1, 2. I yini leswi vanhu vo tala va tivutisaka swona?

TSUNAMI yi onhe tiko. Wanuna un’wana u ye ekerekeni a khome xibamu kutani a dlaya ni ku tlhela a vavisa vanhu vo hlayanyana. Manana un’wana u dlayiwe hi vuvabyi bya khensa kutani a siya vana va ntlhanu.

² Loko ku endlaka timhangu kumbe makhombo yo tano, vanhu va tivutisa leswaku, “Ha yini?” Vanhu vo tala va tivutisa leswaku ha yini misava yi tele hi rivengo ni ku xaniseka. Xana na wena u tshame u tivutisa swivutiso leswi?

3, 4. (a) Hi swihi swivutiso leswi Habakuku a swi vutiseke? (b) Xana Yehovha u n’wi hlamule njhani?

³ EBibeleni, hi dyondza leswaku vanhu lava a va ri ni ripfumelo leri tiyeke eka Xikwembu na vona va tivutise swivutiso swo tano. Hi xikombiso, muprofeta Habakuku u vutise Yehovha a ku: “Ha yini u ndzi endla ndzi vona leswo biha, naswona u tshamela ku languta ku karhateka? Ha yini ku phanga ni madzolonga swi ri emahlweni ka mina, ha yini ku ri ni ku holova, naswona ha yini ku ri ni ku lwa?”—Habakuku 1:3.

⁴ Eka Habakuku 2:2, 3 hi kuma nhlamulo leyi Xikwembu xi hlamuleke swivutiso swa Habakuku ni xitshembiso xa xona xo lulamisa xiyimo xexo. Yehovha u va rhandza swinene vanhu. Bibele yi ri: ‘Wa mi khathalela.’ (1 Petro 5:7) Entiyisweni, a nga kona munhu loyi a vengaka ku xaniseka ku fana ni Xikwembu. (Esaya 55:8, 9) Kutani a hi bule hi xivutiso lexi nge, Ha yini ku ri ni ku xaniseka konghasi emisaveni?

5. Xana vafundhisi vo tala va ri yini hi ku xaniseka? Xana Bibele yi dyondzisa yini?

⁵ Hakanyingi vafundhisi ni vaprista va vula leswaku i ku rhandza ka Xikwembu leswaku vanhu va xaniseka. Van’wana va nga ha vula leswaku swilo hinkwaswo leswi humelelaka munhu, ku katsa ni makhombo, swi kunguhatiwe hi Xikwembu naswona a hi nge pfuki hi swi twisisile leswaku ha yini. Van’wana va nga ha vula leswaku vanhu, ku katsa ni vana, va fa leswaku va ta ya tshama ni Xikwembu etilweni. Kambe leswi a hi ntiyiso. Yehovha a nge pfuki a vange swilo swo biha. Bibele yi ri: “A swi ve ekule swinene ni Xikwembu xa ntiyiso leswaku xi endla hilaha ku hombolokeke, Ni Lowa Matimba Hinkwawo ku endla hilaha ku nga lulamangiki!”—Yobo 34:10.

6. Ha yini vanhu vo tala va sola Xikwembu hikwalaho ka ku xaniseka hinkwako loku nga kona emisaveni?

⁶ Vanhu vo tala va sola Xikwembu hikwalaho ka ku xaniseka hinkwako loku nga kona emisaveni hileswi va ehleketaka leswaku Xikwembu hi xona xi fumaka misava. Kambe hilaha hi dyondzeke hakona eka Ndzima 3, mufumi wa misava leyi i Sathana Diyavulosi.

7, 8. Ha yini ku ri ni ku xaniseka konghasi emisaveni?

⁷ Bibele yi hi byela leswaku “misava hinkwayo yi le hansi ka matimba ya lowo homboloka.” (1 Yohane 5:19) Mufumi wa misava leyi, Sathana, u ni tihanyi. U ‘xisa misava hinkwayo leyi akiweke.’ (Nhlavutelo 12:9) Vanhu vo tala va n’wi tekelela. Kutani xexo hi xin’wana xa swivangelo leswi endlaka leswaku vanhu va hemba, va vengana ni ku va ni tihanyi.

⁸ Ku ni swivangelo swin’wana leswi endlaka leswaku ku va ni ku xaniseka ko tala emisaveni. Endzhaku ka loko Adamu na Evha va xandzukile, va hundzisele xidyoho eka vana va vona. Kutani hikwalaho ka xidyoho, vanhu va xanisana. Hakanyingi va lava ku tivona va ri va nkoka ku tlula  van’wana. Va lwa naswona va tshikilela van’wana. (Eklesiasta 4:1; 8:9) Minkarhi yin’wana vanhu va xaniseka hikwalaho ka “nkarhi ni xiendlakalo lexi nga languteriwangiki.” (Eklesiasta 9:11) Va nga humeleriwa hi timhangu ni swilo swin’wana swo biha hikwalaho ko tikuma va ri endhawini leyi hoxeke hi nkarhi lowu hoxeke.

