Xana u ehleketa leswaku vutomi byi ni xikongomelo? William B. Provine mutivi wa dyondzo ya ku tiendlekela ka swilo u ri: “Leswi hi nga swi dyondza hi mhaka ya ku tiendlekela ka swilo swi hi khumbile swinene naswona swi khumbe ndlela leyi hi byi langutaka ha yona vutomi.” Xana u gimete hi ku yini? “Ndzi vona onge vanhu swin’we ni vuako hinkwabyo a swi na xikongomelo.”³²

Ehleketisisa hileswi marito wolawo ma vulaka swona. Loko vutomi a byi nga ri na xikongomelo, a wu nga ta va ni xikongomelo evuton’wini handle ko ringeta ku endla swo karhi leswinene, kumbexana u hundzisela swiendlo swa wena swa xitekela eka xitukulwana lexi landzelaka. Loko u fa, a swi ta va swi herile hi wena. Byongo bya wena, swin’we ni vuswikoti bya byona bya ku ehleketa ni ku ehleketisisa hi leswi vutomi byi vulaka swona, a ku to va ku ri nchumu lowu tiendlekelaka hi xiwelo hi ndlela ya ntumbuluko.

A swi heleli kwalaho. Vanhu vo tala lava pfumelaka eka dyondzo ya ku tiendlekela ka swilo va vula leswaku Xikwembu a xi kona kumbe a xi nge ngheneleli etimhakeni ta vanhu. Loko swi ri tano, swi vula leswaku vumundzuku bya hina byi titshege hi van’watipolitiki, swidyondzeki ni varhangeri va vukhongeri. Hi ku ya hi leswi se va swi endleke, mpfilumpfilu, hasahasa ni vukanganyisi leswi onhaka vanhu swi ta ya emahlweni swi va kona. Loko dyondzo ya ku tiendlekela ka swilo a yi ri ntiyiso, a ku ta va ni xivangelo lexi twalaka xo hanya hi marito yo tilan’wa lama nge: “A hi dyeni hi nwa, hikuva mundzuku hi ta fa.”—1 Vakorinto 15:32.

Kambe ku hambana ni sweswo, Bibele yi dyondzisa leswi landzelaka, loko yi ku: ‘I [Xikwembu] xi nga ni xihlovo xa vutomi.’ (Pisalema 36:9) Marito wolawo i ya risima swinene.

Loko leswi Bibele yi swi vulaka ku ri ntiyiso, kutani vutomi byi ni xikongomelo. Muvumbi wa hina u ni xikongomelo lexinene hi vanhu lava hlawulaka ku hanya hi ku rhandza ka yena. (Eklesiasta 12:13) Xikongomelo xexo xi katsa xitshembiso xa ku hanya emisaveni leyi nga riki na mpfilumpfilu, tinyimpi ni vuhomboloki—hambi ku ri rifu.—Pisalema 37:10, 11; Esaya 25:6-8.

Hikwalaho ka xivangelo xexo lexinene, vanhu va timiliyoni emisaveni hinkwayo va pfumela leswaku ku dyondza hi Xikwembu ni ku xi yingisa swi endla leswaku vutomi byi va ni xikongomelo! (Yohane 17:3) Ku pfumela koloko a ku seketeriwanga eka swilo leswi ehleketekiwaka ntsena. Vumbhoni byi lo dlaa, erivaleni—vutomi byi tumbuluxiwile.