DYONDZO 54
I Mani “Nandza Wo Tshembeka Ni Wo Tlhariha” Naswona U Tirha Yini?
Yesu i Nhloko ya vandlha ra Vukreste. (Vaefesa 5:23) Namuntlha Yesu u kongomisa valandzeri vakwe va laha misaveni a ri etilweni hi ku tirhisa “nandza wo tshembeka ni wo tlhariha.” (Hlaya Matewu 24:45.) “Nandza” loyi u vekiwe hi Kreste naswona u nyikiwe vulawuri byo karhi, kambe u tshama a ri nandza wa Kreste naswona u tirhela vamakwavo va Kreste. I mani nandza yoloye? U hi khathalela njhani?
1. I mani “nandza wo tshembeka ni wo tlhariha”?
Mikarhi hinkwayo Yehovha u tirhise munhu kumbe ntlawa lowutsongo wa vavanuna leswaku va kongomisa vanhu vakwe. (Malakiya 2:7; Vaheveru 1:1) Endzhaku ka ku fa ka Yesu, vaapostola ni vakulukumba va le Yerusalema hi vona va rhangeleke. (Mitirho 15:2) Hi ku landzela endlelo rero, namuntlha ntlawa lowutsongo wa vakulu, ku nga Huvo leyi Fumaka ya Timbhoni ta Yehovha, wu dyondzisa tidyondzo leti humaka eRitweni ra Xikwembu wu tlhela wu kongomisa ntirho wo chumayela. Ntlawa wolowo i “nandza wo tshembeka ni wo tlhariha, loyi [Yesu] a n’wi vekeke.” (Matewu 24:45a) Swirho hinkwaswo swa Huvo leyi Fumaka i Vakreste lava hlawuriweke hi moya, lava languteleke ku ya fuma na Kreste eMfun’weni wakwe wa le tilweni loko va fa.
2. Nandza wo tshembeka u hi nyika yini?
Yesu u vule leswaku nandza wo tshembeka a a ta “phamela [Vakrestekulobye] swakudya hi nkarhi lowu faneleke.” (Matewu 24:45b) Leswi swakudya swi hi tiyisaka miri ni ku hi nyika rihanyo lerinene, tidyondzo leti humaka eRitweni ra Xikwembu na tona ti hi nyika matimba yo tshama hi tshembekile eka Yehovha ni ku endla ntirho lowu Yesu a hi nyikeke wona. (1 Timotiya 4:6) Tidyondzo toleto hi ti kuma etinhlengeletanweni ta vandlha, ta muganga ni ta xifundzha, eka mikandziyiso leyi sekeriweke eBibeleni ni le ka tivhidiyo leti hi pfunaka ku twisisa ku rhandza ka Xikwembu ti tlhela ti tiyisa vunghana bya hina na xona.
ANAKANYISISA
Twana leswi endlaka hi lava “nandza wo tshembeka ni wo tlhariha,” ku nga Huvo leyi Fumaka.
Huvo leyi Fumaka yi dyondzisa tidyondzo leti humaka eRitweni ra Xikwembu, yi tlhela yi kongomisa ni ku pfuna Timbhoni ta Yehovha emisaveni hinkwayo
3. Vanhu va Yehovha va fanele va hleriwa kahle
Huvo leyi Fumaka yi hlela ntirho wa Timbhoni ta Yehovha yi kongomisiwa hi Yesu. Ni le nkarhini wa Vakreste vo sungula swilo a swi endliwa hi ndlela leyi fanaka. Tlanga VHIDIYO.
Hlaya 1 Vakorinto 14:33, 40, ivi mi bula hi xivutiso lexi:
-
Tindzimana leti ti swi kombisa njhani leswaku Yehovha u lava leswaku Timbhoni ta yena ti hleleka?
4. Nandza wo tshembeka u hlela ntirho wa hina wo chumayela
Ku chumayela a ku ri ntirho wa nkoka swinene lowu a wu endliwa hi Vakreste vo sungula. Hlaya Mitirho 8:14, 25, ivi mi bula hi swivutiso leswi:
-
I vamani lava a va kongomisa ntirho wo chumayela exikarhi ka Vakreste vo sungula?
