U nga dyondza hi Yehovha hi ku hlaya Bibele. Eminkarhini ya khale Xikwembu xi hlawule vanhu vo karhi leswaku va tsala mianakanyo ya xona. Matsalwa wolawo ma vitaniwa Bibele. Namuntlha hi dyondza hi Xikwembu hi ku hlaya Bibele. Leswi Bibele yi nga ni marito kumbe rungula ra Yehovha, yi vitaniwa Rito ra Xikwembu. Hi nga swi tshemba leswi vuriwaka hi Bibele hikuva Yehovha a nga hembi. “[A swi koteki] leswaku Xikwembu xi hemba.” (Vaheveru 6:​18) Rito ra Xikwembu ri ni ntiyiso.​—⁠Yohane 17:⁠17.

Bibele i yin’wana ya tinyiko ta risima swinene leyi Xikwembu xi hi nyikeke yona. Yi fana ni papila leri humaka eka tatana ri ya eka vana vakwe lava a va rhandzaka. Yi hi byela hi xitshembiso xa Xikwembu xo hundzula misava yi va ndhawu yo saseka leyi ku nga ta tshamiwa eka yona​—⁠ku nga paradeyisi. Yi hi byela hi leswi xi swi endleke enkarhini lowu hundzeke, leswi xi swi endlaka sweswi, ni leswi xi nga ta swi endla enkarhini lowu taka, xi endlela vana va xona lava tshembekaka. Yi tlhela yi hi pfuna ku tlhantlha swiphiqo swa hina ni ku kuma ntsako.​—⁠2 Timotiya 3:​16, 17.

 Timbhoni ta Yehovha i vanghana va Xikwembu; ti ta ku pfuna ku twisisa leswi Bibele yi swi dyondzisaka. U nga ti byela leswaku u lava ku dyondza Bibele na tona. A ti hakerisi mali. (Matewu 10:⁠8) Ku engetela kwalaho, u nga ya eminhlanganweni ya Vukreste. Yi khomeriwa etindhawini ta vugandzeri leti vitaniwaka Tiholo ta Mfumo. Loko u ya eminhlanganweni ya Vukreste, vutivi bya wena hi Xikwembu byi ta kula hi ku hatlisa.

U nga dyondza hi Xikwembu eka swilo leswi xi swi endleke. Hi xikombiso, Bibele yi ri: “Xikwembu xi tumbuluxe matilo ni misava.” (Genesa 1:⁠1) Loko Yehovha a tumbuluxa “matilo,” u endle ni dyambu. Kutani, sweswo swi hi byela yini hi Xikwembu? Swi hi byela leswaku Yehovha u ni matimba lamakulu. Hi yena ntsena la nga endlaka nchumu lowu nga ni matimba ku fana ni dyambu. Swi tlhela swi hi byela leswaku Yehovha u tlharihile, tanihi leswi a ku laveka vutlhari leswaku a endla dyambu, leri humesaka ku hisa ni ku vonakala naswona ri tshama hi masiku.

Ntumbuluko wa Yehovha wu hi komba leswaku wa hi rhandza. Anakanya hi mixaka hinkwayo ya mihandzu leyi nga kona emisaveni. Yehovha a a ta swi kota ku hi nyika muxaka wun’we ntsena wa mihandzu​—⁠kumbe a nga hi nyiki. Ku ri na sweswo, Yehovha u hi nyike mixaka yo tala ya mihandzu leyi nga ni xivumbeko, mpimo, muvala ni nantswo lowu nga faniki. Leswi swi kombisa leswaku Yehovha i Xikwembu lexi nga ni rirhandzu xi tlhela xi hanana, lexi anakanyelaka ni ku va ni tintswalo swinene.​—⁠Pisalema 104:​24.