Xana minkarhi hinkwayo a swi ku tikeli ku yingisa vatswari va wena?— Minkarhi yin’wana swa tika. Xana a wu swi tiva leswaku Yesu a a endla leswi Yehovha swin’we ni vatswari vakwe a va n’wi byela swona?— Xikombiso xakwe xi nga ku pfuna ku yingisa vatswari va wena hambiloko swi tika. A hi dyondzi swo tala hi mhaka leyi.

Loko Yesu a nga si ta laha misaveni, a a ri etilweni ni Tata wakwe, ku nga Yehovha. Nakambe Yesu a a ri ni vatswari laha misaveni. Mavito ya vona a ku ri Yosefa na Mariya. Xana wa swi tiva leswaku swi te njhani leswaku va va vatswari vakwe?—

Yehovha u teke vutomi bya Yesu etilweni kutani a byi nghenisa ekhwirini ra Mariya leswaku Yesu a velekiwa ni ku hanya laha misaveni. Leri a ku ri singita hakunene! Yesu u kulele ekhwirini ra Mariya ku fana ni vana van’wana. Yesu u velekiwe endzhaku ka tin’hweti ta kaye. Leyi hi yona ndlela leyi Mariya ni nuna wakwe Yosefa va veke vatswari va Yesu ha yona laha misaveni.

Loko Yesu a ri ni malembe ya 12, u endle nchumu lowu kombiseke ndlela leyi a a n’wi rhandza ha yona Tata wakwe, ku nga Yehovha. Leswi swi endleke loko Yesu ni vatswari vakwe va ya eYerusalema eka Paseka. Loko va tlhelela ekaya, Yosefa na Mariya va kume leswaku Yesu a a nga ri kona. Xana wa ku tiva laha a ri kona?—

Yosefa na Mariya va tlhelele eYerusalema hi ku hatlisa leswaku va ya lava Yesu. Va twe ku vava hikwalaho ka leswi va nga n’wi kumangiki. Kambe va n’wi kume etempeleni endzhaku ka masiku manharhu! Xana wa swi tiva leswaku ha yini Yesu a a ri etempeleni?— Hikuva kwalaho a a dyondza hi Tata wakwe, ku nga Yehovha. A a n’wi rhandza Yehovha naswona a a lava ku dyondza ndlela leyi a nga n’wi tsakisaka ha yona. Hambiloko se a kurile a ri wanuna, minkarhi hinkwayo Yesu a a yingisa Yehovha. Yesu u yingisile hambiloko ku ri hileswaku a ta xaniseka. Xana Yesu u tlhele a va yingisa Yosefa na Mariya?— Ina, Bibele yi vula leswaku u va yingisile.

Xana u nga dyondza yini eka xikombiso xa Yesu?— U fanele u yingisa vatswari va wena hambiloko swi nga olovi. Xana u ta swi endla sweswo?—