Loko u file swi vula leswaku a wu hanyi. Rifu ri fana ni vurhongo lebyikulu. (Yohane 11:​11-⁠14) Vafi a va swi koti ku twa, ku vona, ku vulavula kumbe ku ehleketa nchumu. (Eklesiasta 9:​5, 10) Vukhongeri bya mavunwa byi dyondzisa leswaku vafi va ya exivandleni xa moya va ya hanya ni vakokwa wa vona. Dyondzo yoleyo a yi humi kona eBibeleni.

Lava feke a va nge hi pfuni, naswona a va nge hi vavisi. Swi tolovelekile leswaku vanhu va endla mihivahivana ni magandzelo, leswi va pfumelaka leswaku swi ta tsakisa lava feke. Swilo leswi a swi xi tsakisi Xikwembu hikuva swi sekeriwe eka man’wana ya mavunwa ya Sathana. Ni vafi a swi nge va tsakisi, hikuva a va hanyi. A hi fanelanga hi chava kumbe ku gandzela vafi. Hi fanele hi gandzela Xikwembu ntsena.​—⁠Matewu 4:⁠10.

Vafi va ta tlhela va hanya. Yehovha u ta pfuxa vafi leswaku va ta hanya emisaveni leyi nga paradeyisi. Nkarhi wolowo wa ha ta. (Yohane 5:​28, 29; Mintirho 24:​15) Xikwembu xi ta pfuxa vanhu lava feke ku fana ni loko u pfuxa munhu la etleleke.​—⁠Marka 5:​22, 23, 41, 42.

Dyondzo ya leswaku a hi fi i mavunwa lama haxiweke hi Sathana Diyavulosi. Sathana ni madimona ya yena va endla vanhu va anakanya leswaku mimoya ya vafi ya hanya naswona yi vanga mavabyi ni swiphiqo swin’wana. Sathana u kanganyisa vanhu, minkarhi yin’wana hi milorho ni swivono. Yehovha wa va nyenya vanhu lava ringetaka ku vulavula ni vafi.​—⁠Deteronoma 18:​10-12.