DYONDZO 10
Ku Ya eTinhlengeletanweni Ta Timbhoni Ta Yehovha Swi Nga Ku Pfuna Njhani?
Xana u tshama u rhambiwa ku ya etinhlengeletanweni ta Timbhoni ta Yehovha? Loko u nga si tshama u ya, swi nga endleka swi ku chuhisanyana loko u ehleketa hi ku ya. U nga ha tivutisa: ‘Ku endliwa yini kwale? Hikwalaho ka yini swi ri swa nkoka leswaku ndzi va kona?’ Eka dyondzo leyi, u ta dyondza hi ndlela leyi ku hlengeletana ni van’wana swi nga ku pfunaka ha yona ni ku tlhela u tshinela eka Xikwembu.
1. Hikwalaho ka yini swi ri swa nkoka ku hlengeletana ni van’wana?
Xiya xivangelo xa nkoka xo va hi hlangana ni van’wana lexi mutsari un’wana wa Bibele a xi hlamuseleke: “Ndzi ta dzunisa Yehovha enhlengeletanweni leyikulu.” (Pisalema 26:12) Hilaha ku fanaka, Timbhoni ta Yehovha ta tsaka swinene loko ti hlengeletana swin’we. Emisaveni hinkwayo ta hlangana vhiki ni vhiki leswaku ti dzunisa Xikwembu, ti yimbelela ni ku tlhela ti khongela. Nakambe hi mikarhi yo karhi elembeni ti ya etinhlengeletanweni letikulu leswaku ti gandzela swin’we.
2. U ta dyondza yini etinhlengeletanweni ta hina?
Etinhlengeletanweni hi dyondza Rito ra Xikwembu, ‘ri hlamuseriwa kahle, ri endliwa ri twisiseka.’ (Hlaya Nehemiya 8:8.) Loko u ta, u ta dyondza hi Yehovha ni vumunhu byakwe. Loko u ya u tiva leswaku wa ku rhandza, u ta lava ku va munghana wakwe. U ta tlhela u dyondza leswaku u lava ku ku pfuna u tiphina hi vutomi.—Esaya 48:17, 18.
3. Swi ta ku pfuna njhani ku hlangana ni van’wana etinhlengeletanweni ta Timbhoni?
Yehovha u lava hi ‘khathalelana hi khutazana ku rhandzana ni ku endla mitirho leyinene, hi nga tshiki ku hlengeletana.’ (Vaheveru 10:24, 25) Etinhlengeletanweni ta hina u ta kuma vanhu lava rhandzanaka swinene, lava rhandzaka ku dyondza hi Xikwembu ku fana na wena. U ta va twa va ri karhi va khutazana hi Bibele. (Hlaya Varhoma 1:11, 12.) U ta hlangana ni ku vulavula ni vanhu lava cateke ni lava nga catangiki lava tsakeke hambiloko va ri ni swiphiqo. Sweswo hi swin’wana swa swivangelo leswi endlaka Yehovha a lava leswaku hi hlangana nkarhi ni nkarhi.
ANAKANYISISA
Kumisisa leswi endliwaka etinhlengeletanweni ta Timbhoni ta Yehovha ni leswaku hikwalaho ka yini u fanele u endla hinkwaswo leswi u nga swi kotaka leswaku u va kona.
4. Tinhlengeletano ta Timbhoni ta Yehovha
Vakreste vo sungula va le mikarhini ya ku tsariwa ka Bibele a va hlengeletana nkarhi na nkarhi leswaku va dzunisa Yehovha. (Varhoma 16:3-5) Hlaya Vakolosa 3:16, ivi mi bula hi xivutiso lexi:
-
Vakreste vo sungula a va n’wi dzunisa njhani Yehovha?
Ninamuntlha, Timbhoni ta Yehovha ta hlengeletana nkarhi ni nkarhi etindhawini leti ti dzunisaka Xikwembu eka tona. Leswaku u vona leswi endlekaka loko ti hlengeletanile, Tlanga VHIDIYO. Ivi u languta xifaniso xa loko Timbhoni ti hlanganile kutani mi bula hi swivutiso leswi landzelaka.
-
Leswi u swi hlayeke eka Vakolosa 3:16 swi fana njhani ni leswi swi endlekaka eHolweni ya Timbhoni?
