LOKO mi ri karhi mi chumayela hi yindlu ni yindlu, mi twa bele leyi rilaka ekule. Mpfumawulo wa yona wu ya wu twakala swinene. Loko u sungula ku vulavula ni n’wini wa muti lowu landzelaka, loyi u chumayelaka na yena wa kavanyeteka loko movha wa maphorisa wu yima. Ku huma phorisa emovheni kutani ri mi tshinelela, ivi ri vutisa ri ku: “Xana hi n’wina vanhu lava fambaka hi muti ni muti mi ­vulavula hi Bibele? Vanhu va vilela hi n’wina!” Mi hlamula hi xichavo, kutani mi vula leswaku mi ­Timbhoni ta Yehovha. Xana ku ta endleka yini endzhaku ka sweswo?

Lexi hlamarisaka swinene, leswi swi titshege hi matimu. Eka malembe lama hundzeke, xana hulumendhe ya le tikweni leri mi tshamaka eka rona yi tirhisane njhani ni Timbhoni ta Yehovha? Xana ku ni ntshunxeko wa vukhongeri? Loko swi ri tano, sweswo swi nga ha va swi titshege hi ndlela leyi vamakwerhu va n’wina va moya lava hanyeke eka makume ya malembe lama hundzeke va tirheke hi matimba ha yona eku “lweleni ni le ku simekeni ka mahungu lamanene hi nawu.” (Filp. 1:⁠7) Ku nga khathariseki leswaku u tshama kwihi, ku anakanyisisa hi swiviko swa ku hlula ka le nawini ka Timbhoni ta Yehovha swi nga ha ri tiyisa swinene ripfumelo ra wena. Eka xiyenge lexi, hi ta tlhuvutsa swin’wana swa swiviko sweswo leswi hlamarisaka. Ku hlula ka hina ku nyikela vumbhoni lebyi tsakisaka bya leswaku Mfumo i wa xiviri, hikuva a hi ta va hi nga hetisisanga swo tala hi matimba ya hina!