DYONDZO 7
Xana U Tshame U Titwa U Ri Ni Xivundza Ni Ku Chava?
Vona xifanyetana lexi nga exifanisweni. Xi vonaka xi ri ni xivundza ni ku chava, a hi swona ke? Xana u tshame u titwa hi ndlela yoleyo?— Un’wana ni un’wana u titwa hi ndlela yoleyo minkarhi yin’wana. Bibele yi vulavula hi vanghana va Yehovha lava na vona va titweke va ri ni xivundza ni ku chava. Un’wana wa vona a ku ri Eliya. A hi dyondzi ha yena.
Yezabele a a lava ku dlaya Eliya
Khale ka khaleni Eliya a a tshama eIsrayele emahlweni ko va Yesu a velekiwa. Akabu, hosi ya le Israyele, a a nga gandzeli Xikwembu xa ntiyiso, ku nga Yehovha. Akabu ni nsati wakwe, Yezabele, a va gandzela Bali xikwembu xa mavunwa. Kutani vanhu vo tala eIsrayele na vona va sungule ku gandzela Bali. Hosi ya xisati Yezabele a a ri ni nsele naswona a a lava ku dlaya vanhu hinkwavo lava gandzelaka Yehovha, ku katsa na Eliya! Xana wa swi tiva leswaku Eliya u endle yini?—
Eliya u tsutsumile! U ye endhawini ya le kule laha mpfula yi nga niki kutani a tumbela ebakweni. Xana u ehleketa leswaku ha yini a endle tano?— Ina, a a chava. Kambe Eliya a a nga fanelanga a chava. Ha yini? Hikuva a a swi tiva leswaku Yehovha u ta n’wi pfuna. Yehovha u tshame a kombisa Eliya matimba yakwe. Siku rin’wana Yehovha u hlamule xikhongelo xa Eliya hi ku rhumela ndzilo wu huma etilweni. Kutani ni sweswi Yehovha a a ta pfuna Eliya!
Xana Yehovha u n’wi pfune njhani Eliya?
Loko Eliya a ri ebakweni, Yehovha u vulavule na yena a n’wi vutisa a ku: ‘Xana u endla yini laha?’ Eliya u hlamule a ku: ‘Hi mina ntsena loyi a ha ku gandzelaka. Ku sele mina ntsena naswona ndzi chava leswaku ndzi ta dlayiwa.’ Eliya a a ehleketa leswaku vagandzeri lavan’wana hinkwavo va Yehovha va dlayiwile. Kambe Yehovha u byele Eliya a ku: ‘Wolowo a hi ntiyiso. Ku ni vanhu van’wana va 7 000 lava ha ndzi gandzelaka. U nga chavi. Ndza ha ri ni ntirho wo tala lowu u faneleke u wu endla!’ Xana u ehleketa leswaku Eliya swi n’wi tsakisile ku twa sweswo?—
Xana u nga dyondza yini eka leswi humeleleke Eliya?— A wu fanelanga u titwa u ri ni xivundza ni ku chava. U ni vanghana lava rhandzaka Yehovha swin’we na wena. Nakambe Yehovha u ni matimba lamakulu naswona minkarhi hinkwayo u ta ku pfuna! Xana a swi ku tsakisi ku tiva leswaku hakunene a wu wexe?—
