DYONDZO 55
Seketela Vandlha Ra N’wina
Emisaveni hinkwayo, vanhu va timiliyoni va gandzela Yehovha emavandlheni ya magidi va tsakile. Va wu tlangela nkongomiso ni dyondzo leyi va yi kumaka naswona va seketela vandlha hi tindlela to tala hi ku swi rhandza. Xana u titwa tano hi vandlha ra n’wina?
1. U nga wu tirhisa njhani nkarhi ni matimba ya wena leswaku u seketela vandlha?
Hinkwerhu ka hina hi nga pfuna evandlheni. Hi xikombiso, xana evandlheni ra n’wina ku ni vadyuhari kumbe lava vabyaka? Xana u nga va pfuna leswaku va va kona etinhlengeletanweni ta vandlha? Kumbe xana u nga va pfuna hi swilo swin’wana swo fana ni ku ya va xavela leswi va swi lavaka kumbe hi ku va basisela yindlu ya vona? (Hlaya Yakobo 1:27.) Hi nga tlhela hi pfuneta loko ku basisiwa ni loko ku lunghisiwa Holo ya Mfumo. A ku na munhu loyi a hi sindzisaka ku endla swilo leswi. Ndlela leyi hi rhandzaka Xikwembu ni vamakwerhu swi hi susumetela ku “tinyiketela hi ku swi rhandza.”—Pisalema 110:3.
Timbhoni leti khuvuriweke ti nga seketela vandlha hi tindlela tin’wana. Vamakwerhu va xinuna lava fikelelaka swilaveko swa le Bibeleni va nga va malandza ya vutirheli naswona hi ku famba ka nkarhi va nga va vakulu. Vamakwerhu va xinuna ni va xisati va nga seketela ntirho wo chumayela hi ku va maphayona. Timbhoni tin’wana ti nga pfuneta loko ku akiwa tindhawu to gandzela eka tona kumbe ti rhurhela endhawini leyi vandlha ra kona ri lavaka ku pfuniwa hi tindlela tin’wana.
2. Hi nga swi tirhisa njhani swilo swa hina leswaku hi seketela vandlha?
Hi nga “xixima Yehovha hi swilo swa [hina] swa nkoka.” (Swivuriso 3:9) Ha tsaka loko hi nyikela hi mali ni hi swilo swin’wana leswaku hi seketela vandlha ra hina ni ntirho wo chumayela lowu endliwaka emisaveni hinkwayo. (Hlaya 2 Vakorinto 9:7.) Minyikelo ya hina yi tlhela yi tirhisiwa ku phalala loko ku ri ni mhangu. Vo tala va hlawula ku “veka swo karhi etlhelo” nkarhi ni nkarhi leswaku va ta nyikela hi swona. (Hlaya 1 Vakorinto 16:2.) Hi nga nyikela emabokisini ya minyikelo ya le tindhawini leti hi hlanganyelaka eka tona kumbe u tirhisa donate.pr418.com. Yehovha u hi nyika nkarhi wa ku kombisa leswaku ha n’wi rhandza hi ndlela leyi hi tirhisaka swilo swa hina ha yona.
ANAKANYISISA
Xiya tindlela tin’wana leti u nga seketelaka vandlha ha tona.
3. Hi nga tirhisa swilo swa hina
Yehovha u rhandza munhu loyi a nyikaka a tsakile, na Yesu u titwa hi ndlela leyi fanaka. Hi xikombiso, Yesu u bumabumele noni leyi nga xisiwana kambe yi nyikeleke. Hlaya Luka 21:1-4, ivi mi bula hi swivutiso leswi:
-
Xana hi fanele hi nyikela hi mali ya ku tala leswaku hi tsakisa Yehovha?
-
Yehovha na Yesu va titwa njhani loko hi nyikela swi huma embilwini?
Leswaku u vona ndlela leyi minyikelo ya hina yi tirhisiwaka ha yona, tlanga VHIDIYO. Endzhaku mi bula hi xivutiso lexi landzelaka.
-
Minyikelo yi tirhisiwa njhani leswaku mavandlha emisaveni hinkwayo ma pfuneka?