-
Petro na Yohane va endle yini loko va kongomisiwa hi vaapostolakulobye?
Ku chumayela i ntirho wa nkoka swinene lowu hleriwaka hi Huvo leyi Fumaka. Tlanga VHIDIYO.
Yesu u kombise ndlela leyi swi nga swa nkoka ha yona ku chumayela. Hlaya Marka 13:10, ivi mi bula hi swivutiso leswi:
-
Hikwalaho ka yini ntirho wo chumayela wu ri wa nkoka swinene eka Huvo leyi Fumaka?
-
Hikwalaho ka yini hi lava “nandza wo tshembeka ni wo tlhariha” leswaku a hlela ntirho lowu, lowu endliwaka emisaveni hinkwayo?
5. Nandza wo tshembeka wa hi kongomisa
Huvo leyi Fumaka yi kongomisa Vakreste emisaveni hinkwayo. Yi swi endlisa ku yini sweswo? Twana ndlela leyi huvo leyi fumaka ya Vakreste vo sungula a yi swi endlisa xiswona. Hlaya Mitirho 15:1, 2, ivi mi bula hi swivutiso leswi:
-
I mhaka yini leyi endleke Vakreste van’wana vo sungula va pfuxa hoyihoyi?
-
Pawulo, Barnaba ni van’wana va ye eka vamani leswaku va ya kombela mpfuno?
Hlaya Mitirho 15:12-18, 23-29, ivi mi bula hi xivutiso lexi:
-
Loko huvo leyi fumaka yi nga si teka xiboho, i yini leswi yi swi endleke leswaku yi kuma nkongomiso wa Xikwembu emhakeni yoleyo?—Vona ndzimana 12, 15 na 28.
Hlaya Mitirho 15:30, 31 na 16:4, 5, ivi mi bula hi swivutiso leswi:
-
Vakreste vo sungula va endle yini endzhaku ko twa nkongomiso lowu humaka eka huvo leyi fumaka?
-
Yehovha u va katekise njhani hi leswi va yingiseke?
Hlaya 2 Timotiya 3:16 na Yakobo 1:5, ivi mi bula hi xivutiso lexi:
-
Huvo leyi Fumaka yi wu kuma kwihi nkongomiso loko yi endla swiboho namuntlha?
VAN’WANA VA RI: “Loko u yingisa Huvo leyi Fumaka, u landzela vanhu.”
-
I yini lexi endlaka u tshemba leswaku Yesu u kongomisa Huvo leyi Fumaka?
NKATSAKANYO
Huvo leyi Fumaka i “nandza wo tshembeka ni wo tlhariha” la vekiweke hi Kreste. Yi kongomisa Vakreste emisaveni hinkwayo yi tlhela yi va dyondzisa tidyondzo leti humaka eRitweni ra Xikwembu.
Mpfuxeto
-
I mani la vekeke “nandza wo tlhariha ni wo tshembeka”?
-
Huvo leyi Fumaka yi hi khathalela njhani?
-
Xana wa tshemba leswaku Huvo leyi Fumaka i “nandza wo tlhariha ni wo tshembeka”?
KUMA LESWI ENGETELEKEKE
Hlaya leswaku u twa ndlela leyi Huvo leyi Fumaka yi hleriweke ha yona ku endla ntirho wa yona.
“I Yini Huvo Leyi Fumaka Ya Timbhoni Ta Yehovha?” (Nhlokomhaka leyi kumekaka eka website)
Twana leswi Huvo leyi Fumaka yi swi endlaka leswaku yi tiyiseka leswaku hi dyondzisiwa tidyondzo leti nga ntiyiso leti humaka eRitweni ra Xikwembu.
Swirho swa Huvo leyi Fumaka swi titwa njhani hi ntirho lowu Yesu a swi nyikeke wona?
Tinhlengeletano ta vandlha ni ta swifundzha ti swi kombisa njhani leswaku Yehovha u kongomisa Huvo leyi Fumaka?
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