-
Eka vhidiyo kumbe eka xifaniso, ku na leswi swi ku tsakiseke hi leswi endlekaka etinhlengeletanweni ta Timbhoni?
Hlaya 2 Vakorinto 9:7, ivi mi bula hi xivutiso lexi:
-
Hikwalaho ka yini ku nga hakeriwi mali etinhlengeletanweni ta Timbhoni ta Yehovha?
Langutani leswi ku nga ta dyondziwa swona eka nhlengeletano ya vhiki leri.
-
Hi swihi leswi u languteleke ku swi twa hi mahlongati kumbe leswi u vonaka onge swi ta ku pfuna?
Xana a wu swi tiva?
Eka jw.org, u nga kuma ndhawu ni siku leri tinhlengeletano ta hina ti khomiwaka ha rona emisaveni hinkwayo.
-
Etinhlengeletanweni ha dyondzisiwa hi mimbulavulo, minkombiso ni tivhidiyo. Hi sungula hi risimu ni hi xikhongelo hi tlhela hi pfala hi swona
-
Loko hi ri karhi hi dyondza vanhu va nyikiwa ni nkarhi wa ku hlamula
-
Vanhu hinkwavo va amukelekile, mindyangu, lava nga si cataka, vadyuhari ni vana
-
Etinhlengeletanweni ta hina a ku hakeriwi mali. Timbhoni ta Yehovha a ti koleki mali hi xindhichani
5. Tikarhatele ku va kona etinhlengeletanweni
Xiya xikombiso xa ndyangu wa ka va Yesu. A va fanele va famba kwalomu ka masiku manharhu etintshaveni ku suka eNazareta ku ya eYerusalema leswaku va va kona eka nhlengeletano ya lembe ni lembe. Hlaya Luka 2:39-42, ivi mi bula hi swivutiso leswi:
-
U vona onge va endle matshalatshala yo karhi leswaku va kota ku ya eYerusalema?
-
Hikwalaho ka yini u fanele u endla matshalatshala leswaku u va kona etinhlengeletanweni?
-
U vona onge swi ta ku pfuna? Hikwalaho ka yini u vula tano?
Bibele yi vula leswaku ku hlangana swin’we hi dzunisa Xikwembu i swa nkoka. Hlaya Vaheveru 10:24, 25, ivi mi bula hi xivutiso lexi:
-
Hikwalaho ka yini hi fanele hi va kona etinhlengeletanweni nkarhi ni nkarhi?
VAN’WANA VA RI: “A swi bohi ku hlangana ni van’wana leswaku hi dzunisa Xikwembu. Ndzi nga tihlayela Bibele ekaya.”
-
Hi rihi tsalwa kumbe xikombiso xa le Bibeleni lexi kombisaka leswi Yehovha a swi lavaka?
NKATSAKANYO
Ku va kona etinhlengeletanweni swi ta ku pfuna leswaku u dyondza swo tala hi Yehovha, u ya u va munghana wakwe ni ku n’wi dzunisa u ri ni van’wana.
Mpfuxeto
-
Hikwalaho ka yini Yehovha a lava leswaku hi hlengeletana ni van’wana?
-
I yini leswi u nga ta swi dyondza etinhlengeletanweni ta Timbhoni ta Yehovha?
-
Swi ta ku pfuna njhani loko u ya etinhlengeletanweni?
KUMA LESWI ENGETELEKEKE
A hi nge wa chava ku ya enhlengeletanweni ya Timbhoni. Vona ndlela leyi wanuna un’wana loyi a a titwa hi ndlela yoleyo a sunguleke ku rhandza ku ya etinhlengeletanweni ha yona.
Xiya ndlela leyi jaha rin’wana ri tiphineke ha yona loko ri ya etinhlengeletanweni ni leswi ri swi endleke leswaku ri nga lovhi.
Twana ndlela leyi van’wana va titwaka ha yona loko va ya etinhlengeletanweni.
Twana ndlela leyi wanuna un’wana loyi a ri tsotsi a cinceke vutomi bya yena ha yona endzhaku ka loko a ye etinhlengeletanweni ta Timbhoni ta Yehovha.
“A Ndzi Tshama Ndzi Ri Ni Xibamu” (Xihondzo xo Rindza, July 1, 2014)
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