9. Ha yini hi tiyiseka leswaku Yehovha u fanele a ri ni xivangelo lexi twalaka swinene xo pfumelela ku xaniseka leswaku ku ya emahlweni?

⁹ Yehovha a nge pfuki a vange ku xaniseka. A nga fanelanga a soriwa hikwalaho ka nyimpi, vugevenga ni ku tshikileriwa ka vanhu. Xikwembu a hi xona xi vangaka timhangu to tanihi ku tsekatseka ka misava, swidzedze ni ndhambi. Kambe u nga ha tivutisa, ‘Loko ku ri hileswaku Yehovha i munhu loyi a nga ni matimba swinene evuakweni hinkwabyo, ha yini a nga swi siveli swilo swo biha?’ Ha swi tiva leswaku Xikwembu xa khathala swinene hi hina, kutani xi fanele xi ri ni xivangelo lexi twalaka swinene xo pfumelela ku xaniseka leswaku ku ya emahlweni.—1 Yohane 4:8.

10. Sathana u n’wi tlhontlhe njhani Yehovha?

¹⁰ Diyavulosi u xise Adamu na Evha entangeni wa Edeni. Sathana u hehle Xikwembu hi ku vula leswaku i Mufumi wo biha. U vule leswaku Xikwembu a xi tsona Adamu na Evha nchumu wun’wana lowunene. Sathana a a lava va tshemba leswaku a a ta va fuma hi ndlela leyinene ku tlula Yehovha nileswaku a va ta tihanyela handle ko fumiwa hi Yena.—Genesa 3:2-5; vona Nhlamuselo ya le hansi 27.

11. Hi xihi xivutiso lexi hi faneleke hi kuma nhlamulo ya xona?

¹¹ Adamu na Evha a va n’wi yingisanga Yehovha kutani va n’wi xandzukerile. A va ehleketa leswaku va ni mfanelo yo tiendlela xiboho xa leswinene ni leswo biha. Xana Yehovha  a ta swi kombisa njhani leswaku a va hoxile nileswaku wa swi tiva leswi hi faneleke?

12, 13. (a) Ha yini Yehovha a nga lovisanga Adamu na Evha hi nkarhi wolowo? (b) Ha yini Yehovha a pfumelele Sathana leswaku a lawula misava leyi nileswaku vanhu va tifuma?

¹² Yehovha a nga lovisanga Adamu na Evha hi nkarhi wolowo. Ematshan’weni ya sweswo u va pfumelele leswaku va va na vana. Kutani Yehovha u endle leswaku vana va Adamu na Evha va tihlawulela loyi va lavaka ku fumiwa hi yena. Xikongomelo xa Yehovha a ku ri ku tata misava hi vanhu lava hetisekeke naswona sweswo a swi ta endleka ku nga khathariseki leswi Diyavulosi a ringeteke ku swi endla.—Genesa 1:28; Esaya 55:10, 11.

¹³ Sathana u tlhontlhe Yehovha emahlweni ka tintsumi ta timiliyoni. (Yobo 38:7; Daniyele 7:10) Kutani Yehovha u nyike Sathana nkarhi wo kombisa loko leswi a swi vuleke ku ri ntiyiso. Nakambe u nyike vanhu nkarhi wo tifuma hi ku kongomisiwa hi Sathana leswaku A kombisa loko va ta swi kota ku humelela handle ko pfuniwa hi Yena.

14. I yini lexi nga paluxeka endzhaku ka nkarhi?

¹⁴ Se ku hundze magidi ya malembe vanhu va ri karhi va ringeta ku tifuma, kambe va tsandzeka. Sathana u vonake a ri muhembi. Vanhu va lava ku pfuniwa hi Xikwembu. Muprofeta Yeremiya a tiyisile loko a ku: “Oho Yehovha, ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.”—Yeremiya 10:23.

15, 16. (a) Ha yini Yehovha a pfumelele ku xaniseka leswaku ku ya emahlweni nkarhi wo leha swonghasi? (b) Ha yini Yehovha a nga swi lulamisanga swiphiqo leswi vangiweke hi Sathana?

¹⁵ Ha yini Yehovha a pfumelele ku xaniseka leswaku ku ya emahlweni nkarhi wo leha swonghasi? Ha yini a nga  siveli swilo swo biha? Swi teke nkarhi ku kombisa leswaku Sathana u tsandzekile ku fuma. Vanhu va ringete ku fumiwa hi mimfumo yo tala, kambe va tsandzekile. Hambileswi va endleke nhluvuko eka swilo swa sayense ni thekinoloji, vubihi, vusweti, vugevenga ni nyimpi swi tinyike matimba ku tlula rini na rini. A hi nge swi koti ku tifuma handle ko pfuniwa hi Xikwembu.

