambileswi yi hundzuluxeriweke hi tindzimi to tala, rungula ra yona ri huma eka Xikwembu.

Leswi Bibele yi swi vulaka i swa nkoka eka hina. Yi  tsariwe khale swinene. Kambe yi vulavula hi swilo leswi endlekaka namuntlha. Naswona yi hi byela hi swilo leswi Xikwembu xi nga ta swi endla ku nga ri khale. Leswi yi swi vulaka swa tsakisa! Yi hi nyika ntshembo lowu hlamarisaka.

Bibele yi tlhela yi hi byela ndlela leyi Xikwembu xi lavaka leswaku hi hanya ha yona. Yi hi byela leswi lulameke ni leswi hoxeke. Hinkwerhu hi fanele hi swi tiva leswi. Yi hi byela hi vanhu lava endleke swilo swo biha ni vuyelo bya swiendlo swa vona, leswaku hi ta kota ku papalata khombo leri va langutaneke na rona. Yi tlhela yi hi byela hi vanhu lava endleke swilo leswinene ni vuyelo lebyinene bya swiendlo swa vona. Hinkwaswo swi tsaleriwe ku pfuna hina.

Kambe, leswaku Bibele yi hi vuyerisa swinene, hi fanele hi kuma nhlamulo ya xivutiso xin’wana. Xivutiso xa kona xi ri: I mani loyi a hi nyikeke Bibele? U nga hlamurisa ku yini?— Ina, Bibele hinkwayo yi huma eka Xikwembu. Kutani ke, hi nga swi kombisa njhani leswaku hi tlharihile hakunene?— Hi ku yingisa Xikwembu ni ku endla leswi xi swi vulaka.

Leswi swi vula leswaku hi fanele hi tinyika nkarhi wa ku hlaya Bibele swin’we. Loko hi kuma papila ro huma eka munhu loyi hi n’wi rhandzaka swinene, hi ri hlaya hi ku phindha-phindha. I ra risima eka hina. Bibele yi fanele yi va tano eka hina hikuva i papila leri humaka eka Loyi a hi rhandzaka swinene. I papila leri humaka eka Xikwembu lexi nga ni rirhandzu.