Yesu Kreste i N’wana wa Yehovha naswona i munghana wa yena lonkulu swinene, la rhandzekaka ngopfu. Loko a nga si hanya laha misaveni tanihi munhu, Yesu a a tshama etilweni a ri xivumbiwa xa moya lexi nga ni matimba. (Yohane 17:⁠5) Kutani u te emisaveni leswaku a ta dyondzisa vanhu ntiyiso malunghana ni Xikwembu. (Yohane 18:​37) U tlhele a nyikela hi vutomi bya yena tanihi munhu wa nyama leswaku a ponisa vanhu lava yingisaka, eka xidyoho ni rifu. (Varhoma 6:​23) Yesu sweswi i Hosi ya Mfumo wa Xikwembu, ku nga hulumendhe ya le tilweni leyi nga ta tisa Paradeyisi emisaveni leyi.​—⁠Nhlavutelo 19:⁠16.

Tintsumi na tona i vanghana va Xikwembu. Tintsumi a ti si tshama ti hanya emisaveni tanihi vanhu va nyama. Ti vumbiwe etilweni loko Xikwembu xi nga si endla misava. (Yobo 38:​4-⁠7) Ku ni timiliyoni ta tintsumi. (Daniyele 7:​10) Vanghana lava va Xikwembu va le tilweni va lava leswaku vanhu va dyondza ntiyiso hi Yehovha.​—⁠Nhlavutelo 14:​6, 7.

Xikwembu xi ni vanghana van’wana laha misaveni; xi va vitana timbhoni ta xona. Munhu la nyikelaka vumbhoni ehubyeni u hlamusela leswi a swi tivaka hi munhu wo karhi kumbe nchumu wo karhi. Timbhoni ta Yehovha ti byela van’wana hi leswi ti swi tivaka hi Yehovha ni xikongomelo xa yena. (Esaya 43:​10) Ku fana ni tintsumi, Timbhoni ti lava ku ku pfuna leswaku u dyondza ntiyiso hi Yehovha. Ti lava leswaku na wena u va munghana wa Xikwembu.