Eka Muhuweleri Wa Mfumo La Rhandzekaka:

Anakanya u ri un’wana wa vaapostola lava a va yime eNtshaveni ya Mitlhwari. Kutani Yesu a humelela eka wena. Loko a ri kusuhi ni ku tlhandlukela etilweni, a ku: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema, etikweni hinkwaro ra Yudiya ni le Samariya ni ku ya fika emakumu ka misava.” (Mit. 1:8) Xana a wu ta endla yini?

Kumbexana a wu ta hela matimba loko u anakanya ndlela leyi ntirho wolowo wu nga wukulu ha yona. A wu ta tivutisa leswaku, ‘Xana hina—vadyondzisiwa lava nga nyawuriki—hi nga swi kotisa ku yini ku chumayela “ku ya fika emakumu ka misava”?’ A swi kanakanisi leswaku wa ha xi tsundzuka xilemukiso lexi Yesu a xi vuleke hi vusiku lebyi a nga fa ha byona, u te: “Nandza a nga n’wi tluli n’wini wakwe. Loko va ndzi xanisile, na n’wina va ta mi xanisa; loko va ndzi yingisile, na n’wina va ta mi yingisa. Kambe va ta mi endla swilo leswi hinkwaswo hikwalaho ka vito ra mina, hikuva a va n’wi tivi Loyi a ndzi rhumeke.” (Yoh. 15:20, 21) Loko u ri karhi u anakanyisisa hi marito wolawo, u nga ha tivutisa leswaku, ‘Ndzi nga chumayela njhani hi rixaladza loko ndzi kanetiwa niloko ndzi xanisiwa?’

Ninamuntlha ha ha langutane ni swivutiso leswi fanaka. Ntirho wa hina tanihi Timbhoni ta Yehovha wu lava leswaku hi chumayela hi rixaladza “ku ya fika emakumu ka misava” eka “vanhu va matiko hinkwawo.” (Mat. 28:19, 20) Xana ntirho lowu hi nga wu endla njhani ngopfu-ngopfu leswi hi swi tivaka leswaku hi ta kanetiwa ni ku xanisiwa?

Buku ya Mintirho ya Vaapostola yi hi byela rungula leri tsakisaka ra ndlela leyi Yehovha a pfuneke vaapostola ni Vakreste-kulobye va lembe-xidzana ro sungula ha yona leswaku va kota ku chumayela. Buku leyi, leyi u yi hlayaka sweswi yi endleriwe ku ku pfuna leswaku u kambisisa rungula rolero ni ku vona ndlela leyi swi tsakisaka ha yona ku ri hlaya. U ta vona leswaku swi tele leswi malandza ya Xikwembu ya lembe-xidzana ro sungula ma fanaka ha swona ni malandza ya xona ya manguva lawa. Nakambe u ta vona leswaku ma fana ni hi ndlela leyi ma wu endleka ha yona ntirho wolowo. Swi le rivaleni leswaku ku anakanyisisa hi ku fana koloko swi ta tiyisa ntshembo wa wena wa leswaku Yehovha Xikwembu wa ha kongomisa nhlengeletano ya yena ya laha misaveni.

Hi tshemba hi tlhela hi khongelela leswaku ku hlaya ka wena buku ya Mintirho swi ta tiyisa ntshembo wa wena wa leswaku Yehovha u ta ku pfuna nileswaku matimba ya moya wa yena wo kwetsima ma ta ku seketela. Onge u nga va ni xivindzi xo hambeta u “komba vumbhoni lebyi heleleke hi Mfumo wa Xikwembu” ni ku pfuna van’wana leswaku va famba endleleni leyi nga ta va ponisa.—Mit. 28:23; 1 Tim. 4:16.