DYONDZO 38
Kombisa Leswaku Wa Yi Khensa Nyiko Ya Vutomi
Ku ni swilo swo tala swo tsakisa leswi hi nga tiphinaka ha swona evuton’wini. Hambiloko hi pfa hi va ni swiphiqo, swi kona swin’wana leswi hi nga tiphinaka ha swona evuton’wini. Hi nga swi kombisa njhani leswaku ha yi khensa nyiko ya vutomi? Hi xihi xivangelonkulu lexi endlaka hi khensa nyiko leyi ya vutomi?
1. Hikwalaho ka yini hi fanele hi khensa nyiko ya vutomi?
Hi fanele hi khensa vutomi hikuva i nyiko leyi humaka eka Yehovha, Tata wa hina la nga ni rirhandzu. Yehovha i “xihlovo xa vutomi,” u tumbuluxe swilo hinkwaswo leswi hanyaka. (Pisalema 36:9) “Hi [yena a] nyikaka vanhu hinkwavo vutomi ni moya ni swilo hinkwaswo.” (Mitirho 17:25, 28) Yehovha u hi nyika swilo leswi lavekaka leswaku hi kota ku hanya. Kambe u tlhela a endla swi koteka leswaku hi tiphina hi vutomi.—Hlaya Mitirho 14:17.
2. Hi nga swi kombisa njhani leswaku ha n’wi khensa Yehovha hikwalaho ka nyiko ya vutomi?
Ku sukela loko wa ha ku vumbeka ekhwirini, Yehovha u ku hlayisile. Eka xikhongelo lexi Yehovha a xi katseke eRitweni rakwe, Davhida nandza wakwe u n’wi byele a ku: “Matihlo ya wena ma ndzi vone ndza ha vumbeka.” (Pisalema 139:16) Vutomi bya wena i bya risima swinene eka Yehovha. (Hlaya Matewu 10:29-31.) U twa ku vava swinene loko hi vomu munhu a dlaya un’wana kumbe a tisunga. a (Eksoda 20:13) Swi n’wi twisa ku vava Yehovha loko hi veka vutomi bya hina ekhombyeni swi nga bohi kumbe hi veka vutomi bya van’wana ekhombyeni. Loko hi tihlayisa hi tlhela hi xixima vutomi bya van’wana hi kombisa leswaku ha yi khensa nyiko ya vutomi.
ANAKANYISISA
Xiya leswi u nga swi endlaka ku kombisa leswaku wa yi tlangela nyiko ya vutomi.
3. Khathalela rihanyo ra wena
Vakreste lava tinyiketeleke va tirhisa vutomi bya vona leswaku va tirhela Yehovha. Loko va endla sweswo, swi fana ni loko va nyikela mimiri ya vona eka Xikwembu yi va gandzelo. Hlaya Varhoma 12:1, 2, ivi mi bula hi swivutiso leswi:
-
I yini leswi faneleke swi ku susumeta ku khathalela rihanyo ra wena?
-
Hi tihi tindlela tin’wana leti u nga swi endlaka ha tona sweswo?
4. U nga veki vutomi bya wena ni bya van’wana ekhombyeni
Bibele yi hi tsundzuxa ku papalata ku endla swilo leswi nga ni khombo. Tlanga VHIDIYO leswaku u dyondza hi swilo leswi nga ta ku pfuna leswaku u nga veki vutomi ekhombyeni.
Hlaya Swivuriso 22:3, ivi mi bula hi ndlela leyi vutomi bya wena ni bya van’wana byi nga sirhelelekaka ha yona loko . . .
-
u ri ekaya.
-
u ri entirhweni.
-
u ri eku tlangeni.
-
u ri eku chayeleni kumbe u khandziye xo famba.
5. Xixima vutomi bya n’wana la ha riki ekhwirini
Loko Davhida a tlhokovetsela, u hlamusele ndlela leyi Yehovha a byi langutaka ha yona vutomi bya n’wana la nga le ku kuleni ekhwirini. Hlaya Pisalema 139:13-17, ivi mi bula hi xivutiso lexi:
-
Hi ku ya hi Yehovha, xana vutomi bya munhu byi sungula loko mana wakwe a ha ku tika kumbe loko a n’wi veleka?
