Eka Vamakwerhu Lava Rhandzekaka:

Enkandziyisweni wo sungula wa magazini wa January 1, 2008, nkandziyiso wa vanhu hinkwavo wa Xihondzo xo Rindza wu hi byele hi swihloko leswintshwa swa ntlhandlamano leswi nga ni nhloko-mhaka leyi nge “Tekelela Ripfumelo Ra Vona.” Kutani ku sukela kwalaho, hi tsakisiwe hi xihloko lexintshwa xa ntlhandlamano wolowo lowu sunguleke ku humesiwa eka tin’hweti tin’wana ni tin’wana tinharhu!

Xana vanhu va angule njhani? Endzhaku ka loko muhlayi un’wana a hete ku hlaya xihloko lexi vulavulaka hi Marta u te: “Ndzi hlekile loko ndzi xi hlaya hikuva ndzi fana na yena—minkarhi hinkwayo ndzi tikarhatela ku va munhu wa kahle wo amukela vaendzi ni ku tshama ndzi khomekile kambe minkarhi yin’wana ndzi rivala hi xilaveko xo yima ndzi tiphina hi xinghana.” N’wana wa kondlo-a-ndzi-dyi u gimete hi ku vula marito lawa lama tsakisaka malunghana ni rungula ra Estere: “Ndza pfumela leswaku swi nga endleka hi tshamela ku ehleketa hi swiambalo ni fexeni ya sweswinyana. Hi fanele hi ambala kahle; kambe a hi lavi ku ambala hi ndlela leyi hundzeletiweke.” U engetele a ku: “Yehovha u khathala hi ndlela leyi hi nga ha yona endzeni.” Nakambe xihloko lexi vulavulaka hi muapostola Petro xi tsakise makwerhu wa xisati la nga Mukreste loyi a nga te: “Rungula ra kona ri ndzi tsakisile loko ndzi ri hlaya. A swi vonaka onge ndzi kona! Ndzi tirhise switwi swa mina ku twa leswi tindzimana ti ndzi kombelaka swona.”

Vahlayi lava ni van’wana va ntsandza-vahlayi lava tsaleke leswaku va kombisa ku tlangela ka vona eka swihlokwana leswi swa ntlhandlamano—va tiyisekisa leswi muapostola Pawulo a swi tsaleke khale: “Swilo hinkwaswo leswi tsariweke enkarhini lowu hundzeke swi tsaleriwe ku letela hina.” (Rhom. 15:4) Kambe, Yehovha u katse marungula lawa eBibeleni leswaku ma hi dyondzisa tidyondzo ta nkoka. Hinkwerhu ka hina, ku nga khathariseki leswaku hi na malembe mangani hi ri karhi hi tiva ntiyiso, hi nga dyondza eka wona.

Ha ku khutaza leswaku u hlaya buku leyi handle ko va ni xinamu. Yi tirhise eka xiyimiso xa Vugandzeri bya wena bya Ndyangu bya Nimadyambu—vana va ta yi rhandza! Loko vandlha ri hlaya buku yoleyo eka Dyondzo ya Bibele ya Vandlha, u nga xwi ni vhiki ni rin’we! Yi hlaye hi vukheta naswona u nga hatlisi. Tirhisa mianakanyo ya wena; endla leswaku switwi swa wena swi katseka. Ringeta ku titwa hi ndlela leyi vanhu va le Bibeleni a va titwa ha yona, ku vona leswi va swi voneke. Fanisa ndlela leyi va anguleke ha yona loko swilo swi va humelela ni ndlela leyi a wu ta va u angule ha yona.

Swa hi tsakisa swinene ku tirhisa buku leyi swin’we na n’wina. Onge yi nga tikombisa yi ri nkateko eka n’wina ni mindyangu ya n’wina. Ha mi rhandza swinene ni ku mi navelela mikateko leyinene,

Huvo Leyi Fumaka Ya Timbhoni Ta Yehovha