XIENGETELO C
Ndlela Yo Fambisa Tidyondzo Ta Bibele Hi Ku Tirhisa Buku Leyi Nge, Tiphine Hi Vutomi Hilaha Ku Nga Heriki!
Vamakwerhu va khongele swinene va tlhela va ri kambisisa hi vukheta rungula leri nga katsiwaka eka buku leyi nge, Tiphine Hi Vutomi Hilaha Ku Nga Heriki! Leswaku u yi tirhisa kahle buku leyi, tirhisa ndlela leyi loko u fambisa tidyondzo ta Bibele.
Loko mi nga si sungula dyondzo
-
1. Lunghiselela hi vukheta. Loko u ri karhi u lunghiselela, ehleketa hi swilaveko, swiyimo ni tidyondzo ta xichudeni xa wena. Ehleketa hi tinhla leti swi nga xi tikelaka ku titwisisa kumbe ku ti tirhisa. Ku kambisisa ndlela leyi rungula leri nga eka xiyenge lexi nge, “Kuma Leswi Engetelekeke” swi nga pfuna xichudeni xa wena naswona lunghekela ku xi tirhisa, hilaha swi kotekaka hakona hi nkarhi wa dyondzo.
Hi nkarhi wa dyondzo
-
2. Loko xichudeni xa wena xi pfumelelana na swona, pfulani hi xikhongelo mi tlhela mi pfala hi xona.
-
3. Tivonele leswaku u nga vulavuli ngopfu. Namarhela rungula leri u nyikiweke rona naswona tshika xichudeni xi tiphofula.
-
4. Loko mi sungula xiyenge lexintshwa xa buku, hlayani layini leyi vulavulaka hi leswi mi nga ta swi dyondza eka xiyenge xexo naswona kandziyisani tinhlokomhaka ti nga ri tingani ta dyondzo.
-
5. Loko mi heta dyondzo, tirhisa xiyenge xa mpfuxeto ku pfuna xichudeni xa wena leswaku xi tsundzuka ntiyiso lowu xi wu dyondzeke.
-
6. Loko u ri karhi u kambisisa dyondzo ha yin’we ni xichudeni xa wena:
-
Hlayani ndzimana.
-
Hlayani matsalwa hinkwawo lama kombisiweke leswaku “Hlaya.”
-
Hlayani matsalwa man’wana lama kombisiweke loko swi fanerile.
-
Tlangani tivhidiyo hinkwato leti kombisiweke leswaku “Tlanga” (loko ti ri kona).
-
Vutisa xichudeni xivutiso xin’wana ni xin’wana.
-
Kombela xichudeni xa wena leswaku xi kambisisa xiyenge lexi nge, “Anakanyisisa” naswona xi kombele leswaku xi hlamula hi ku tirhisa xona.
-
Tirhisa bokisi leri nge, “Tiyimisele Ku Endla Leswi” ku pfuna xichudeni xa wena xi vona leswaku xi famba kwihi eka vuxaka bya xona ni Xikwembu. U nga xi khutaza ku tivekela swilo swa nkarhinyana leswi xi lavaka ku swi endla, swilo swin’wana swa nkarhi wo leha leswi xi tiyimiseleke ku swi endla kumbe haswimbirhi.
-
Vutisa xichudeni xa wena loko xi tiphina hi tin’wana ta tinhlokomhaka kumbe tivhidiyo leti nga eka xiyenge lexi nge, “Kuma Leswi Engetelekeke” loko xi lunghiselela dyondzo.
-
Ringeta ku heta dyondzo yin’we hi nkarhi lowu mi dyondzaka ha wona.
-
Endzhaku ka dyondzo
-
7. Tshama u ri karhi u ehleketa hi xichudeni xa wena. Khongela eka Yehovha leswaku a katekisa leswi xichudeni xa wena xi swi endlaka a tlhela a ku nyika vutlhari byo tiva ndlela leyi u nga xi pfunaka hayona.