Yehovha a a nyike tiko ra khale ra Israyele milawu leyi a yi sirhelela vamanana ni vana va vona lava nga si velekiwaka. Hlaya Eksoda 21:22, 23, ivi mi bula hi swivutiso leswi:
-
Yehovha a a n’wi languta njhani munhu loyi hi xihoxo a dlayaka n’wana la nga si velekiwaka?
-
Yehovha u titwa njhani loko munhu o dlaya n’wana la nga si velekiwaka hi vomu? b
-
U titwa njhani hi ndlela leyi Xikwembu xi titwaka ha yona hi mhaka leyi?
Hambi ku ri wansati la byi tekaka byi ri bya nkoka vutomi, a nga ha titwa a boheka ku susa khwiri. Hlaya Esaya 41:10, ivi mi bula hi swivutiso leswi:
-
Loko wansati a sindzisiwa ku susa khwiri, u vona onge i mani la nga n’wi pfunaka? Hikwalaho ka yini u vula tano?
VAN’WANA VA RI: “Wansati u ni mfanelo yo hlawula loko a lava ku susa khwiri, a ni ri i miri wa yena.”
-
I yini lexi endlaka u tshemba leswaku Yehovha u teka vutomi bya manana ni bya n’wana wakwe la ha riki ekhwirini byi ri bya nkoka?
NKATSAKANYO
Bibele yi hi dyondzisa ku rhandza, ku xixima ni ku sirhelela nyiko ya vutomi leyi Yehovha a hi nyikeke yona. Leswi hi swi endla eka vutomi bya hina ni bya vanhu van’wana.
Mpfuxeto
-
Hikwalaho ka yini vutomi bya vanhu byi ri bya nkoka eka Yehovha?
-
Yehovha u titwa njhani loko munhu a dlaya un’wana hi vomu?
-
Hikwalaho ka yini u yi khensa nyiko ya vutomi?
KUMA LESWI ENGETELEKEKE
Hi nga n’wi khensa njhani Yehovha hikwalaho ka nyiko ya vutomi?
Kuma nhlamulo ya xivutiso lexi nge, Xana Xikwembu xi ta n’wi rivalela wansati la nga tshama a susa khwiri?
“Bibele Yi Ri Yini Hi Ku Susa Khwiri?” (Nhlokomhaka leyi kumekaka eka website)
Dyondza ndlela leyi Xikwembu xi titwaka ha yona hi vutomi loko u hlawula vuhungasi.
“Xana U Fanele Ku Tipeta eKhombyeni Ra ‘Mintlango Leyi Hundzeletiweke’?” (Xalamuka!, October 8, 2000)
Ku vuriwa yini loko munhu a ehleketa hi ku tisunga? Twana leswaku Bibele yi nga n’wi pfuna njhani.
a Yehovha u khathala swinene hi lava tshovekeke timbilu. (Pisalema 34:18) U ku twisisa kahle ku vava loku vanhu van’wana va ku twaka loku endlaka va lava ku tisunga naswona u lava ku va pfuna. Leswaku u vona ndlela leyi mpfuno wa Yehovha wu nga n’wi pfunaka ha yona munhu loyi a ehleketaka hi ku tisunga, hlaya nhlokomhaka leyi nge “Ndzi Lava Ku Tidlaya—Xana Bibele Yi Nga Ndzi Pfuna Loko Ndzi Ehleketa Hi Ku Tisunga?” leyi kumekaka eka xiyenge lexi nge Kuma Leswi Engetelekeke eka dyondzo leyi.
b Lava nga tshama va susa khwiri a va fanelanga va titwa nandzu ku tlula mpimo hikuva Yehovha a nga va rivalela. Leswaku u kuma rungula leri engetelekeke, vona nhlokomhaka leyi nge “Bibele Yi Ri Yini Hi Ku Susa Khwiri?” leyi nga eka xiyenge lexi nge Kuma Leswi Engetelekeke eka dyondzo leyi.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
