“Mi [fanele] ku va vadyondzisi.” (Hev. 5:12) Anakanya hi mhaka leyi! Yehovha Mudyondzisi lonkulu evuakweni hinkwabyo, wa hi rhamba leswaku hi dyondzisa van’wana hi yena! I lunghelo ra risima naswona i vutihlamuleri lebyikulu ku dyondzisa ntiyiso mayelana na Yehovha, ku nga ha va ekaya, evandlheni kumbe ensin’wini. Hi nga swi kota njhani ku hetisisa vutihlamuleri lebyi?

Nhlamulo yi kumeka eka marito lawa muapostola Pawulo a ma tsaleleke Timotiya lama nge: “Yana emahlweni u tinyiketela eku hlayeni ka le rivaleni, eku khongoteleni, eku dyondziseni.” Loko a ya emahlweni u te: “Hikuva hi ku endla tano, u ta tiponisa wena swin’we ni lava va ku yingisaka.” (1 Tim. 4:13, 16) U nyikiwe vutihlamuleri bya ku dyondzisa vanhu rungula leri ponisaka vutomi. Hikokwalaho, i swa nkoka leswaku u antswisa ndlela leyi u hlayaka ni ku dyondzisa ha yona. Broxara leyi yi ta ku pfuna leswaku u endla tano. Xiya swin’wana leswi kumekaka eka broxara leyi.

Yehovha i “Muleteri Lonkulu.” (Esa. 30:20) Hambileswi broxara leyi yi nga ta ku pfuna u antswisa ndlela leyi u hlayaka ni ku dyondzisa ha yona, kambe u nga rivali leswaku rungula leri hi ri dyondzisaka ri huma eka Yehovha naswona hi yena loyi a kokelaka vanhu enhlengeletanweni yakwe. (Yoh. 6:44) Hikokwalaho, nkarhi ni nkarhi khongela u kombela moya lowo kwetsima. Tirhisa Rito ra Xikwembu mikarhi hinkwayo. Endla leswaku ku vangamisiwa Yehovha. Tikarhatele ku pfuna vayingiseri va wena leswaku va rhandza Yehovha hi mbilu hinkwayo.

U nyikiwe vutihlamuleri byo dyondzisa vanhu rungula ra nkoka swinene. Ha tiyiseka leswaku loko u titshega hi “ntamu lowu Xikwembu xi wu nyikaka,” u ta swi kota ku hetisisa vutihlamuleri lebyi.—1 Pet. 4:11.

Vadyondzisikuloni,

Huvo Leyi Fumaka Ya Timbhoni Ta Yehovha