Swi vava ngopfu loko xaka kumbe munghana loyi u n’wi rhandzaka a susiwa evandlheni hikwalaho ko ka a nga hundzuki eka xidyoho xa yena. Ndlela leyi hi angulaka ha yona eka nkongomiso wa Bibele loko swi ta eka mhaka leyi, yi ta komba ndlela leyi hi rhandzaka Xikwembu ha yona ni ku tshembeka eka lunghiselelo ra xona. * Anakanya hi swivutiso swin’wana leswi vutisiwaka mayelana ni mhaka leyi.

Xana hi fanele hi n’wi languta njhani munhu loyi a susiweke? Bibele yi ri: “Mi tshika ku tihlanganisa na mani na mani loyi a vuriwaka makwerhu, kasi i mbhisa kumbe munhu wa makwanga kumbe mugandzeri wa swifaniso swa hava kumbe murhuketeri kumbe xidakwa kumbe mudyeleri, hambi ku ri ku dya mi nga dyi na yena munhu wo tano.” (1 Vakorinto 5:11) Kasi loko Bibele yi vulavula hi mani na mani la nga “tshamiki edyondzweni ya Kreste,” yi ri: “Mi nga tshuki mi n’wi amukela emakaya ya n’wina kumbe ku n’wi xeweta. Hikuva loyi a n’wi xewetaka u hlanganyela na yena emintirhweni yakwe yo homboloka.” (2 Yohane 9-11) A hi fanelanga hi gandzela kumbe hi hlangana hambi ku ri ku bula ni vanhu lava susiweke. Xihondzo xo Rindza xa March 1, 1982, [eka Xinghezi i xa September 15, 1981, tluka 25], tluka 12 xi ri: ‘Ku vula ntsena u ku “avuxeni” eka un’wana ku nga va goza ro sungula leri nga pfuxaka bulo kumbe ku aka vunakulobye. Xana hi nga teka goza rolero ro sungula ni munhu la susiweke?’

Xana swa boha leswaku hi tihambanisa na vona? Ina, swa boha naswona ku ni swivangelo swo hlaya. Xo sungula, hi swi endla hikwalaho ko tshembeka eka Xikwembu ni Rito ra xona. A hi yingisi Yehovha ntsena loko swi hi fambela kahle, kambe hi endla tano hambiloko hi langutane ni swiyimo swo tika. Ku rhandza Xikwembu swi endla leswaku hi yingisa milawu ya xona ni ku xiya leswaku xa tshembeka minkarhi hinkwayo naswona xa hi rhandza, ni leswaku milawu ya xona yi vuyerisa hina. (Esaya 48:17;  1 Yohane 5:3) Xivangelo xa vumbirhi hi leswaku ku tihambanisa ni mudyohi loyi a nga hundzukiki swi ta hi sirhelela ni ku sirhelela swirho hinkwaswo swa vandlha leswaku swi nga ngheniwi hi moya wa yena ni ku endla leswaku vandlha ri tshama ri ri ni ndhuma ya kahle. (1 Vakorinto 5:6, 7) Xa vunharhu, ku namarhela ka hina milawu ya Bibele swi nga pfuna loyi a susiweke. Loko hi seketela xiboho xa komiti ya vuavanyisi, hi nga khumba mbilu ya mudyohi loyi a tsandzekeke ku yingisa vakulu loko va n’wi pfuna. Loko hi nga vulavuli ni munghana wa hina la susiweke hi ta n’wi pfuna leswaku ‘a ti anakanyisisa kahle,’ kutani a vona leswaku u endle xidyoho lexikulu nileswaku a teka magoza lama faneleke leswaku a tlhelela eka Yehovha.—Luka 15:17.

Xana hi ta endla yini loko loyi a susiweke ku ri xaka ra hina? Loko swi ri tano, swirho swa ndyangu swi nga tikuma swi ringeka leswaku swi tlula milawu ya Yehovha. Xana hi fanele hi ri languta njhani xaka leri susiweke? A hi nge koti ku hlamusela swiyimo hinkwaswo leswi nga va ka kona, kambe hi ta hlamusela swimbirhi leswi tolovelekeke.

Eka xiyimo xo sungula, swi nga ha endleka munhu loyi a susiweke a ha tshama ni ndyangu wa ka vona. Ku susiwa ka yena a swi vuli leswaku a nga ha ri xirho xa ndyangu, swi nga ha endleka leswaku a tama a khumbeka eka mintirho leyi endliwaka siku ni siku ekaya. Kambe, hikwalaho ka swiendlo swa yena u hlawule ku dlaya lunghelo leri a a ri na rona ro gandzela Xikwembu swin’we ni ndyangu wa ka vona. Swirho swa ndyangu leswi tshembekaka a swi nge buli na yena hi timhaka leti khumbaka vuxaka bya swona ni Xikwembu. Hi xikombiso, loko ndyangu wu hlangana leswaku wu ta dyondza Bibele, a nga tshama a yingisela ntsena. Kambe loko munhu loyi a susiweke ku ri n’wana, vatswari va ha ri ni vutihlamuleri bya ku n’wi dyondzisa ni ku n’wi laya. Kutani vatswari lava nga ni rirhandzu va ta endla matshalatshala yo dyondza na yena. *—Swivuriso 6:20-22; 29:17.

Eka xiyimo xa vumbirhi, munhu loyi a susiweke a nga va xirho xa ndyangu kambe a nga ha tshami ekaya ka vona. Hambileswi  minkarhi yin’wana swi nga lavaka leswaku xirho lexi xi hlangana ni vandyangu leswaku ku ta endliwa swo karhi leswi khumbanaka ni ndyangu, kambe ku hlangana koloko ku fanele ku va ka xinkarhana. Vakreste lava tshembekaka a va lavi tindlela ta ku hlangana ni xaka leri susiweke leri nga tshamiki na vona ekaya. Ku ri na sweswo ku tshembeka ka vona eka Yehovha ni nhlengeletano yakwe swi va endla leswaku va yingisa nawu wa Matsalwa loko swi ta eka vanhu lava susiweke. Loko va endla tano va ta va va pfuna loyi a susiweke leswaku a pfuneka eka ndzayo leyi a yi kumeke. *—Vaheveru 12:11.