¹⁶ Hambiswiritano, Yehovha a nga swi lulamisanga swiphiqo leswi vangiweke hi Sathana. Loko a lo swi lulamisa, a swi ta vula leswaku U seketela mfumo wa Sathana kambe a nge pfuki a wu seketerile. Nakambe sweswo a swi ta endla leswaku vanhu va tshemba leswaku va swi kota ku tifuma. Kambe sweswo a hi ntiyiso naswona Yehovha a nge pfuki a swi endlile sweswo. A nga si tshama a hemba.—Vaheveru 6:18.

17, 18. Xana Yehovha u ta endla yini hi swilo hinkwaswo swo biha leswi vangiweke hi Sathana?

¹⁷ Xana Yehovha a nga lulamisa swilo hinkwaswo swo biha leswi vangiweke hi ku va Sathana ni vanhu va nga yingisi? Ina. Swilo hinkwaswo swa koteka eka Xikwembu. Yehovha wa wu tiva nkarhi lowu swihehlo hinkwaswo swa Sathana swi nga ta hlamuriwa ha wona. Kutani u ta endla misava yi va paradeyisi, hilaha a swi kunguhate hakona. Hinkwavo lava nga ‘emasirheni’ va ta pfuxiwa. (Yohane 5:28, 29) Vanhu a va nge he vabyi kumbe ku fa. Yesu u ta lulamisa swilo hinkwaswo swo biha leswi vangiweke hi Sathana. Yehovha u ta tirhisa Yesu leswaku a “herisa mintirho ya Diyavulosi.” (1 Yohane 3:8) Ha swi tlangela leswi sweswi Yehovha a hi lehiseleke mbilu leswaku hi n’wi tiva ni ku endla xiboho xa leswaku hi fumiwa hi Yena. (Hlaya 2 Petro 3:9, 10.) Hambiloko hi xaniseka, wa hi pfuna leswaku hi tiyisela.—Yohane 4:23; hlaya 1 Vakorinto 10:13.

¹⁸ Yehovha a nga hi sindzisi leswaku hi hlawula yena tanihi Mufumi wa hina. U nyike vanhu ntshunxeko wa ku tihlawulela.  A hi kambisise leswi nyiko leyi ya risima yi vulaka swona eka hina.

19. Hi yihi nyiko leyinene leyi Yehovha a hi nyikeke yona? Ha yini hi fanele hi yi tlangela nyiko leyi?

¹⁹ Nyiko leyinene ya ku tihlawulela leyi Yehovha a hi nyikeke yona yi endla leswaku hi va lava hambaneke hi ku helela ni swiharhi. Swiharhi a swi swi koti ku tihlawulela kambe hina hi nga hlawula ndlela leyi hi lavaka ku hanya ha yona ni ku endla xiboho xa loko hi lava ku tsakisa Yehovha. (Swivuriso 30:24) Nakambe a hi fani ni michini leyi endlaka ntsena leswi yi nga endleriwa swona. Hi ni ntshunxeko wo tihlawulela leswi hi lavaka ku va swona, lava hi lavaka leswaku va va vanghana va hina ni leswi hi lavaka ku swi endla hi vutomi bya hina. Yehovha u lava leswaku hi tiphina hi vutomi.

20, 21. Hi xihi xiboho lexinene lexi u nga xi endlaka sweswi?

²⁰ Yehovha u lava leswaku hi n’wi rhandza. (Matewu 22:37, 38) U fana ni tatana loyi a tsakaka ku twa n’wana wakwe a ku “Ndza ku rhandza,” a swi vula swi suka embilwini naswona ku nga ri hileswi a sindzisiwaka. Yehovha u hi nyike ntshunxeko wo hlawula ku n’wi tirhela kumbe ku nga n’wi tirheli. Sathana, Adamu na Evha va hlawule ku ka va nga n’wi yingisi Yehovha. Xana u ta yi tirhisa njhani nyiko ya wena ya ku tihlawulela?

²¹ Tirhisa nyiko ya wena ya ku tihlawulela leswaku u tirhela Yehovha. Ku ni vanhu van’wana va timiliyoni lava endleke xiboho xo tsakisa Xikwembu kutani va fularhela Sathana. (Swivuriso 27:11) I yini leswi u nga swi endlaka sweswi leswaku u va kona emisaveni leyintshwa ya Xikwembu loko xi herisa ku xaniseka hinkwako? Xivutiso xexo xi ta hlamuriwa eka ndzima leyi landzelaka.