4. Hi nga pfuneta hi ku tirha hi ku swi rhandza
Emikarhini ya Bibele, vagandzeri va Yehovha va tirhe hi matimba leswaku tindhawu leti va gandzelaka eka tona ti tshama ti ri exiyin’weni lexinene. Kambe sweswo a swi nga katsi ku nyikela hi mali ntsena. Hlaya 2 Tikronika 34:9-11, ivi mi bula hi xivutiso lexi:
-
Muisrayele un’wana ni un’wana u pfunete njhani ku khathalela yindlu ya Yehovha kumbe ndhawu yo gandzela eka yona?
Leswaku u vona ndlela leyi Timbhoni ta Yehovha ti xi landzelaka ha yona xikombiso xolexo xa khale, tlanga VHIDIYO. Endzhaku mi bula hi swivutiso leswi landzelaka.
-
Hikwalaho ka yini swi ri swa nkoka ku basisa Holo ya hina ya Mfumo ni ku yi endla yi tshama yi ri exiyin’weni lexinene?
-
U nga pfuneta njhani?
5. Vamakwerhu va xinuna va nga tikarhatela ku fanelekela ku endla leswi engetelekeke evandlheni
Matsalwa ma khutaza vavanuna lava nga Vakreste leswaku va tikarhatela ku fanelekela ku endla leswi engetelekeke leswaku va pfuna vandlha. Leswaku u vona xikombiso xa leswi, tlanga VHIDIYO. Endzhaku u hlamula xivutiso lexi landzelaka.
-
Eka vhidiyo leyi, Ryan u endle yini leswaku a ta fanelekela ku endla leswi engetelekeke evandlheni?
Bibele yi hlamusela leswi languteriweke eka vamakwerhu va xinuna lava nga malandza ya vutirheli ni lava nga vakulu. Hlaya 1 Timotiya 3:1-13, ivi mi bula hi swivutiso leswi:
-
I yini leswi languteriweke eka vamakwerhu va xinuna lava lavaka ku va malandza ya vutirheli ni vakulu?
-
I yini leswi languteriweke eka mindyangu ya vona?—Vona ndzimana 4 na 11.
-
Loko vamakwerhu va xinuna va fanelekela ku va malandza ni vakulu, un’wana ni un’wana evandlheni u vuyeriwa njhani?
UN’WANA A NGA HA KU VUTISA A KU: “Timbhoni ta Yehovha ti yi kuma kwihi mali ya ku endla swilo leswi ti swi endlaka?”
-
A wu ta n’wi hlamula njhani?
NKATSAKANYO
Yehovha u ma tlangela swinene matshalatshala lawa hi ma endlaka leswaku hi seketela vandlha hi nkarhi ni matimba ya hina ku katsa ni swilo swa hina.
Mpfuxeto
-
Hi nga wu tirhisa njhani nkarhi ni matimba ya hina leswaku hi seketela vandlha?
-
Hi nga swi tirhisa njhani swilo leswi hi nga na swona leswaku hi seketela vandlha?
-
U nga tsakela ku ri seketela njhani vandlha?
KUMA LESWI ENGETELEKEKE
Twana lexi endlaka Xikwembu xi nga ha lavi leswaku vagandzeri va xona va humesa vukhume.
“Bibele Yi Ri Yini Hi Ku Humesa Vukhume?” (Nhlokomhaka leyi kumekaka eka website)
Bibele yi nyike vavanuna lava khuvuriweke vutihlamuleri byo karhi. Kambe ku vuriwa yini loko makwerhu waxisati loyi a khuvuriweke a fanele a hetisisa vutihlamuleri byebyo?
“Ndlela Leyi Vulawuri Byi Tirhaka Hayona eVandlheni” (Xihondzo xo Rindza, February 2021)
Twana hi Timbhoni tin’wana leti nga ni xivindzi, leti titsonaka swo tala leswaku ti yisela vagandzerikulobye mikandziyiso.
Ku Rhumeriwa Ka Minkandziyiso Leyi Sekeriweke eBibeleni eCongo (4:25)
Twana ndlela leyi Timbhoni ti kumaka mali ya ku endla swilo leswi ti swi endlaka ha yona, ku nga ndlela leyi hambaneke swinene ni ya vukhongeri byin’wana.
“Ntirho Wa N’wina Wu Seketeriwa Njhani Hi Timali?” (Nhlokomhaka leyi kumekaka eka website)
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
