Vakreste va ntiyiso va tiyimisele ku nga pfumeleli nchumu kumbe munhu a va tshikisa ku gandzela Yehovha. A swi kanakanisi leswaku na wena u titwa tano. Yehovha u ku teka ku ri ka nkoka ku tshembeka ka wena. (Hlaya 1 Tikronika 28:9.) Hi swihi swiyimo leswi nga endlaka swi ku tikela ku tshembeka eka yena naswona u nga langutana njhani na swona?

1. Van’wana va nga endla yini leswaku hi nga tshembeki eka Yehovha?

Vanhu van’wana va ta ringeta ku hi tshikisa ku tirhela Yehovha. I vamani lava nga endlaka nchumu wo tano wo biha? Van’wana lava tshikeke ntiyiso va haxa mavunwa hi nhlangano wa Xikwembu leswaku va dlaya ripfumelo ra hina. Vanhu volavo va vuriwa vagwinehi. Nakambe, vafundhisi van’wana va hi hembela leswaku lava nga tiyangiki eripfumelweni va tshika ntiyiso. Swi ni khombo ku ringeta ku vulavula ni vagwinehi, ku hlaya tibuku ta vona, ku nghena eka ti-website ta vona kumbe ku hlalela tivhidiyo ta vona. Yesu u vule leswi hi lava va ringetaka ku tshikisa van’wana ku tirheli Yehovha hi ku tshembeka: “Va tshikeni. I vakongomisi lava feke matihlo. Kutani, loko munhu loyi a feke matihlo a kongomisa un’wana loyi a feke matihlo, havambirhi va ta wela emugodini.”—Matewu 15:14.

Ku vuriwa yini loko munhu wo karhi loyi hi n’wi tivaka a tshika ku va Mbhoni ya Yehovha? Swi nga hi twisa ku vava swinene loko munhu loyi hi n’wi rhandzaka a endla sweswo. Munhu yoloye a nga hi sindzisa ku hlawula exikarhi ka yena na Yehovha. Hi fanele hi tiyimisela ku tshama hi tshembekile eka Xikwembu ku tlula munhu wihi ni wihi. (Matewu 10:37) Hikwalaho, hi yingisa xileriso xa Yehovha xa ku tshika ku tihlanganisa ni vanhu vo tano.—Hlaya 1 Vakorinto 5:11.

2. Hi swihi swilo leswi nga endlaka swi hi tikela ku tshembeka eka Yehovha?

Ku rhandza Yehovha swi ta hi susumetela ku papalata ku katseka eka vukhongeri bya mavunwa. Hikwalaho ntirho kumbe minhlangano leyi hi yi joyineke kumbe nchumu wihi ni wihi lowu hi wu endlaka a swi fanelanga swi fambisana ni vukhongeri bya mavunwa. Yehovha u hi lemukisa a ku: “Humani eka [Babilona Lonkulu], n’wina vanhu va mina.”—Nhlavutelo 18:2, 4.

 ANAKANYISISA

3. Tivonele eka vadyondzisi va mavunwa

Hi fanele hi endla yini loko hi twa swilo swo biha hi nhlangano wa Yehovha? Hlaya Swivuriso 14:15, ivi mi bula hi xivutiso lexi:

• Hikwalaho ka yini hi fanele hi tivonela leswaku hi nga tshembi xin’wana ni xin’wana lexi hi xi twaka?

Hlaya 2 Yohane 10, ivi mi bula hi swivutiso leswi:

• Hi fanele hi va khoma njhani vagwinehi?

• Hambiloko hi nga vulavuli ni vagwinehi hi ku kongoma, hi nga hlangana ni tidyondzo ta vona kwihi?

• U ehleketa leswaku Yehovha u ta titwa njhani loko ho yingisela swilo swo biha leswi vuriwaka mayelana na yena kumbe nhlangano wakwe?

4. Tshama u tshembekile eka Xikwembu loko makwerhu a dyoha

Loko hi twa leswaku munhu wo karhi evandlheni u endle xidyoho lexikulu, hi fanele hi endla yini? Xiya nsinya wa nawu lowu kumekaka eka Nawu wa Xikwembu lowu a xi wu nyike Vaisrayele va khale. Hlaya Levhitika 5:1.

Hilaha ndzimana leyi yi vulaka ha kona, loko hi twa leswaku munhu u endle xidyoho lexikulu, hi fanele hi byela vakulu leswi hi swi tivaka. Hambiswiritano, loko hi nga si endla tano, swi nga va swinene ku byela mudyohi yoloye leswaku a ya eka vakulu a ya va byela xidyoho xakwe. Loko a nga va byeli, hi fanele hi byela vakulu leswi hi swi tivaka hikwalaho ka leswi hi tshembekaka eka Yehovha. Loko hi endla tano, hi swi kombisa njhani leswaku hi rhandza . . .

• Yehovha Xikwembu?

• munhu la dyoheke?

• van’wana evandlheni?

 5. Huma hi ku helela eBabilona Lonkulu

 NKATSAKANYO

Leswaku hi tshama hi tshembekile eka Yehovha, hi fanele hi papalata ku tihlanganisa ni vanhu lava nga tshembekiki eka yena. Hi fanele hi tlhela hi tihambanisa hi ku helela ni vukhongeri bya mavunwa.

Mpfuxeto

• Hikwalaho ka yini hi nga fanelanga hi hlalela, hi hlaya kumbe hi yingisela swilo leswi vuriwaka hi vagwinehi?

• Hi fanele hi va khoma njhani vanhu lava nga ha swi laviki ku va Timbhoni ta Yehovha?

• Hi nga xi yingisa njhani xilemukiso xa leswaku hi huma eka vukhongeri bya mavunwa?